Manifestazions atuales speziales

Data

30 de merz 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 30 de merz
"Ti dé tëmp al tëmp"
N proiet di Cunsëies de Furmazion de Gherdëina a livel de valeda
La tle per miuré la cualità de vita tlo da nëus ie perdrët se tò dl'aurela per zidlé miec l tëmp. Perchël à i Cunsëies de Furmazion de Gherdëina deberieda cun d'autra lies metù ju n program de manifestazions y scumenciadives propi sun l argument "Ti dé tëmp al tëmp." Pità uniràl perchël via per dut l ann scumenciadives de furmazion o sensiblisazion (referac, cursc, ma nce ntervistes, performances, trasmiscions, forums, "flash mobs", teater y n.i.).
"Der Besuch"
La prima manifestazion sarà n sada ai 7 de auril 2018 dala 3 domesdì te bibliotech "Tresl Gruber" a S. Cristina. Irene Moroder (test) y Georg Malfertheiner (mujiga) mustrerà l teater "Der Besuch". Nviei ie i mutons y la mutans cun si laves y nëinesc, davia che l pez trata propi de chësta doi generazions.
"Se duné tëmp"
Ai 12 de auril 2018 jiràla pona inant cun n referat de Simone Tarneller dl Terra X Institute de Persenon. „Wer innehält bekommt von Innen Halt!" ie n dit de Laotse y nce l argumënt zentrel dla sëira. Tla vita d'al didancuei iel for de majera mpurtanza a viver l mumënt te si cumplessività.
Co pòssen pa ntegré l abadé, l dé arta te nosta vita da uni di y co tàchel pa adum cun n'economia sustenibla y l svilup de cumpetënzes emoziuneles? Tres la sëira menerà Andreas Delago. Nteressei possa unì dala 8 da sëira tla "Pitla Sala" dla Cësa de Cultura de Urtijëi. Che mët a jì ie la Lia per Natura y Usanzes.
Nfurmazions n cont dl proiet "Ti dé tëmp al tëmp" iel da giaté sun www.manif.it y sun www.facebook.com/furmaziongherdeina sciche nce sun de plu stampac.

Sëira a fin de bën per i mutons de Kalkutta
N vënderdi ai 13.4. dala 20.00 tla cësa de cultura a Urtijëi
L Teater de Urtijëi mët a jì chësta sëira, ulache la va de ti judé ai mutons dl'India, che ie di per di sun i mudli de maroca a se crì da maië y da se tré l viver. Ntan la sëira saràl nce Petra Theiner, dla lia „Südtiroler Ärzte für die Welt", che ie nstëssa stata sun l post a judé y saverà da cunté de si esperienzes, lascian udëi nce n video.
La lia dl Teater de Urtijëi uel ti judé a abiné adum dunfiertes y nsci se àn mpensà de mëter a jì leprò nce na blòta sëira, cun n doi sketches, n pitl teater di mutons y na grupa de jëuni che cianterà n valguna ciantes. Cun chësta sëira deletëura y nfurmativa spéren de abiné adum n blòt scioldo, che Petra purterà pona stëssa tl'India.
La ntreda ie coche dit debant, ma n sënt gra bele danora per uni bonaman.

"Mare Nostrum" na speranza tl'ega
Giaurida dla mostra-proiet de Gregor Pruggern vënderdi ai 13.4. dala 19.00 a Sëuc
Te nosc Mer Mediteran suzédel una dla majera tragedies de nosc tëmps, ulache milesc y milesc de persones ie arnaghedes y arnaghea mé per ulëi na miëur' vita.
N proiet cun 80 lëures, tla nudadoia dl Hotel Nature Residenz Dolomitenhof a Sëuc, streda Hauenstein 3.
Duc ie nviei ala giaurida n vënderdi ai 13 de auril dala 7 da sëira y a ti cialé ala mostra-proiet che ie da udëi nchin ai 22.4. uni di dala 17.00 nchin la 19.30.

