Manifestazions atuales speziales

Data

18 de agost 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 18 d’agost
Festa dla Musiga
A La Pli de Mareo en sabeda y domënia, ai 19 y 20 d’agost 2017
La Musiga d’La Pli inviëia a süa festa dl paisc chisc dis sabeda y domënia. La sabeda sëra sonará dales 19:00 inant i grups Blechzinnen Toblach y Südtioler Rifflblech, la domënia abeliará cun na matiné la Trenser Böhmische dales 9:30 inant, dales 13:00 inant tignará Arcangelo & Co. aurela cörta, dales 17:00 sonará la Musiga da Oberbozen, dales 19:00 inviëia a balé „Die Verspielten“.

Col in Festa e La Triolada
Da vender 18 a domenia 20 de agosto l pico pais l se piturarà de color, mujiga, sport, tradiziogn e divertiment 
Na edizion liada al sport e le tradiziogn chela de Col in Festa 2017. Se pearà via vender 18 da le 17.00 co la daurida del tendon per po jì navant a le 22.00 co la mujiga dei Dirty Deeds. Sabeda 19 se pearà inveze via da le 10.00 co la daurida del tendon e de duc i stand de le associaziogn per le vie del pais. Da le 12.00 navant cujina tradizional e da le 16.00 la proiezion de la version taliana del film “A roeder mi amour” de Franco Vecchiato. Da le 21.30 navant mujiga coi “Tirock”. Domenia 20 da le 10.30 se metarà a jì inveze “La Triolada” marcia no competitiva che passarà fora per bosch e fraziogn del pais con percorsi desferenc per picui e granc co le premiaziogn che vegnarà fate da le 13.30. Da marenda se podarà zarcè balote e goulasch e da le 15.00 sarà la ejibizion del grop mini folk de Selva. Per duta la giornada de sabeda sarà l muot de beve, magné e de jì a vede i stand de dute le associaziogn del pais slargei fora da la piaza fin su la zima del col. Le associaziogn del pais le ve speta per fà festa duc auna!

Trombëtes baroches te dlijia de Badia
Badiamusica presentëia n conzert cun le ”Ensemble Münchner Trompeten Consort”, en vëndres ai 25 d’agost dales 21.15, te dlijia de Badia
Le grup é metü adöm da Guido Segers, Matthew Sadler y Markus Erlacher (trombëtes baroches), Christian Miglioranza (pauca) y Johannes Berger (orghe). Al liëia le sonn da re dles trombëtes y pauches cun le re di stromënc: l’orghe. Cun sü stromënc barocs portará dant i musizisć composiziuns virtuoses y da festa de J. S. Bach, G. F. Händel, P. Franceschini, Domenico Gabrielli y G. P. Telemann.

Alma Mahler al zënter
L’artista y musizista Alma Mahler é la protagonista tl program dl conzert de Badiamusica ai 28 d’agost dales 21:00 a Corvara
Na colaboraziun musicala lungia liëia les musizistes Erika Mussner (usc) y Judith Piccolruaz (clavier); l’amur por le ’Kunstlied’ é de gran importanza por le duo. Al gnará porté dant Lieder de Alma Mahler, mo ince de d’atri componisć che é stá de gran valüta tla vita de Mahler. Te n dialogh danter musiga y tesć, portá dant da Genny Ploner, gnarál cunté te na manira plajora dla vita, dles operes y dl destin de Alma Mahler, che á influenzé y ispiré l’ert te vigni manira.

Cuarta festa dl jol a Albions ai 27 de agost
N cunlaurazion deberieda cun i Destudafuech de Albions, mët la Grupa Modelisć Gherdëina Curnacins inò a jì la festa tradiziunela dl jol che vën fata uni doi ani
Doi lies, una de Gherdëina y una dl luech de Albions, ulache i Curnacins à nce si pra per l jol a motor, lëura deberieda, per fe garaté na bela festa. Chëst ann nvieia i Curnacins y i Destudafeuch de Albions duc y dutes a unì a ti cialé ai modiei che i modelisć a metù adum ti ultimi doi ani. Dessot y dessëura udëis fotografies di ultimi trëi iedesc che l ie stat la festa, ulache n vëija che duc a laurà pea cun n drë’ ardimënt, nsci che a duc ti sàl for scialdi bel a unì a cialé y a fé festa.
Ai 27 de agost saràl da udëi modiei sun fonz y tl aier. Da maië y da bever ne manceràl sambën ënghenó! Sun Vo che unieis se ncunforta la Grupa de Modelisć Gherdëina Curnacins!

