“Bolzan ne volelo? L ciape na pojizion!”

Data

13 de messel 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Riflessiogn e consideraziogn sul davignì dei ladign da Souramont darè l laor vegnù fora da la Convenzion dei 33 contade da Elsa Zardini, vizepresidente de la Union Generela, presidenta del Istitut cultural ladin Cesa de Jan e presidenta de la Union di Ladis de Anpezo.




Su La Usc de vender 07 de luio on liet nte na intervista fata a Edith Ploner, vizepresidenta de la Convenzion dei 33, de come che s'abe sarà via i laor de sta Convenzion inciariada de descore fora la revijion del terzo statut de autonomia de la region Trentin - Südtirol e de ce che i ladign i abe arjont o manco. Nte l'intervista s'à incia liet de ce che siebe stà fat fora per la situazion dei ladign de Souramont, situazion che se sperava la podesse vegnì al meo darè che su la taula de discussion l eva stà portà documenc come l Memorandum de Trebo e Valentini e la Declarazion de la Generela, ma che de fato la é mudada puoch e nia. De chest la vizepresidenta de la Union Generela Elsa Zardini la s'à ressentù no puoch e nte na intervista l'à volù ne contà de meo cala che l'é sua pojizion.

Presidenta, i resultac del laor mandà navant da la Convenzion dei 33 i descor de n'autra ocajion de maor integrazion e tutela che i ladign da Souramont i à pardù. Pecà, se se pensa che bele da agn la provinzia de Bolzan la cugnes cal che fosse l volé de la jent de sti trei comugn...
A dies agn dal referendum che i trei comugn de Souramont i à fat per tornà con Bolzan crede proprio che Bolzan l podesse se fà n frego de esame de coscienza e tegnì cont de sto volé almanco nte calche aspet de sto document. Noi on fat dut l posibile, l referendum l é passà, ma no on ncora bù demostraziogn concrete e scrite che lori i ne vobe, che lori i ne azete. Se se varda inveze l ejempio de Sappada vedon che duc i capicomune dei comugn del Friuli che i é apede ju i s'à muovest per l referendum e i é ruai fin a Roma. A noi na tal dimostrazion la ne mancia.

La cuestion dei ladign da Souramont l eva demà una de le tante che la Generela l ava prejentà nte sua Declarazion e che i dott. Trebo e Valentini i ava prejentà nte suo Memorandum, ma somea che gnanca le cuestiogn che revarda i ladign da là fora no le siebe stade ciote n considerazion...
L é vera, somea che la proposta fata da la Generela no la siebe stada rezepida da la Comission. Da chest se capis che dute le bele parole che se fas le và ben, ma che canche se trata de passà ai fati se lassa che Souramont l muore. L eva nte sti mes ocajiogn per ne dà nuova vita: no demà sta discussion su la revijion del statut de autonomia, ma incia, pi ntel spezifico, la lege ladina del on. Alfreider a Roma. Ad ogni modo noi sion cruziei de nost davignì, on semper vardà de jì navant, l unico fil che ne ten auna l é la Generela e guai se nte sti agn la fosse manciada.

(Ciataré dute l'intervista che on fat a Elsa Zardini nte la Usc de vender 14 de luio)







 (Giulia Tasser)