Manifestazions atuales

Data

13 de auril 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 13 de auril
Radio y Televijion
Programazion ladina sul canal 642 e TV Ladina
Sul canal de la mendranzes linguistiches TML (642) ogne sabeda taca la neva programazion ladina de la setemèna, organisèda te bloches de zirca 3 ores che se enterza a la programazion per mochen e cimbro e la pea via con chisc oraries: de sabeda h. 7.00 e 17.15; de domenia h. 10.30 e 21.00; de lunesc e de jebia h. 14.00 e 21.00; de mèrtesc e vender h. 10.30 e 17.30; de mercol h. 7.00 e 14.00.
Duc i dis da les 7.00 per mesora l'é programes per ladin col TG Ladin, l program istituzionèl del Comun general "Da Fascia en curt" e dapò i spezièi curc da l'Aisciuda Ladina 2017 e la neves da La Usc di Ladins.
Da les 7.45 l'é l program per i bec con la contìes animèdes de Pororo e l Contacontìes per endrez de l'Istitut Cultural Ladin; da les 9.00 l'é i TG per ladin, mochen e cimbro; da les 12.30 l'é "Da Fascia en curt" e dò n curt spezièl sui bai di Schuhplattler e amò l TG Ladin; h. 14.00 l'é amò i spezièi curc su l'Aisciuda Ladina 2017 e dò i dessegnes animé de Pororo; h. 17.15 Contacontìes e Pororo e h. 19.30 endò TG Ladin, Contacontìes, Pororo, Da Fascia en curt e h. 22.30 amò l TG Ladin.
Te la trei ores de programazion duta fascèna coi oraries scric de sora se pel veder l rotocalch setemanèl Pedies, che va fora ogne setemèna con na trasmiscion neva: de sabeda h. 8.00 e 20.00, de domenia h. 12.00 e 22.00 e dapò fora per duta la setemèna; sobito dò l'é la rubrica de sport "Finalzil" e amò spezièi curc. Apede a dut chest l'é semper i programes culturai de "L Cianton de l'Istitut" e "L Cianton de la musega" e dapò l teater de "Vic e Ac", l program didatich per bec "Ocio" e de etres spezièi. La maor pèrt di programes é da poder veder ence su Youtube, TV Ladina. Se pel domanèr l palinsest per mail a l'Ofize servijes linguistics del Comun general (luciana.detomas@comungeneraldefascia.tn.it) o a l'Union di Ladins de Fascia (union@ladinsdefascia.it).
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
Merdi 17 de auril - Bilanz turistich de la sajon da d'invern.
Con Andrea Weiss. Moderazion de Anna Mazzel
La trasmiscion "DAI CRËPS DL SELA" ie da audì uni di dala 19:05 ala 19:30 sun la frecuënzes de RAI LADINIA
Vënderdi 13 de auril - Agorà: L svilup dla parola scrita (terza pert)
Chëst iede vëniel jit ite sun i aspec dla leteratura ladina y l vën analisà i vares dl scrì te nosta rujeneda, si svilup ma nce la dificultà de publiché y de manifesté si pensieres a n majer publich. Te studio iel la scienziata de letreatura ladina Rut Bernardi. Trasmiscion de Ivan Senoner.
Sada 14 de auril - Verité y baujia: les "fake news".
Program de Giuliana Dejaco.
Dumënia 15 de auril - Vita da zacan: Jì a rumé y desfé talpineies
D'ansciuda ora ne aspieten nia l'ëura che la nëif ntëur cësa se n vede y che l devënte tarënt. Nce zacan jiven a rumé y a desfé talpineies, ma l fova nce ëura de lavé su dut. De chisc argumënc dla vita da zacan nes conta velch Marta Senoner de Sëlva. Trasmiscion de Georg Mussner.
Lunesc 16 de auril - Bob Dylan – vita y opera (2)
Cun Lukas Plancker fajons l viac ala scuviërta de Bob Dylan, al secul Robert Allen Zimmerman, musizist, ciantautëur, poet, scritëur y scultëur american, che à lascià n sëni mpurtant tl mond artistich, ma nce tla realtà soziela y politica de nosc tëmp. Program de Leo Senoner.
Mierculdi 18 de auril - Nadia Cadrobbi, na volontadiva per la pèsc
Nadia Cadrobbi fesc pèrt de Operazione Colomba, l Corp No-Violent de la Sociazion Comunità Papa Giovanni XXIII che laora per la pèsc te la Colombia, Palestina, Libano e Albania aldò di prinzipies de equi-vejinanza, condivijion e no violenza. La volontadiva de Poza ne conta de coche la é do che la vif si esperienza con chest grop te l'Albania olache l'é na grieva situazion en cont de vendetes de sanch. Program de Anna Mazzel.
Juebia 19 de auril - Toponomastica Sëlva (cuarta pert)
L prufessëur Edgar Moroder, espert de storia y cultura ladina, nes conduj ala scuviërta dl'etimologia di ridli dl chemun de Sëlva. Do avëi mparà a cunëscer de plù ridli tl zënter y nce ntëurvia, muvons sën ora dl luech per ruvè a spieghè i toponims plu senificanc dla cuntreda ntëurvia, n pert nce samont y tla natura nia abiteda. Muvon de viers de nord, ma scumencion cun n ridl dl paesc cun n inuem nteressant, tan deplù che ncueicundì ne n'iel nët nia da udëi de chël che l inuem mpermët, Col da Lech. Program de Leo Senoner.
TELEVIJION
Merdi 17 de auril dala 20:50 - DF – dut Femenin
"#Me too/enge ge": doi paroles che te l'ultim an à soscedà na gran discuscion a livel mondièl. "Me too" l rua da l'America e l dèsc ousc a chela eles del spetacol che à denunzià regisc e patrons per ge aer scecà sessualmenter sul lurier. Chest fenomen no l tocia demò la gran steiles del chino, ju e ju te la scèla del prestije, se pel troèr caji de scecamenc sessuèi. Zeche che se à semper sconet via. N reportage de Olimpia Rasom, rencurà da Anna Mazzel, anter testimonianzes diretes e riflescions per n mudament culturèl. Produzion de Media Art.
Mierculdi 18 de auril dala 20:50 - Trail Spezial
A cura dla redazion.
Juebia 19 de auril dala 20:50 - Spëisa Ladina: Cajincí de poia cun ciajó grij y zigher
Tla trasmisciun de Spëisa Ladina adöm al cogo Roman Feichter dl hotel Grones a Urtijëi gnarál mostré co arjigné cajincí de poia cun ciajó grisc y zigher. Al sará da aldí ince val' coriosité sön la tradiziun ladina adöm a Carla Kasslatter, apascionada dla cultura ladina. Program de Zak Mairhofer, Stefan Ghedina y Concetta Bonaldi, a cura de Anna Mazzel.

