La galassia blancia

Data

12 de fauré 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Liber nü de Carlo Guardini söl "Dolomiti Superski". Al é n iade de descurida tres les carosel di schi plü conesciü dles Alpes y le raiun di schi nr. 1 dl monn: storia y posć, pioniers y vijiuns, tecnica, ecnomia y organisaziun. Le liber é gnü fora dala "BQE Editrice" tles verjiuns taliana y todëscia.
Carlo Guardini é n joranlist trentin sté corespondënt dl Corriere della Sera y dla Ansa, y redadú dl cuotidian Alto Adige y diretur dla promoziun turistica de plü aziëndes por le turism desco ince manajadú di media pro de gran evënc (p.ej. Filmfestival della montagna a Trent y Marcialonga di Fiemme e Fassa). Söa pasciun é la munt y le sport dai schi. Dan da püch ál dé fora le liber che cunta dl Dolomiti Superski, cun le titul talian "La galassia bianca" y tla verjiun todëscia "Die Weiße Galaxie"). Al é na publicaziun interessanta y de format gran, arichida da fotografies storiches y da motifs fac jö te na natöra de morvëia.

Cunté vëgnel te plü capitui ince dles vijiuns di pioniers da se lié adöm tles Dolomites por na impiantistica ampla y efiziënta, y na oferta schiistica sot a un n schipas. Le pröm consëi d’aministraziun dla gran organisaziun ê chi agn 1974-76 metü adöm da Gianni Marzola (Gherdëna), Erich Kostner (Corvara), Antonio Dal Pont (Santa Giustina Bellunese), Erich Kastlunger (Al Plan de Mareo), Alceo Pastore(Moena) y Ugo De Battista (Reba/Fodom). L’alpinist Reinhold Messner vëiga tla industria schiistica y tl Superski Dolomites le fatur che á tigní sö gran pert dl despopolamënt di paisc incër le massif dl Sela. Pro l’organisaziun dl carusel alda ince la tecnica y le svilup de chësta, cun lapró i investimënc ince struturai dles pistes dai schi y dl ineiamënt. Cun l’organisaziun di implanc y dles pistes ál metü man da crësce tles Dolomites n turism che é tres ciamó le motor dla economia. Ma che le dagní se damana desfides nöies, y de chëstes baia i impresars y funzionars de Superski plü jogn. L’oferta por le scior y sportif de lifc y pistes tles Dolomites pe ester ruvada a n livel pasciüy  orienté a n potenziamënt dantadöt de na atrativité turistica da d’isté. Y te chësc contest joblenëia la mobilité na gran pert, y tröc vëiga la gran desfida avisa tl arjunjamënt dles vals ladines zënza mesi a traziun de combustiun.

Tl liber vëgnel ince dant n pice contribut söla cultura y i ladins, a na manira marginala. Ince la cultura dl post y ladina é n lac danter les economies dles valades (dantadöt tl sozial) y n potenzial de autentizité, donca na atraziun por valuté tl dagní le raiun dles Dolomites y i sorvisc por ecursciuns y sports che taca lapró. Les vijiuns podess s’oje ince de chësc vers, ajache nüsc paisc á ince n carater chersciü fora dla storia y natöra, y nia ma na organisaziun di schi otimala. N zitat de Eleanor Roosvelt (ativista, vijionara y fomena dl presidënt american) scrit jö tl liber dij: "Le dagní é de chi che crëi ala belëza de sü soms". Por le Dolomiti Superski á bele metü man le dagní cun les ofertes da d’isté interessantes y ecologiches. Andy Varallo, le vizepresidënt atual de Dolomiti Superski, dij tl liber che la desfida por i implantisć stá sëgn plü tl comfort y tl trasport comot, y nia ma plü tl amplié pistes y fá pistes nöies. Söa idea da arlungé la sajun da d’isté cun la daurida di lifc y di eserzizi por le scior podess plan plan fá raisc. Spo podess la "galassia blancia" gní intënta plan plan ince a vërt - almanco en pert.  (Iaco Rigo)