"Les sons des fleurs" cun Eva y Valeria
Cunzert ai 8 de auril te Tublà da Nives
L'ansciuda se fej unitant bele sentì y se lascia nce udëi y perchël passenea ite drët bën l cunzert „Les sons des fleurs" che la doi jëunes Valeria Mussner (flaut traviers) y Eva Vinatzer (tlavier) à mparà ite. Sun l program iel pec de cumponisć franzëusc dl 19ejim centené sciche Ravel, Saint Saëns, Fauré y Bizet.
L cunzert sarà n dumënia ai 8 de auril da mesa la sies da sëira (17.30) tl zënter culturel "Tublà da Nives" te Sëlva; la ntreda ie debant. Tublà da Nives. Tlo se anconta cultura!

Garejeda soziela dl Schi Club Gherdëina
N Lunesc de Pasca ai 2.4. dala 9.30 inant te Val
Coche da tradizion mët l Schi Club Gherdëina a jì n Lunesc de Pasca la garejeda soziela per duc i apasciunei de sport, atlec, genitores y simpatisanc. Chëst ann la fajeràn te Val, cun la garejeda de slalom lerch sun l purtoi Cir che scumencerà dala 9.30 y na garejeda de pudejé che meterà man dala 10.00.
Duc ie nviei a fé pea y a se scrì ite, nchin duman sada ai 31.3. dala 18.00 tla Scola de Schi de Urtijëi, S. Cristina o Sëlva per l slalom. Per la garejeda de pudejé àn mé drë de vester iló mpue dan che la scumëncia.
L unirà fat truepa categuries y la festa de premiazion sarà do la garejedes ntëur la 3 domesdì tla utia Ciampac te Val.

"Die fünfte Himmelsrichtung"
Film de Martin Prinoth da udëi ai 11. y ai 13.4. pra l Filmfestival de Bulsan
Martin Prinoth à purtà si film nchin sun l fonz dl mer, iló ulache l ie l sas primitif, iló ulache si jurman Georg fova jit sot tl 2009 canche l fova tumà ju cun l julier tl Atlantich. Georg fova n mut tëut su y nce si fra Markus. I fova nasciui tl Brasil y ie bele da pitli ruvei te n luech tla Dolomites, zënza savëi perdrët da ulache i vën ca y chiche ie la oma che i à metui al mond. Cun gran sensibltà y abadan a dut cant va l film "Die fünfte Himmelsrichtung" a crì do la ravises y l'identità de si prutagonisć – da Südtirol tl Brasil y ala fin nchin tl plu sot dl mer.
L film de Martin Prinoth dura 78 menuc y ie da udëi ai 11.4. dala 19.45 tl Capitol1 y ai 13.4. dala 14.30 tl Capitol2 for a Bulsan. Martin Prinoth ie de Urtijëi y viv a Hamburg, l fej films, ie cameraman y produtëur. Nfurmazions n cont dl festival iel da giaté sot a www.filmfestival.bz.it, y dl film sot a www.die-fuenfte-himmelsrichtung.com

"Super Jump" ginastica sun trampolin
L vën tenì cursc a S. Cristina da auril inant
L "Super Jump" ie na sort de ginastica che n pratichea sun n trampolin, sun batuda dla mujiga y cun chësta atività fisica renfurzéien l corp, i mustli, i osc, la fej bon per la zirculazion, l sistem linfatich y nce per cumbater la zelulitis.
Dai 4 de auril inant vëniel pità cursc de "Super Jump" tla palestra de S. Cristina:
per granc uni lunesc (d'auril bele dut plën), mierculdi y vënderdi dala 20.00 ala 21.00,
per jëuni y sculeies dla mesanes uni vënderdi dala 18.30 ala 19.30.
Per nfurmazions y per se lascé nuté su pòssen cherdé su Lucia Vian Karbon, al 334 3943124.

