Les ghiranzes per i ladins

Data

16 de mei 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’ASGB ti met dant propostes concretes al Convent di 33 en cont de Souramont, proporz etnich, assessour provinzial ladin y lingaz ladin unifiché.
La lia sindacala autonoma de Südtirol ASGB („Autonomer Südtiroler Gewerkschaftsbund“) damana te n document prejenté al Convent di 33 na miorazion dla situazion di ladins. „La jent ladina n’á con le secont statut d’autonomia nia ciafé l’atenzion che ti auda“, enscí l portaousc dl’ASGB Tony Tschenett. L’ASGB s’arata la raprejentanza sindacala di grups de lingaz todesch y ladin te Südtirol.

Les ghiranzes pont per pont

La prefazion dl statut d’autonomia dess avei n passus che impermet la readejion di trei comuns storics de Persenon y Tirol tl Beluneis (Souramont) a Südtirol, chest zenza messei mudé l statut d’autonomia.

Tl antertemp dess Südtirol eserzité na funzion de protezion per i trei comuns y ti ecuiparé tla cornisc dles poscibeltés giuridiches ai residenc dla Provinzia Autonoma de Bulsan (p.ej. tl setour dl frabiché residenzial).

Souramont dess vegní trat ite tla discuscion entourn a la Euregio Tirol y deventé de facto pert de chesta. Al moment á i trei comuns de Souramont demé status de osservanza. La UE dá la poscibelté de mete en pe colaborazions soura i Statesc fora, y te nost cajo foss demé bele i confins regionai n ostacul: chest é n nonsens.

Consciderazion souraproporzionala di ladins tl servisc publich, per evité declarazions stramudedes. L’ASGB é per daurí i concursc ai ladins ence olache al n’é nia prevedú posć per ei - dantaldut ai liviei plu auc. Pro na mioura cualificazion ruva inant l candidat ladin; la situazion atuala dl proporz vá a cosć de chel grup linguistich che á te chest contest bele na raprejentanza souraproporzionala: pro i laours provinziai l todesch, pro chel statal l talian.

Les sentes che scluj fora i ladins per Statut é da tó ju. I ladins dess podei deventé licars aministratifs (p.ej. al TAR), y ester raprejentés tla Comiscion di 6 y te chela di 12, yii.

La garanzia de na prejenza ladina tl govern provinzial, sce al é doi ladins tl consei provinzial. Per chest dessel vegní cherié doi certli litai: un per Gherdeina y per la Val Badia, y n auter per l rest di comuns ladins. I giurisć tl Convent dess studié do, sciche chest podess vegní concretisé. Co podess pa i ladins che viv fora dles vals ladines vegní touc ite ti certli litai ladins?

Insegnament istituzional dl ladin ence fora dles vals ladines.

Toponomastica: Reconesce i inoms ladins de posć cherscius storicamenter y adoré i esonims ladins ence fora dla Ladinia - ence sun les tofles di paisc.

I ofizi provinziai dess mostré su tresfora ence les indicazions per ladin.

Adoranza dl lingaz ladin unifiché scrit per duc i comuns ladins: Ladin Dolomitan. Chesta é la precondizion per escrizions y scrites comunes, per ac ofiziai y zertificac, per documenc d’identité. L lingaz ladin unifiché dess na maioura legitimité dl vers dles istituzions (politica, gliejia) y cialess soura i ciampanis di paisc fora.

Creazion de na comunité raionala ladina.

Reconesciment de na istituzion che rejona per i ladins, dantaldut en previjion de na demontaja dla Region: la Lia di Comuns Ladins dess ciafé plu competenzes ti ciamps dla cultura, dl lingaz, dl turism y dles stredes di joufs - y ence plu mesi finanziars. Enfin sen á les provinzies enstesses, y zenza colaborazion con les autres, tout dezijions per l lingaz y la cultura.

Prevedei l’indenité de trilinguism soura dut Südtirol, independentementer sce i posć é ti comuns ladins o te ofizes publics de relazion direta ladina.