La Usc di Ladins

Amò na outa te Consei regionèl no se é rué a l’aproazion del dessegn de lege nr 94 per la fujion di doi comuns fascegn de Vich e Poza, e se cognarà n rejonèr amò te la scontrèda di 18 de otober.

A ferèr, ai 20 de setember, l’é stat amò n’outa l Conseier de “L’Alto Adige nel cuore” Alessandro Urzì, che no l vel azetèr l’inom cernù dai doi comuns. I Consees de Vich e Poza duc a una, e dapò ence i sentadins al referendum di 20 de november del 2016, con passa l’80% de stimes a favor, i à defat aproà per l nef Comun, che cognessa peèr via col prum de jené del 2018, l’inom “Sèn Jan”, che per talian doventa “Sèn Jan di Fassa”. Chest inom é stat cernù ben segur per sotrissèr e valorisèr l’identità ladina de dut l raion de Fascia che vegnarà tout ite dal nef Comun, e con n eie ascort ence al marketing turistich: n inom curt e particolèr, che no se confon tel web con duc i tropes etres “San Giovanni” ma con la denominazion “di Fassa” che met al luster la partegnuda a chesta val.

Urzì à dit che chest inom, olache mencia l talian, l podessa jir contra la normes costituzionèles, e fazile no l’à conscidrà che te la Tèlia inomes no taliegn, o che no à n son talian, n’é giusta teis, pean via da Courmayeur te la Val d’Aosta, a Cimolais tel Friul o Calangianus te la Sardegna, e più vejin a nos Cles o Sfruz e n grum de etres tel Trentin (demò per fèr vèlch ejempie) che no i à na traduzion per talian.

Urzì l se à empontà a voler che l’inom vegne mudà e la forma talièna sie “San Giovanni”, ajache l’à tema che chest posse esser n “prezedent” pericolous che risie de meter en discuscion la toponomastica bilingue del Sudtirol, e a nia à joà i intervenc che à sotrissà che tel Trentin la normes en cont de toponomastica les é desferentes e ence chi che à dit che se la popolazions del post no à solevà chesta sort de obiezion, no l’é giust che sie zachei da fora che vel jir a comanèr te cèsa di etres.

Ampò Urzì l’à portà dant na lingia de emendamenc e n orden del dì domanan de jontèr l’inom talian o de bocèr l ddl e dapò l’à proponet che la discuscion del ddl vegne sburlèda.

Tel debatit l’é entervegnù ence l conseier Giuseppe Detomas, che l’à sotrissà de esser nasciù proprio a Sèn Jan, e che chest inom l’é “normal” per la popolazion, e la costion uzèda fora l’é demò na discuscion strumentala fata da la politica.

L Consei à tout dant per dut l dì (chest l’era l prum pont a l’orden del dì) i emendamenc de Urzì, che i à abù duc la gran maoranza de stimes de contra, e i é rué a aproèr i prumes 4 articoi. Da les 17.30, su la discuscion del 5° articol, l’é stat serà sù la sentèda e la discuscion jirà inant, coche aon dit, ai 18 de otober.


 (Lucia Gross)