Diego Cappadozzi prejenta si studium tl Museion
Sëis duc y dutes nviei al evënt n mierculdi ai 11.4. dala 18.30 nchin la 21.00 tl Museion a Bulsan
Ai 11 de auril prejënterà Diego Cappadozzi l mond dl stude y dla vita a Minca. L jëunn de Urtijëi studieia management dla mujiga y ulëssa nvië de cuer duc i sculeies y la sculées dla scoles autes, nce chëi che ne fej mo nia l ejam de maduranza, ma nce nteressei ai media, al jurnalism y al management de evënc y dl turism, a fé pea pra chësta blòta sëira. Unì a chësta sëira pudëssa ti giaurì plu portes ai jëuni che chier na furmazion plu pratica, moderna y atuela, adresseda al daunì.

"L plu mpurtant tla vita"
Referat cun la misciunera dl'Uganda Maria Prean n merdi ai 10.4. dala 20.00 te sala de Chemun a S. Cristina
La misciunera nasciuda a Dispruch tl 1939, bele bëndebò cunesciuda, cunterà te si referat dal titul „Das Wichtigste im Leben" de si esperienzes de vita ora per l mond y de si filosofia de vita de vester bona de tò dut cun lesirëza y humor.
Ëila viv da 20 ani incà tl'Uganda, ulache la à metù su trëi zentri misciuneres, ti dajan la puscibltà de jì a scola a 12.000 mutons y da lëur a truepa jënt.
Se ncunferton sun Vosc uni.

Cunzert da d'ansciuda dla Mujiga de Urtijëi
N dumënia ai 8.4. dala 10 danmesdì te Cësa de Cultura de Urtijëi
Cun l cunzert da d'ansciuda scumëncia la Mujiga de Urtijëi si atività per l ann 2018. L dirighënt Egon Lardschneider à cris ora nce chëst ann n program drët nteressant. I musicontri se ncunforta a suné dant i pec mparei ite, danter l auter la Ouvertüre cunesciuda de Franz von Suppé "Ein Morgen, ein Mittag, ein Abend in Wien", la polka "Mein bester Freund" y l "Maxglaner Zigeunermarsch Reloaded". La segonda pert scumëncia cun l pez "Flight" dl cumponist dla Svizra Mario Bürki. Maximilian Oberhollenzer sunerà la serenata "Share My Yoke", n solo per cornet, per finé via cun la marcia "Weiß - Blau" de Pauli Kiem, che ie unida laureda ora per la Mujiga de Urtijëi dal cumëmber Jonas Holzknecht.
La Mujiga de Urtijëi se ncunforta sun Vosc unì y mbincia n bon scuté su.

N di da no desmincë
N sada ai 31 de merz toma l aniverser de n avenimënt scialdi mpurtant, suzedù dan ades 2000 ani: la mort de Gejù
Ntan l'ultima cëina ova Gejù dit a si apostuli de se lecurdé de si mort, dijan: "Fajëde chësc per mi lecort!" (Luca 22:19 Bibia: Nuef Testamënt de Sn. Cristl Moroder). Per tenì ite chësc cumandamënt, Ve nvieia i Testemonesc de Iehova, sciche uni ann, ala Cumemorazion dla mort de Gejù.
Chëst ann unirà la zelebrazion tenida n sada ai 31 de merz dala 19.30 tla pitla sala dla Cësa de Cultura a Urtijëi.
Sëis duc bënunii, sambën nce sce ne sëis nia Testemonesc de Iehova. La ntreda ie debant y l ne vën damandà deguna dunfiertes.
Pudëis giapé nfurmazions sëuraprò ti cialan al video "Lecurdon la mort de Gejù", da udëi sun la plata internet www.jw.org/lld/publicazions/video.

Ancunteda per duc i pasciunei de telemark
N sada ai 31.3. se anconta duc i pasciunei dl stil telemark te Sëlva per passé n di deberieda sun i schi
N se urta dala 9.30 danmesdì tla utia Pramulin, daujin ala stazion dla furnadoia de Col Raiser, per jì pona deberieda cun i schi da telemark. Bel fóssel nce sce n se tulëssa la bria de mparé ite de n valguni na coreografia sun i schi da purté dant n chël di y sce n se furnësc su cun l guant tradiziunel da telemark dajëssel ca n cheder drët tipich de chisc tëmps de jì cun i schi y n fajëssa scialdi bela paruda.
La coreografia plu garateda y nce l furnimënt tradiziunel plu bel unirà premiei dopro ntan n blòt sté n cumpania cun mujiga te utia Pramulin.
Duc i nteressei, chëi che se dà ju cun chësc stil de jì cun i schi y nce chëi che ulëssa purvé n iede, ie drët bel nviei a fé pea chësc di, che sarà dessegur na bela ucajion per se ancunté danter persones dala medema pascion.

