Manifestazions atuales speziales

Data

09 de fauré 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 9 de fauré
Vivanda ntan l'ena de Carnescià a S. Cristina!
N dumënia, lunesc y merdi, ai 11, 12 y 13 de fauré
Dumënia ai 11 de fauré: Festa cun l'afa Bobby sun la plaza dala dlacia tl zënter Iman a S. Cristina. Unide a jì cun i jadins dala 3 domesdì inant, a balé y s'la rì cun Bobby y a maië de bon crafons. N puderà se mpresté ora i jadins debant.
Lunesc ai 12 de fauré: Duc i mutons puderà se lascé depënjer su l mus coche i à gën. Chësc tla Lia dl Turism da mesa la 3 nchin la 5 domesdì.
Merdi ai 13 de fauré: Defileda n mascra tres l luech deberieda cun i maestri de schi y la Böhmische, da n cher' passà la 5 domesdì. Da dedò Skishow n mascra cun la Scola de Schi de S. Cristina sun l purtoi dai schi sun Plan da Tieja, ulache l sarà na blòta festa cun crafons y buandes bona ciaudes. Ve aspiton duc n mascra!

Prim Turnoi Ladin Elite de hockey
Cun l HC Gherdëina, i Fassa Falcons y l SG Cortina
L se trata de n turnoi ntan la pausa de fauré, per fé alenamënt y nce per fé unì adalerch la jënt ti stadi, n turnoi do la rata pitl ma mpo scialdi mpurtant, ajache ala fin, chiche vënc ie pona l campion ladin nchin ala proscima edizion: na pitla gran legrëza che n ne uel nia se lascé tò. Da tlo l nvit de unì a ti cialé ala partides, sambën n cësa, ma ciuldì pa no, jan nce tla valedes ujines.
La prima partida danter l Fascia y l Gherdëina ie bele stata y chëstes ie la proscimes for cun la scuadra che fej n cësa danora:
vënderdi 9.2. dala 20.30 SG Cortina contra HC Gherdëina; n dumënia 11.2. dala 20.30 HC Gherdëina contra Fassa Falcons; n juebia ai 15.2. dala 21.00 Fassa Falcons contra SG Cortina; n sada ai 17.2. dala 20.30 SG Cortina contra Fassa Falcons; n lunesc ai 19.2. dala 20.30 HC Gherdëina contra SG Cortina.

Gnide al "Carlascé d'Al Plan"!
Döta la jënt - cun o zënza maschera - é bel inviada da gní ala defilada por la festa plü matorina dl ann. An s'incunta en mertesc ai 13 de forá a Al Plan de Mareo
En mertesc ai 13 de forá vëgnel indô dassënn festejé le Carlascé a Al Plan de Mareo. Döta la jënt, cun o zënza maschera, é inviada da gní a fá para pro la gran defilada, tres la strada prinzipala. Chi dales mascheres s'abina dales 2 domisdé tla plaza dan la nodadoia curida, olache an ciafa la zetola de partezipaziun ala defilada. La defilada pëia spo ia dales 14.30, por rové danter n gröm de corusc y buna löna cina sön plaza dl paiun, tl zënter de paîsc, olache al sará la premiaziun dles plü beles mascheres, cun cornisc musicala y sambëgn te cialt, vin cöt y ciacoles da carlascé por düc.

Festa de Carnescé a Corvara
En mertesc ai 13 de forá vëgnel tigní jödapé dla pista dl Col Alt a Corvara la gran festa da Carnescé por pici y gragn
La festa mët man dales 14:30 cun na picera defilada de mascheres sön pista, a chëra che düc é dër bel inviá da tó pert. Na juria premiará la maschera plü bela y originala. I mituns á ince la poscibilité da se lascé depënje sö le müs. Dedô vëgnel metü da jí l'acrobatic show adöm cun i maestri dla scora de schi da Corvara-Ladinia y le Freestyle Team Pirates Alta Badia, che mostra acrobazies y salc sön i schi y la brëia. Al ne manciará sambëgn nia musiga cun DJ Ady, n bun té cialt y d'atres boandes y duciaries por festejé le Carnescé.

20 agn "Crazy Snow Show" y Scora de Schi Dolomites - La storia dla scora de schi y spetacul ince cun iac dala nëi
Le spetacul sön la pista „Doninz-Gardenacia" tl zënter da La Ila gnará desfiré en jöbia ai 15 de forá dales 21.00. Söl program ince n spetacul cun iac dala nëi y la desmostraziun tecnica dles disciplines sön i schi; cun dötes les tutes da maester de schi che an á albü te chisc ultims 20 agn
La "Crazy Snow Show" organisada dala Scora de Schi y Snowboard Dolomites, cun la colaboraziun dl'Assoziazun Turistica Badia, é oramai rovada a süa 20. ediziun. I 75 maestri de schi jogn, dinamics y apascioná pitará schiades sincronisades de livel alt, y presentará les ultimes novités che reverda schi, brëia, telemark, schialpinism y schi da paslunch. En chësc ann vëgnel cunté la storia dla Scora de Schi Dolomites, vigni ann cun süa tuta da maester de schi, che á plü iadi baraté corú. Al ne manciará nia desmostraziuns sön le svilup dl jí cui schi tla storia. Lapró podará le publich odëi esibiziuns spetacolares sön schi, snowboard y telemark da pert dl grup de jogn da chiló, "The Pirates", che s'á cun sües acorbazies oramai fat n inom a livel nazional. Sciöche l'ann passé, ne manciarál sambëgn gnanca iniann n spetacul cun 3 iac dala nëi dla sozieté di implanc Gardenacia, olache al gnará mostré le laur y förtl cun chëstes mascins.
Al ghest che vëgn en vacanza d'invern tl'Alta Badia ón lapró ti dé na cercia dl isté. I maestri de schi sará porchël da odëi ince te na stafeta cun la roda, ince cun les Fat bike, y döt söla nëi. Na morvëia è spo le schiadú plü alt y chël plü bas dl monn, y le publich po se confeortè a tröpes d'atres sorpreses, acompagnades da n spetacul de löms y musiga, y da n bun gote de vin cöt por düc. Por informaziuns plü menüdes pon jí sön le sit www.skidolomites.it, o telefoné al nr. 329 5914008.

Gara de liöses da fëgn a ostacui
En lönesc ai 19 de forá y ai 19 de merz vëgnel metü da jí a Calfosch la gara de liöses da fëgn
La gara vëgn tignida jödapé dla pista "Colfosco", dlungia la sënta nöia dla scora de schi, che an pó arjunje dala plaza da parché dl ofize schipass. Dales 21.00 inant sarál de plü pérs che se mosöra cun na liösa da fëgn jö por n percurs a ostacui. Les liöses da fëgn mëss avëi n linzó da fëgn lassura, che vëgn scemai ince metü a desposiziun y i partezipanc é periá da se vistí da zacan. I partezipanc ala gara s'incunta dales 20:15 y al ti gnará splighé le percurs. Les iscriziuns por le pröm apuntamënt o por tó pert a intrames les gares vëgn tutes sö tla scora de schi da Calfosch (0471/836218) cina la sabeda ai 17 de forá.
I maestri dla scora fajará n rait a val cun i chentli y al ne manciará sambëgn nia i jors cun le parapënd y i deltaplans y tröp intratignimënt musical. En chësc ann sarál ince i studënc dla scora dla hotelaria da Bornech che presentëia y dá fora sü produc. Do la gara dles liöses sarále la poscibilité da mangé na pasta tl bistrot dla scora. Te chësta ocajiun pón ince jí a ti ciaré ala sënta nöia dla scora de schi.