”Emoziuns sö alalt”
La seria de referac cun i alpinisć conesciüs a livel internazional vá inant ince d’agost y setëmber
Le mercui ai 23 d’agost podarán ascuté sö tl salf dles manifestaziuns a La Ila les esperiënzes de Simone Moro, l’alpinist conesciü a livel mondial. Tl referat dal titul ”Happy Winter” cuntel dles aventöres olache al á arjunt d’invern cater pizes sura i 8.000 m. I fredesc Riegler sará spo protagonisć dl’incuntada di 29 d’agost a Corvara. Tla serada - por talian y todësch - cuntai de sües prömes arpizades tles Dolomites, cina ales spediziuns de chisc ultims agn. Intrami i apuntamënc mët man dales 21:15.
De setëmber gnarál tigní trëi referac por todësch, che mët man dales 21:00. Ai 4/09 a La Ila él le mountainbiker Harald Philipp che mostra video y fotos de sciöche al arjunj les pizes cun süa roda, fora por trus strënc y ri da jí. Ai 6/09 a Calfosch él spo Gela Allmann che cunta de süa varijun, do ester tomada por 800 m tratan n sorvisc fotografich. L’ultim apuntamënt sará cun l’alpinist Hansjörg Auer, ai 12/09 a Corvara. Le de do gnarál ince organisé na escurjiun cun ël sön Sassongher, che pëia demez da Corvara dales 9:00.

”Jöbia de Corvara” cun i artisć de strada
En jöbia ai 24 de agost vëgnel tigní l’ultim apuntamënt dla “Jöbia de Corvara” por chësta sajun da d’isté
Pro la ”Jöbia de Corvara” ai 24 d’agost sarál deplü artisć de strada che porta dant sü spetacui y esibiziuns. Dales 17:15 ales 19:15 y do cëna dales 21:15 ales 22:00 podarán amiré le zircus brasilian y de vigni sort de acrobazies tl’aria, sciöche ince l’ert de strada di graffiti adöm a deplü artisć. 
La band ”Pamstidd’n Kings” fistidiará dl intratignimënt musical fora por la strada prinzipala dl paisc, che vëgn stlüta al trafich dales 17:00 ales 22:30.

Referat sön l’ander dl Cenote
Le descuridú dl maiú ander dles Dolomites, le prof. Francesco Sauro, tëgn n referat a San Ciascian, incö ai 18 d’agost
Le Museum Ladin Ursus ladinicus a San Ciascian inviëia al referat dl prof. Francesco Sauro, che baiará dla descurida demorvëia dl ander dl Cenote, ciafé sö danter Piz de Conturines y Piz de Lavarela. Ara se trata dl maiú ander dles Dolomites, 287 metri sot, cun n funz feter tan gran co n ciamp dal palé y olache al ess lerch na catedrala.
Le referat vëgn tigní incö vëndres ai 18 d’agost dales 21.15, tla Ciasa J.B. Rinna a San Ciascian, olache an podará dedô ince vijité la mostra ”Le monn demorvëia di andri dles Dolomites”, che restará daverta cina ai 10 d’otober.

Saus dl bosch
En mertesc ai 22 d’agost vëgnel metü da jí le secundo apuntamënt cun la manifestaziun gastronomica ”Saus dl bosch”, tla cornisc particolara dl parch dai tiers a Calfosch
Önesc strotöres dl post, anter chisc la ütia Edelweiss adöm al hotel Jägerhof, le Berghotel Ladinia, le bar Altrove, i hotí Gran Ciasa y Panorama, la pension Garden, i restoranc Stria, Salvan, Mesoles y Matthiaskeller arjigna ca de vigni sort de spezialités gastronomiches locales sciöche fortaies, tutres, cütles da pom, costëis cun polënta, derzades cun fonguns, hamburger bio y strudl. Ai 22 d’agost dales 11:30 ales 17:00. Le duo Sepl y Hubert y le grup JEMM fistidiëia dl intratignimënt musical tratan le domisdé. Te chësta ocajiun á i amanc dla munt y dla gastronomia la poscibilité da passé n domisdé n pü’ atramënter, fajon na roda fora por le parch dai tiers y ciarcian les spezialités gastronomiches pro les piceres üties. Por i plü pici sarál dales 15:00 inant animaziun cun le clown Tino, che fej de vigni sort de strinëc y matades.