Roda de Col Toronn te Fanes
En domënia ai 8 d'aurí vëgnel tigní la 31ejima ediziun dla Roda de Col Toronn
I concorënc, partis sö te scuadres da trëi porsones, piará ia düc deboriada dales 9.30 dan la Ücia Lavarella, olache al sará incër les 15.00 ince la premiaziun. Do la premiaziun sarál na ola dla fortüna por düc i presënc. Les iscriziuns ala gara vëgn tutes sö tl ofize dl'Assoziaziun Turistica d'Al Plan al 0474/501037 o tres fax al 0474/501566 dales 9.00 ales 12.00 y dales 15.00 ales 18.00, o ince tres e-mail a info@sanvigilio.com, cina al vëndres ai 6 d'aurí dales 18.00. La cuota d'iscriziun é de 40,00€ por scuadra, da paié ite al start. Por les iscriziuns nöies che vëgn fates al start él odü danfora na cuota de 45,00€.

1.Friday.live.session@SaJ.un a La Ila
Cuarto conzert de chësc ann, cun Til Tanga y Perin&Barbarossa
Ai 6 d'aurí dales 20:45 éra indô tan inant. Tl Zënter dla Cultura SaJ.un a La Ila vëgnel organisé le cuarto conzert cun musiga dal ví. En chësc iade sarál da aldí Til Tanga y Perin&Barbarossa.
Til Tanga: scebëgn che le ciantautur de Puster é gnü influenzé dal gran musizist country Jonny Cash, él ste bun da svilupé so stil, cun chël che al porta para n sonn acustich plü dür. Cun gran savëi él bun da combiné le stil folk con rock acustich. Le resultat é süa produziun atuala "Lonely Man", cun chëra che al é rodé fora por cités desco Brünn, Praga, Viena, Dresden y Berlin. Sëgn él indô gnü derevers y s'acompagnará fora por la serada cun sonns y cianties daldöt nöies.

Cursc de fitness a La Ila
Al gnará pité n curs de "MTB Strike" y n curs de M.E.T - Metabolic Exercise Training
Dai 10 d'aurí inant, vëgnel metü da jí dui cursc de fitness, tla gran palestra a La Ila, adöm cun l'istruturia Serena De March. I cursc vëgn tignis tres de mertesc, por 8 iadi indöt. Les iscriziuns vëgn tutes sö pro la pröma incuntada (mertesc 10 d'aurí) diretamënter te palestra. Informaziuns ciafon pro Serena al 349/0065815.
19:30 - 20:30: MTB Strike
Alenamënt por la balanza dla postöra cun eserzizi funzionai che laora sön la mobilité. Dediché ala reprogramaziun dla postöra tres eserzizi cun corp lëde - sides en pe, che sön dui cater o sentá.
20:30 - 21:30: Metabolic exercise training
Alenamënt cun le step cardio y ton che á faziun sön le metabolism di grasc. Al tol ite na pert de laur cardiovascolar y de tonificaziun a corp lëde o cun l'aiüt de de pici injins.

Aste vöia da porvé le schialpinism?

I jogn dla scuadra de Badiasport ti pîta ai jonins sura 12 agn la ocajiun da porvé fora chësc sport
Este n jonn o na jona cun plü de 12 agn y cun l'interes da porvé chësc sport? I jogn dla scuadra de Badiasport te mostra la tecnica cun atrezadöra da gara sön n pice percurs. I s'incuntun en lönesc ai 2 d'aurí dales 15 pro la staziun a val dl implant portamunt de Gardenacia. Mënesse na mail i dis denant spo t'arjignunse ca cialzá cun to numer - posta@badiasport.org.