Informaziuns plü menüdes söi programs radio y televijion de RAI Ladinia ciafon sön www.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Sozial
Deberieda: Balé y devertimënt cun "Nostro Spazio"
N vënderdi ai 20.4. dala 14.00 se ancuntons dan la Cësa de Paussa a Urtijëi y jiron a Bulsan a se devertì cun il "Nostro Spazio". "Deberieda" ie na grupa per se ancunté danter persones che à problems psichics o de sozialisazion cun ulenteres.
Per nfurmazions tel. 0471 798015. (Respunsabla dla manifestazion: Sandra Perathoner).
Reunion generala dla Comunanza Ladina a Bulsan
En mercui ai 18 de auril 2018 da les 17:00 (pruma convocazion) y da les 18:30 (seconda convocazion) vegniral metú a jí a Bulsan tla Ciasa di Ladins (strada Novacella 1 A) la senteda generala dla Comunanza Ladina. Duc é inviés!

Iadi, jites y escurscions

Schitour sön la Tofana de Rozes
La Lia da Munt Ladinia - Val Badia mët da jí la domënia ai 22 d'aurí na schitour sön la Tofana de Rozes. Ara é ria, por n tëmp da jí de 4,5 ores y n deslivel söpert de 1.500 metri. Informaziuns pro Werner Frenes al 339/7531604.

