Comentar de Pruma

Data

14 de setember 2018

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Lites, an á tut ia le porcel damat!
Canche i á odü les listes di candidac por les lites provinziales tla Provinzia da Balsan m'ái emponsé: "Düc y degügn". 5-6 listes á candidac ladins, cotanc ince conesciüs y sön lista dancá, che chir usc dan les lites y messass se cruzié extra di ladins do les lites. Düc ne ruvará te Consëi, mo ester esi sön na lista che á sü rapresentanc a Balsan,Trënt y Roma. Chisc partis se cruziará di ladins tan inant che al é te so interes, tan inant che al ti porta val' a so partí y a söa politica. Ma che por ciaré de na mendranza che vá porater sura i confins de trëi provinzies ia, messasson ince ester bugn da se destaché vignitan dla gran rajun de stat, dales gran cultures y ideologies, por podëi fá i interesc de na comunité
de mendranza che adora unité culturala y soziala, sconanza y valianza y autonomia de dezijiun. Chësta é la fondamënta sön chëra che ince i ladins pó y mëssa fabriché süa esistënza y so svilup. Ci partis, cun o zënza candidac ladins, é a öna cun na rapresentanza politica garantida por lege, te Junta y TAR, p.e., cun le reconescimënt paritar y l'aiüt aladô dl lingaz ladin, cun na strutöra autonoma che tëgn adöm i ladins sura i confins provinziai ia, y cun tröpes d'atres cosses de importanza vitala. I ladins, bëgn la jënt ladina, é piá ia söla dërta strada, chëra de n movimënt ladin che mëssa se cruzié dai debojëgns dla mendranza, mo a Balsan án fat de döt por ti stlü chësta strada dl'autorapresentaziun, ma por podëi i avëi te n vilin forest, por i avëi pro y sot a d'atri. Da me infora á fat l'SVP n fal da ghiré a vigni cost ince la rapresentanza di ladins. Sce le movimënt LADINS ess albü le tëmp y les poscibilités da se etablé (crësce y se renforzé) ess aldedaincö nia ma i ladins n so partí mo plü dessigü ince l'SVP n bun aleé (compagn) politich. Combate impede daidé, o almanco lascé lerch a na organisaziun politica ladina, ó dí tó ia le porcel damat. Insciö vá le spidiciamënt y sfutamënt di ladins inant.  (de Carlo Willeit)