The Ski Carousel Vintage Party
Por stlü jö la sajun da d'invern, vëgnel ince chësc ann metü da jí tl'Alta Badia na festa tl stil rétro, tl fin dl'edema dai 6 ai 8 d'aurí
La festa mët man le vëndres cun n aperitif vintage tl local Iceberg Lounge Bar a Corvara. La sabeda pîta les üties partezipantes de vigni sort de taîs tradizionai y pro les üties Piz Boé Alpine Lounge, Crëp de Munt y La Marmotta sarál ince musiga dal ví. La sabeda sëra dales 20.00 inant vëgnel tigní na festa tl stil rétro tl restorant La Bercia a La Ila. La domënia dales 10:00 ales 13:00 podará i schiadus se mosoré te na gara dai schi vintage sön la pista La Para. Vignun pó tó pert a chësta competiziun a condiziun che i schi ne sides nia carving. An pó se scrí ite diretamënter le de dla gara pro les staziuns di lifc de Piz La Ila, Boé y La Para. La premiaziun gnará fata dales 16:00 tla ütia I Tablá. La Ski Carousel Vintage Party se stlüj jö tl'aprés ski L'Murin a Corvara. Ia por le de sarál musiga dal ví tles üties che tol pert ala manifestaziun y en chësc ann gnarál saludé l'implant Roby, che gnará amoderné por la proscima sajun da d'invern. Düc é dër bel inviá da tó pert a chësta manifestaziun cun guant y echipamënt da inlaôta. L'evënt vëgn organisé da Alta Badia Brand, en colaboraziun cun le consorz di implanc Skicarosello.

Musiga por i pici
Le Consëi Cultural tl Comun de Badia mët da jí n curs de musiga por de pici mituns y mitans danter n ann y mez y dui agn
Adöm cun n genitur, o ince cun trami, pó i pici imparé da cianté, da soné, da balé y da se möie do n ritm, ci che pó i daidé svilupé sües capazités musicales.
Le curs vëgn tigní dala musizista Esther Videsott da Picolin y mët man en mercui ai 4 d'aurí dales 9.00 ales 9.50 danmisdé, tl Zënter Ergobando a La Ila. Dedô gnarál spo tigní n iade al'edema por indöt 8 iadi.
Por deplü informaziuns y por se scrí ite pón cherdé sö Chiara al numer 338/8825515.

La Giatiscima 2018
L'Uniun Sport La Ila y la Scola de Schi da La Ila inviëia düc chi da La Ila ala Giatiscima 2018 en sabeda ai 7 d'aurí, en recordanza de Edo Agreiter y Sepl Rottonara
La Giatiscima 2018 mët men cun l'incuntada dales pels dales 7.30. Pié ia vëgnel jödapé dl lift de Gardenacia por rové sö Plan de Sponata. La gara di schi mët spo man dales 9.30 tres sön la pista de Gardenacia. Do la gara é düc i scric ite inviá tl Hotel Ladinia a marëna, ala premiaziun y ala trata dla ola dla fortüna. Da davagné sarál n schipas Alta Badia por la sajun 2018/2019 n bun pér de schi, y tröc d'atri de bi pesć.
Düc chi da La Ila, che ne fej nia la gara de schi é dër bel inviá da se scrí ite por podëi tó pert ala ola dla fortüna y ala merëna tl Hotel Ladinia. Les iscriziuns vëgn tutes sö pro la Scola de Schi da La Ila (0471/847258) cina en vëndres ai 6 d'aurí anter les 12.00. Informaziuns plü menüdes ciafon ince sot ala plata internet www.uslaila.it.