Avisc
Scontrèdes aministrador de sostegn
La PAT, l Comun general de Fascia, l'APSP e la Comunitèdes de val de Fiem e Cembra e autra sociazions, endreza n percors de aprofondiment su l'aministrador de sostegn. En mercol ai 18 de oril h. 20.30 te Comun general vegn rejonà de "L'aministrador de sostegn desche strument de protezion giuridica. L teritorie conta".
Reunion Generela dla Union di Ladins de Gherdëina
Ncuei vënderdi, 13.4. dala 20.00, tla Biblioteca Ladina „Anda Malia da Cudan" a Urtijëi tla Cësa di Ladins. Daujin ala relazions de atività, de program y di conc saràl nce la sëurandata dla uneranza a presidënt d'unëur. Duc i nteressei ie nviei ala reunion.
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16.00 ales 17.00 tla ciasa de Comun a Badia.
L'Ofize de "Ëres dëida Ëres"
L'ofize a Bornech é da ciafé tla str. Paul von Sternbach nr. 6, info.bruneck@frauenhelfenfrauen.it. Al é davert dal lönesc al vëndres dales 8.30 ales 11.30. Fora de chësc orar, vëgnel tut sö termins sön prenotaziun. Tel. 0474/410303.
A Poza vegn prejentà l nef CEF
En mercol ai 17 de oril da les 20.00 te Oratorie de Poza vegn prejentà l nef Club Ecologich Familiar. Tol pèrt l dr Claudio Zorzi espert de problemes leé a l'alcol, l dr Federico Comini psicologh de la sociazion "Le Rais", Marino Pederiva de la sociazion "Occhio al gioco" e Giuliano Pellegrin president de l'Acat de Fascia.
Maor segureza per la femenes
L cors Drehungen deida la femenes a troèr forza e capazità per se defener ti raporc personèi e tel pericol. Endrezà da Coprativa Oltre e La Voce delle donne per 5 lunesc, ai 16 e 23 de oril e ai 7, 14 e 21 de mé: h. 16.00-18.30 a La Rosa Bianca de Ciavaleis per joenes e h. 19.30-22.00 te biblioteca de Pardac per granes. Info: 345.5564365.
"Il Diavolo generoso" te biblio de Vich
La biblioteca del Comun de Sèn Jan a Vich endreza la prejentazion del nef liber de Alfredo Paluselli "Il Diavolo generoso", dedicà a la storia de Tita Piaz, dit "l diaol de la Dolomites". L'apuntament, a la prejenza de l'autor, l'é en jebia ai 19 de oril da les 21.00 a Vich te biblioteca.
Testimonianza da la Siria
Chest fin de setemèna te la parochies de don Andrea Malfatti se podarà scutèr na testimonianza straordenèra su la situazion de la Siria. P. Firas Lufti de la Custodia de Tera Sènta, preve a Aleppo, rejonarà de chest dram te la messes: en sabeda ai 14 h. 18.00 a Poza e en domenia h. 9 a Soraga, h. 10.30 a Sèn Jan e h. 18.30 a Pera.

Mujiga
"Adum per fé mujiga"
N dumënia ai 15.4. dala 20.00 te dlieja de Urtijëi cunzert dl Cor y Urchestra de dlieja de Urtijëi cun i sculeies dla Scola de Mujiga, cun pec de Karl Jenkins, Rolf Schweizer, G.F. Händel y d'autri.
L vën nce ciantà y sunà per l prim iede l pez de Matthäus Crepaz "Adum per fé mujiga".
Dirighënc ie Felicitas Schweizer y Matthäus Crepaz. Ntreda debant.
Le scioz de San Jenn
La Scora Mesana Tita Alton da La Ila inviëia ala rapresentaziun dl teater musical „Le scioz de San Jenn", en mercui ai 18 d'aurí 2018 dales 17:00, tla Ciasa dla Cultura a La Ila.

Teater
Comedia de "I Amisc del Teater"
La filodramatica "I Amisc del Teater" da Moena porta dant endodanef l toch de teater "Jone a far comedia?". L'apuntament l'é en domenia ai 15 de oril da les 20.30 te La Gran Ciasa de Soraga e en mèrtesc ai 24 de oril semper da les 20.30 te teater de Ciampedel.
Comedia de "I Bontemponi"
L grop "I Bontemponi" met dant 4 apuntamentc per poder veder la comedia "Liebe, Geld und Altpapier" de Hans Gnant. Se taca te teater de l'oratorie de Poza en mercol ai 18 de oril h. 20.30 e dapò ence en sabeda ai 21 h. 20.30 e en domenia ai 22 h. 15.30. En lunesc ai 23 de oril, semper h. 20.30, i jirà a Soraga te La Gran Ciasa.
Caterina, i dis e la sajons
En lunesc ai 16 de oril da les 20.30 te teater de Tieser, l'Istitut Cultural Ladin e la Scola de musega "Il Pentagramma" porta dant "Caterina. I dis e la sajons", opera teatrèla de Fabio Chiocchetti con musega da Armando Franceschini. Ousc de Rosanna March, sopran Angela Chiocchetti e strumentisć de "Il Pentagramma".
Chi él sun paladina?
Ultim apuntament per la 21^ rassegna de teater "Chi è di scena?" de Pardac. En sabeda ai 21 de oril te Auditorium Ciasa de la Joentù h. 21.00 la Filodramatica Dellagiacoma portarà dant "I cater fradiei revers" da "I fratelli Castiglioni" de Colantuoni, adatà da Donato Dellagiacoma.
Sëira a fin de bën per i mutons de Kalkutta
Ncuei vënderdi ai 13.4. dala 20.00 tla cësa de cultura a Urtijëi cun l Teater de Urtijëi che cun n valgun sketches, n pitl teater di mutons y n valgun jëuni che cianta, cëla de abiné adum dunfiertes da ti dé inant a Petra Theiner di „dutores dl Südtirol per l mond" che ie nstëssa stata tl India y cunterà de si esperienzes vivudes cun i mutons che chier da sëuraviver sun i mudli de maroca.

