La Usc di Ladins

Incö mercui él sté le "de cultural" al intern dl program dla Europeada 2016. Les sogadësses y i sogadus cun sü acompagnadus, y les autorités cun i media, s’á abiné tla garasc sura le Museum Ladin ala presentaziun ofiziala y a n pice past ofrí dal’organisaziun de chësta Europeada: la FUEN, la Provinzia de Balsan, la Regiun de Trënt-Balsan y le VSS. Le Museum Ladin y l’Istitut Ladin Micurá de Rü á fistidié dla location y dl sorví la marëna.

Do l’Inn Ladin cianté da Susy Rottonara y i salüc ofiziai da pert dles autorités, ti él gnü dé lerch sön paiun ala surandada de n smaz de cifüs da pert dl assessur provinzial Florian Mussner ala ex vizepresidënta dla FUEN Martha Stocker, y spo ince ala surandada de na onoranza a Giorgio Costabiei por i 15 agn da presidënt dl’US San Martin de Tor. Ajuntada é gnüda spo la performance che á abracé les mendranzes presëntes a chësta Europeada: Anastasia Kostner á salpü da trasmëte situaziuns storich-culturales de mendranzes y na buna sugestiun tres le bal espressuf y cun l’aiüt instës di rapresentanc dles mendranzes.

Söl program spo do marëna él sté le spetacul dl JEMM Music Project, La vijita debann al Museum Ladin Ciastel de Tor y - söl ciamp dal sport da San Martin - la partida amicala danter la Jonëza dla FUEN y na seleziun de profugs atualmënter tl Südtirol.

 (Iaco Rigo)