Suns Europe 2018

Data

14 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Presentade la 4e edizion, tantis lis novitâts
Aromai rivât ae cuarte edizion Suns Europe al à ben clare i siei obietîfs: 'Dirit ae lenghe, dirit ae diversitât'. Ancje di chest si è fevelât in ocasion de presentazion uficiâl dal event, in program a Udin (e no dome), dai 29 di Novembar ai 2 di Dicembar. Inte sede de Regjon FVJ, a Udin, al è stât presentât il program dal Festival, in presince dal assessôr comunâl Maurizio Franz, dal diretôr de ARLeF William Cisilino, dal diretôr artistic di Suns Europe, Leo Virgili, e dal president de cooperative Informazion Furlane, Carlo Puppo.

E je une mission impuartante e ambiziose ('Promovi lis produzions artistichis contemporaniis intes lenghis minorizadis europeanis cul obietîf di sostignî la costruzion di une Europe diferente, unide inte diversitât, fondade sui dirits, sul pluralisim, sul rispiet e su la colaborazion') chê di Suns Europe - progjet de cooperative Informazion Furlane cu la poie finanziarie de ARLeF - Agjenzie Regjonâl pe Lenghe Furlane, de Regjon Autonome Friûl Vignesie Julie, dal Comun di Udin e de Fondazion Friuli – che ancje chest an si conferme il principâl Festival european che al conte e al fâs cognossi, a ducj, lis lenghis minorizadis, al pont di gjoldi dal Patrocini dal Consei de Europe e di NPLD - Network to Promote Linguistic Diversity, la rêt europeane pe promozion de diversitât linguistiche.

DECLARAZION WILLIAM CISILINO
Suns Europe al è un unicum a nivel european, il pont di riferiment plui significatîf de produzion artistiche siore in lenghe minoritarie. Un festival – al declare William Cisilino, diretôr de ARLeF, Agjenzie Regjonâl pe Lenghe Furlane – che o vin contribuît a ideâ e che o sostignìn fintremai de prime edizion, parcè che al puarte in Friûl dute la ricjece e la vivarosetât espressive che e nas de diversitât des culturis di minorance, fasint dal nestri teritori une plateforme di incuintri e di confront di identitâts, sensibilitâts e ideis diferentis. Clamant dongje i miôr talents artistics, che a presentin la lôr produzion plui resinte a un public zovin, internazionâl, curiôs e creatîf, Suns Europe al è la dimostrazion concrete dai valôrs dal plurilinguisim e di trop che lis tantis lenghis minoritariis che si fevelin in Europe a pandin viertidure e modernitât.”

MUSICHE
Il concierton, anime de manifestazion, ancje chest an (sabide il prin di Dicembar, des 21, al Teatri Gnûf Giovanni da Udine) al maravearà il public intune sere fate di biele musiche, divertiment e colôr, buine di convinci ancje chei plui setics. Une serade che no si spietisi, parcè che Suns Europe nol è un festival di folclôr, ma une manifestazion zovine, vivarose, e che e olse simpri intes sôs propuestis artistichis. I biliets a son disponibii su vivaticket.it (>bit.ly/SunsEuropeBiliets) o intai ponts di vendite autorizâts (ca la liste > www.sunseurope.com). A lâ sù sul palc, dongje dai parons di cjase dal Friûl (Luna e un Quarto), a saran artiscj che a vegnin dal Cjanton dai Grisons (Dario Hess), dai Paîs Catalans (Jansky), ma ancje de minorance svedese de Finlande (Laura Hoo), e po dopo de Galizie (Espiño), dal Paîs Basc (Rodeo), dal Gales (Yr Ods), de Basse Sassonie (Melissa Meewisse) e de Ladinie (Martina Iori).

NOVITÂTS
A jentrâ plui intal detai dal program dal event al è stât Leo Virgili, il diretôr artistic di Suns Europe. Virgili al à contât prin di dut lis novitâts de 4e edizion, cemût che si à vût anticipât intes setemanis passadis. Prin di dut i dîs dal Festival, no plui trê, ma cuatri; e dopo lis ambientazions: no dome il Teatron; ma ancje il Yardie di Pradaman (ai 29 di Novembar, des 21) dulà che si tignarà la fieste di benvignût; i teatris di Orsarie e Cormons, e l'auditorium di Listize (ducj i trê ai 30 di Novembar, aes 21) animâts di diviers concierts; la librarie Tarantola di Udin (il 1n di Dicembar aes 18) che e ospitarà l’incuintri 'Contâ dissegnâ scrivi', cui vincidôrs dal Premi San Simon 2018

Confermade ancje chest an, invezit, ‘Scuele Europe’: une lezion-conciert dedicade aes scuelis secondariis furlanis dulà che si fevelarà di dirits, Europe e diversitât linguistiche. Altre grande novitât di cheste edizion e je la zornade di domenie ai 2 di Dicembar che si davuelzarà al Teatri San Giorgio di Udin. Si scomence aes 14.30 cun 'Docu-storiis'. Stefano Giacomuzzi (Pozzis-Samarcanda), Dorino Minigutti (Int Art) e Marco D’Agostini (Emigrant) a contaran in anteprime i lôr lavôrs. Aes 16 la presentazion di 'Km 100', documentari visionari dulà che la regjiste Francesca Valantins e descrîf Aleria, lûc dulà che si son davuelts avigniments storics impuartants intune Corsiche in mutazion. E sarà duncje la volte (aes 17) de gjornaliste catalane Maria Xinxò ce presentarà la sô investigazion sociologjiche sul 'llaç groc', il floc zâl simbul di vicinance ai presonîrs politics catalans e di rivendicazion di dirits fondamentâi. Aes 18 ancjemò cine, cheste volte si movarìn intal Paîs Basc cun 'Amama', luncmetraç pluripremiât dal regjist Asier Altuna, presint in sale, sore che ospit speciâl inte serade dal prin di Dicembar al Giovanni da Udine. Dopo di un pocje di musiche dal vîf, il festival si sierarà (aes 21) cul spetacul teatrâl targât TSU – Teatro Sosta Urbana, 'Donald dal Tiliment'.

IL FESTIVAL
Suns Europe al è un progjet organizât de cooperative Informazion Furlane cu la poie finanziarie de ARLeF - Agjenzie Regjonâl pe Lenghe Furlane, de Regjon Autonome Friûl Vignesie Julie, dal Comun di Udin, de Fondazion Friuli e dal istitût basc Etxepare, in colaborazion cu la cooperative PuntoZero e altris sogjets publics e privâts, furlans e internazionâi, cul patrocini dal Consei de Europe e di NPLD - Network to Promote Linguistic Diversity, la rêt europeane pe promozion de diversitât linguistiche.

Dut il program e lis informazions si cjatin su www.sunseurope.com e su la pagjine Facebook 'SUNS Europe'.

(Comunicat stampa lascé original tl furlan)

Galaria retrac

View the embedded image gallery online at:
http://lausc.it/atualite/8676-suns-europe-2018#sigProId5a785d7c7d