Comentar de Pruma

Data

17 de auril 2017

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Spazier da Pasca

Le de do Pasca, söl iade cuntra Emaus, ti comparësc Gejú ressorí a dui discepui che ne le conësc tl pröm nia y l’inviëia da passé la nöt pro ëi. Insciö scri l’evangelist Lüca. Nos sun düc sön tru, tla tristëza y tl’euforia. Tradiziun te nosta cultura ozidentala á le „spazier da Pasca“, che nes inviëia fora de ciasa, ite tla natöra, cun familia y compagnia. Goethe le descrí insciö te „Faust I“ (deventé le „Osterspaziergang“): <Flöm y rüs é delibrá dla dlacia tres l’edl morjel y viënt dl’aisciöda, a val él la speranza che vëgn vërda; l’invern atempé, te süa deblëza, s’á trat zoruch ti crëps groi. Da iló mënel, sciampan, ma granijores da nescia te bofs sura la cortesc verdejina.
Mo sorëdl ne soporta nia de blanch, indlunch se möi formara y dejidér, döt ól vitalisé cun corusc; mo i ciüfs chi fala tl raiun, a so post adora sorëdl la jënt abelida. Ójete, por ciaré da chëstes altöres indô jö tla cité! Dal portal doi y scür se frënj inant n busiamënt zinch de porsones. Vignun stá incö tan ion te sorëdl. Ai festejëia la ressoreziun dl Signur, ajache ai é instësc ressoris: da locai tömi de ciases basses, da liadöres di mistiers de artejanat y comerz, dal pëis di ghibli y tëc, dala strentöra che binzla dales strades, dala nöt solëna dles dlijies vëgn düc condüs cuntra löm. Ciara ma, ciara, sciöche la fola se spaza por se despartí ti urc y ti pra, sciöche le rü te döta süa larghëza y lunghëza armöi val’ moltra ligherzina, y feter suraciariada se destanziëiera. Cinamai dales sëmenes dles munts dalunc nes ardurba adalerch guanc da corusc. I aldi bele le tamtam dl paisc, chiló él le dër paraisc dla jënt, contënc é pici y gragn: Chiló sunsi porsona, chiló pói le ester!>  (de Iaco Rigo)