Gejú é ressorí, aleluia!

Data

16 de auril 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N pinsier por Pasca da pert de siur Iaco Willeit, degan dla Unité Pastorala Val Badia
Trëi domandes a vignun de nos: Cara te sá pa la plü bela sajun dl ann? Cara é pa la plü gran scincunda por vigni porsona? Cara é pa la plü gran bela festa de dlijia? La dërta resposta é basada sön la V....?
Ci é pa la Festa de Pasca? Al é la Festa dla Vita: I festejun la ressoreziun de nosc Signur Gejú Crist; Ël che ê mort y sopolí, al é indô en vita y s'á incunté cun sü apostui, che n'ê nia dër bogn da crëie dala ligrëza. Y la plü gran bela aodanza y scincunda dl Ressorí é la pêsc. I cristians festejëia Pasca (chësc ann düc adöm ince cun la Dlijia ortodossa), na gran pert dla popolaziun dl monn testemoniëia insciö, desmostra por la vita y la pêsc. Chësta é la plü bela gran resposta ala situaziun de crisa, che manacia döt le monn te süa violënza: crëie che la vita é plü sterscia co la mort; crëie che la pêsc é plü sterscia co la vera, crëie che l'amur é plü sterch co le mal.
An pó dí che Pasca, la ressoreziun de nosc Signur, á cambié le monn y vigni festa de Pasca le cambia tres danü. De chësc é ince San Paul plü che convint: Sce Gejú ne foss nia ressorí, spo foss nosta fede zënza valüta, spo restass le monn sciöch'al é, mo deache le Signur é ressorí, viunse te na vita (realté) nöia (cfr. 1 Cor 15,17). Y por nos instësc scrí San Paul: I ne sun nia plü iö ch'i viri, mo al é Gejú Crist che vir te me. Iö viri tla fede dl Fi de Dî, che m'á orü bun y s'á dé ca instës por me (cfr. Gal 2,19). Le mistér de Pasca é ince simbolisé dala gran ciandëra y dai üs da Pasca. Bela la tradiziun di üs da Pasca. L'ü contëgn la vita; canch'al é so tëmp él le punjin che rump la scüscia y vëgn fora en vita. Gejú te süa ressoreziun á daurí le sepolcher, á superé la mort y protlamé la vita nöia. Ël á pö dit: "Iö sun la ressoreziun y la vita, chi che crëi te me, ará la vita ince do la mort."
Cun Gejú ressorí se metunse dala pert dla vita; chi che respetëia la vita, defënn ince la pêsc. Cal sará mo to pröm pinsier en Pasca da doman?
Fajun düc Pasca sciöche festa dla vita, de ligrëza y de pêsc!

Deplù te la edizion dl 14 de auril