Ciadeina sperimentala de poejies

Data

17 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L esperiment gareta y deventa n ejempl da desfiré inant. 55 autoures y autours á realisé na "ciadeina" leterara te 15 lingac, con ence l ladin a la pert. Gran merit per chest bel laour de Südtirol á la Lia Autores Südtirol con i doi scritours Arno Dejaco y Matthias Vieider che á curaté le proiet, che la ciasa editoura Folio á spo dé fora
Na poejia é la ousc dal cuer y dla anima, depenta y decoreda, datrai ence fata ia te n juech interessant che á l potenzial de trasmete fle y liberté. Y canche la poejia é bona de sbroché fora de se instessa, arjonjela na corelazion con n entourage soura l blot indoviduum y i termi dl lingaz fora. "Lyrischer Wille" é poejia te na sozieté multilinguistica, na desmostrazion che la comunicazion é poscibla soura i lingac fora. La poscibelté é deda per merit dla colaborazion, ence a destanza, anter autoures y autours, che taca adum ence sce ai ne se conesc nia. L stroment é scempl: al vegn laoré y scrit a ciadeina, pian via da na poejia che fej da "caput" a dut n sistem capilar de plu lingac.

Set é i capitui, o dit miour: les ciadeines, dedichedes a n tema. Tolon ca l secont tema, denominé "Vers ladin". La poejia a ce dla ciadeina é de Roberta Dapunt, che i reporton: <Vers ladin, tan rî che al é da te scrì. / Ćiara da finestra fora y vëiga dantadüt tëmp y sajun, / degun pinsier a jënt ladina, degun paîsc nadè. / Tan püćia crëta a mia confesciun, / n pater, ave, gloria vigni iade da pié ia. / Dejciolè raîsc, desraijé ödli y orëdles, madër s’un trà / y lascè jì pîsc y mans fora por pastöra plö grassina. / Miorè, ingrassè parores y punt d’odüda / y tla finada ćiarè zoruch da n cucher ite.> Madè Neumair prejenteia la seconda anela dla ciadeina, con na sia verscion taliana che tol i impulsc da la poejia de Dapunt, ala recorda na traduzion ledia, Inant vala spo con Kurt Lanthaler (scritour sudtiroleisc conesciú, con ravises en pert ladines) che porta per todesch na "sia" traduzion dles poejies de Dapunt y Neumair. L scritour Adel Jabbar pona publicheia si contribut "anela" per arab, cie che Oswald Egger tol su y fira inant con na secuenza de pictograms che che recorda i emoticons dla corispondenza virtuala moderna. Serena Osti tol su les emozions descededes dai "emojis" de Oswald Egger y reporta esclamazions y interieziuns che rejona da soules zenza sogec o ogec. Greta Pichler se lascia ispiré da chestes esclamazions y les descriv a sia maniera (per todesch): dijan p.ej. al scumenz che "al bala vocai sciche segns tl mus"... Lino Pasquale Cacciapaglia porta inant l juech con na poejia scrita per spagnol, dedicheda al "deseo" (dejider) che vegn materialisé te metafers de natura y persona (l ruf Ebro, caña, camino, carrera...) y invieia a la fin "de l delibré tla doman". La anela finala de chest juech vegn bolida cujida pro da Cristina de Grandi, per ladin, che conta chest: <T’ rausces / tres l’ur dl rü Ebr / sciöche cianes vërdes / dala ciaradöra vercia / y fora de n sarëgn / n sciosciüre / n bandoré busiënt: / - Dejier - / forza che vá zoruch / al orí dla vita / tö tru dl rü atempé / tües eghes é mans / che condüj a ci / sce an te lascia jí / lëde söla doman.>

La scritoura Rut Bernardi á judé truep per pié via con chest esperiment leterar y publiché spo l projet te n bel liber. Ala é prejenta con chisc autri autours tl liber - anter chisc de plu ladins: Eeva Aichner, Stefen Dell’Antonio Monech, Daniel Brandlechner, Maria E. Brunner, Lino Pasquale Cacciapaglia, Reinhard Christanell, Brunamaria Dal Lago Veneri, Roberta Dapunt, Arno Dejaco, Farshad Doulabi, Oswald Egger, Carla Festi, Franco Fortini, Eugen Galasso, Cristina De Grandi, Daniel Graziadei, Maria C Hilber, Lilia Ianeva Satta, Adel Jabbar, Matteo Jamunno, Norbert C. Kaser, Brigitte Knapp, Haris Kovačević, Kurt Lanthaler, Sepp Mall, Laura Mautone, Werner Menapace, Gentiana Minga, Waltraud Mittich, Christian Morgenstern, Lene Morgenstern (Helene M. Delazer), Gabriele Muscolino, Silvia Murer, Madé Neumair, Wolfgang Nöckler, Maria Oberrauch, Serena Osti, Teresa Palfrader, Greta Maria Pichler, Anne Marie Pircher, Nadia Rungger, Nadia Scappini, Matthias Schönweger, Louis Marley Crowfoot Schropp, Claus Soraperra de la Zoch, Anna Stecher, Sonja Steger, Carlo Suani, Gerd Sulzenbacher, Sonia Sulzer, Paolo Bill Valente, Matthias Vieider, Stefano Zangrando y Jörg Zemmler.

Chest projet desmostra tan viva che la creativité leterara y la vueia de interazion anter i scritours te nosc raion alpin é. Aldidancuei á la poejia les portes davertes, ence fora de so contest tradizional y cultural. Y suvenz é l’osservazion da nia intene i autri y i scric di autri, demé na ignoranza che scluj les portes y les stues personales.