Südtirol: la scora se röia, i ejams mët man

Data

16 de jugn 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Por i scolars dla terza mesana y dla cuinta dles scores altes mëtel sëgn man la fasa di ejams de Stat. Por düc i atri é les vacanzes sëgn chiló.
Cun la jöbia ai 15 de jügn á metü man por i scolars de terza mesana i ejams de Stat, cun la Proa Nazionala Invalsi. Indöt él gnü ametü al Ejam de Stat de contlujiun dla scora mesana tl Südtirol 5.675 scolares y scolars (tles localités ladines indöt 226 candidac, 4.073 tles scores todësces y 1.376 tles scores talianes). I ejams de Stat dles scores altes mët man ai 21 de jügn cun la pröma proa scrita. Chësc ann él gnü ametü tl Südtirol al ejam de maturité indöt 4.030 candidates y candidac (tles scores altes ladines 84 candidac, tles scores todësces 2.901, te chëres talianes 1.045). Pro la pröma proa scrita podará i candidac dles scores ladines chirí fora sce ai ó scrí le tema por talian o por todësch. La secunda proa scrita reverda na materia che reverda la scora ch’ai fej y á le fin da valuté les conescënzes spezifiches dl studënt. La terza proa scrita é partida sö te döes perts y te dui dis. L’ejam de Stat se stlüj jö cun la proa a usc che tol ite dötes les materies de chël ann de scora.
Por dötes les atres mitans y mituns dla scolina y scolars y scolares dles scores elementares, mesanes y altes se röia l’ann de scora al plü tert l’edema che vëgn. ”I oresson anuzé la fin dl ann de scora y scolina por rengrazié te na manira particolara dötes les educadësses, maestres y maestri por so gran impëgn y laur tl setur dla formaziun”, dij i assessurs por la formaziun Christian Tommasini, Florian Mussner y Philipp Achammer. Ince chësc ann á döt le personal didatich arichí le percurs formatif di scolars y studënc cun n capitul nü i acompagnan sön le tru dla vita y dla formaziun personala, insciö i assessurs. Ince i intendënc dles scores ladina, todëscia y taliana, resp. Roland Verra, Peter Höllrigl y Christian Tommasini rengrazia por la fin dl ann de scora düc i surastanc, i colaboradus por l’integraziun y la pedagogia sciöche ince düc chi che laora ti secretariac y chi che laora en general por le bun funzionamënt de nosc sistem scolastich. Da pert de düc ti vá ai mituns y ai scolars les mius aodanzes por n’isté plëgn de sodesfaziuns.
Tles scolines ladines án albü por l’ann de scolina 2016/17 indöt 674 mitans y mituns che s’á scrit ite. Tles scores elementares, mesanes y altes che fej pert dl Departimënt Educaziun y Cultura ladina él sté indöt 2.480 scolars scric ite. Tles scolines todësces él gnü scrit ite tratan le 2016/17 indöt 12.240 mitans y mituns, tles scores elementares, mesanes y altes dl Departimënt Educaziun todëscia indöt 45.513 studënc, tles scores profescionales 8.244 y tles scores dl’agricoltöra y dl’economia agrara 1.008 studënc.   (osp)