Comentar de Pruma

Data

23 de fauré 2018

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La violënza - y la Pêsc - nes reverda düc!
Al pé che ara ais foré te n ospá, la ministra Laura Boldrini, cun süa proposta da proibí i partis dla man dërta estrema o che idealisëia le fascism, sciöche p.ej. CasaPound y Forza Nuova. "Ai ne n'á nia lerch te nosta democrazia", ára dit. Chiló i dái rajun: l'estremism y la violënza ne n'á nia lerch te nosta democrazia, te degüna forma. I dubitëii indere dassënn che na proibiziun pois le sferié demez, deache l'estremism ne n'é nia ma te n partí o te n movimënt, mo al é ti cés dla jënt. Proibí i partis oress da me infora dí porté le fenomen tl ascognü, ci che pó ester ciamó piec. Baldi pél che populism y estremism vëgnes indô sö tres deplü, te nosc continënt dl'inteletualité filosofica, che al vëgnes
cinamai toleré indô da dí fora zënza polans söla lënga ci che ê cina dan püc agn n tabú: al é sëgn al ordin dl de che al vëgn tamposté cuntra porsones de n'atra religiun, n ater corú, n ater pinsier, ince da pert de esponënc politics plü alc. Sües parores sona tan bun: ai propaghëia razism y ti dij amur por la patria, ai manifestëia sënn cuntra le forest y ti dij respet por nosta identité. Sües soluziuns pé tan scëmples y tleres. Y tröc ti crëii y ti vá do, sciöche sce al foss i profec nüs. Mo ai vënn föm y stöp ti edli.
L'Europa vir da passa 70 agn en pésc, mo al pé che les generaziuns da incö - poa, ince te nüsc paisc - mëtes man da desmentié les crudeltés che les döes gran veres á porté tl monn y cina dan porta de ciasa. Ponsun ai paisc desdrüc y profugs ladins tla pröma, ales opziuns tla secunda, ales desgrazies y desperaziuns familiares te intrames. La pésc vëgn incö metüda al prigo massa bunmarcé, ince da scraiuns che proa da nen trá fora n capital politich. Plü albas ne vára bëgn nia da tomé. La violënza é na cossa che nes reverda düc. I ne desfarenziëii nia danter chëra de man dërta y chëra de man ciampa. La violënza é por se instëssa da condané y ara n'é nia ma chestiun politica o legislativa, al é na chestiun che s'atoca un por un, öna por öna. Por la pésc messunse se dé da fá de por de - tl pice y tl gran - avisa sciöche por le garaté de n'amizizia, de n travert o de n proiet. I recordi chiló ion la verité de n zitat de Edmund Burke - scritur, politich y filosof dl tëmp dl iluminism: "Por che le mal la davagnes, bastel sce i bugn ne fej nia!" S'al tignun a mënt!  (de Pablo Palfrader)