Fá la guern a ciasa - 5 serades cun esperc
I feji le guern, dëidi, me sinti stancia... mo al me dá tröp! "Familiars fej le guern a ciasa": sot a chësc titul vëgnel metü da jí na linia de serades tl Raiun Sozial Val Badia a Picolin, dai 9 ai 23 d'aurí
Ti fá le guern a familiars é de por de na gran desfida, che se damana de gran energies, paziënza y perseveranza. De un n vers fossel dërt da porvé da socodí la porsona che á debojëgn de assistënza por la fá sté plü saurí. Dl ater vers él propi le fá le guern val' che arichësc dër a livel personal, che dá sodesfaziun y che dá la poscibilité de conësce sot a n gröm d'atri aspec na porsona cun chëra che an á vit agn alalungia. Y implü él important da tó sö le sostëgn che vëgn pité da d'atri familiars, istituziuns y sorvisc. Porchël vëgnel organisé dala Portina por l'assistënza y la cura 5 sëres cun referënc esperc sön chëstes tematiches.
Lönesc, 9 de aurí dales 20.00
Presentaziun di sorvisc sanitars y soziai che dëida fá le guern. Informaziuns sön i sorvisc, i sostëgns desvalis y sön les portines por porsones assistides cun le Sorvisc de Assistënza infermieristica, l'Assistënza a ciasa, le Team de valutaziun por l'incadramënt (Pflegesicherung) y la Portina por l'assistënza y la cura
Mercui, 11 de aurí dales 20.00
"Co pón pa prevení les tomades?", cun Valeria Moling y Karin Tavella, infermieres.
Lönesc, 16 de aurí dales 20.00
"Le bot al ciorvel (Schlaganfall) - Sintoms, terapia y prevenziun", cun le dot. Gregorio Rungger, neurologh tl spitol da Bornech.
Mercui, 18 de aurí dales 20.00
"Angst und Depression im Alter - Tëmes y depresciun tla terza eté", cun le dot. Anton Huber, psicologh tl spitol da Bornech
Lönesc, 23 de aurí dales 20.00
"Chësc pói, chësc dessi mangé, chësc me fej bun - Alimentaziun por jënt atempada", cun Silvia Pitscheider, dietologa.
Les 5 sëres é ponsades sciöche curs por n grup stlüt, porchël él important da tó pert a dötes les incuntades, le cost é de 20,00 euro a porsona. Prëibel prenotésse anter i 6 d'aurí al 0474/524552.

Introduziun al monn dl video
Te n curs de cater sëres án la poscibilité da imparé val' tecniches da tó jö y taié pro n video cun programs debann
Tröpes porsones fej jö cun le fonin o cun la camera, mo püces se tol la bria da taié adöm de pici videos. Paolo Vinati ves portará dant tecniches da tó jö y da taié n video te na manira scëmpla y plajora, anuzan programs debann.
Le curs vëgn tigní 4 serës indöt: le mercui ai 11 d'aurí, le mertesc, ai 17 y ai 24 d'aurí, y le lönesc ai 30 d'aurí. I partezipanc s'incunta tla biblioteca da La Ila dales 20.30. Organisaziun: Consëi de Formaziun de Badia.

"Social Media Marketing" por Facebook y Instagram
A La Ila n curs de basa por imparé co s'armöie sön i "social media", por arjunje i mius resultac
I "social network" á fat crësce cotan les poscibilités da comuniché danter aziëndes y consumadus y la domanda che vëgn fata plü gonot é: "Co feji pa da fá rové mia aziënda sön i ‚social'?". Dai profii ales "plates fan", dai video ai retrac: tres conversaziuns y contignüs che vá dl dër vers pón cherié oportunités comerziales nöies y slarié fora so marcé.
Le "social media marketing" se crüzia, defat, da promöie y svilupé la presënza de marches, produc y sorvisc sön i "social media". Da gestí chisc canai adoron deplü competënzes. An mëss savëi da fá n plan strategich, da lauré fora na linia editoriala, da trá ite y da comuniché cun i cliënc y ala fin mësson ince ester bogn da fá n'analisa di resultac.
Le curs vëgn tigní en mertesc ai 10 aurí dales 20.00, tla scora mesana da La Ila, cun la referënta Alessia Sorá. Le curs por progredis gnará tigní la jöbia ai 3 de ma. Organisaziun: Consëi de Formaziun dl Comun de Badia.