Chino
Al chino de Tieser
Insnet, vender ai 13 de oril (2D) e en sabeda ai 14 (3D) h. 21.15 e en domenia a 15 h. 20.30 (2D) se pel veder "Rampage. Furia animale". Tel fin de setemèna dai 20 ai 22 de oril, coi medemi oraries, se podarà veder "Io sono tempesta". Info: www.cinematesero.com.
LiteraKino, proiezion de films per granc
Tla Bibliotech San Durich a Urtijëi vëniel mustrà ncuei vënderdi ai 13.4. dala 20.30 n film tla rujeneda tudëscia. N vënderdi ai 20.4. saràl da udëi n film per talian. L program plu avisa di films che unirà mustrei proscimamënter ie da udëi tla bibliotech, ulache l ie nce julantins da pudëi se tò pea.
"Die fünfte Himmelsrichtung"
Ncuei vënderdi 13.4. dala 14.30 tl chino Capitol a Bulsan, per l'ucajion dl Filmfestival iel da udëi l film de Martin Prinoth de Urtijëi, che viv y lëura a Hamburg. Te si film ti vàl do ala vita y nrescida do l'identità de si jurman Georg, mut tëut su, nasciù tl Brasil y ruvà bele da pitl tla Dolomites, mort ala fin te na desgrazia cun l juliert tumà jut tl Atlantich.

Religion
Pelegrinaji a Medjugorje
Al vëgn organisé dui pelegrinaji tl santuar da Medjugorje. Un de 6 dis dai 25 ai 30 d'aurí, un de 5 dis dai 23 ai 27 de ma. Por informaziuns y prenotaziuns cherdé sö le 0471/843077 o 338/5027312.
Iade da Padre Pio dala Val Badia demez
Al vëgn pié ia tla Val Badia la sabeda ai 28 d'aurí 2018 dales cater da doman da Corvara demez, por jí cina a San Giovanni Rotondo, olache an stará cina en mertesc al 1. de ma 2018. Por informaziuns y prenotaziuns: tel. 0474 520013.
Les ëres en Jeun
Le movimënt dles ëres da Balsan inviëia les ëres da jí en Jeun, en sabeda ai 21 d'aurí, sot al tema "Y tres indô florësc la vita". Dales 14.00 él te dlijia ploanala da Tlüses na proa da cianté. Da iló pëion spo sö dales 14.30. Sön Jeun él na zelebraziun liturgica. Dala Val Badia ne vá degun bus, mo an pó se mëte en contat cun les ëres de Puster, telefonan a Margareth al 348/8107183, o se mëte adöm privatamënter.

Dotors y Apoteches
Apoteches
L'apoteca che ie de servisc per Gherdëina, ora dl orar ordiner de giaurida, da n vënderdi ai 13.4. nchin n vënderdi ai 20.4. ie chëla de Fie, tel. 0471/725373 (orar: 8.30-12.30/15.00-19.00, sada 8.30-12.30, stlut mierculdi domesdì. Turnus: sa. 8.30-12.30/16.00-19.00, du. 10.00-12.00).
L'apoteca en sorvisc tla Val Badia, fora dl orar ordinar, dal vëndres ai 13 d'aurí dales 19.00 al vëndres ai 20 d'aurí ales 19.00, é chëra da La Ila, tel. 0471/847152.
Dotors
L dutor de servisc te Gherdëina da n sada ai 14.4. dala 8.00 daduman nchin la 8.00 daduman de n lunesc ai 16.4. ie l dutor Aba Fallaha de Sëlva, tel. 0471/794111 o l 0471 797540 o l 333 9593131.
Doturs Val Badia: Le dotur en sorvisc ti cin' comuns dla Val Badia, tl fin dl'edema di 14 y 15 d'aurí, é le dotur Luca Galiazzo, tel. 342/5181295.

Temp lede
Trix domesdì de juesc da mëisa per families, mutons dla scolina, scola elementera y mesana
Duman sada ai 14.4. dala 14.00 nchin la 17.00 tla sala Matada a Urtijëi, Plaza de Dlieja. N domesdì da sté te familia fajan vel' blòt juech deberieda. I cumëmbri dla lia Trix sarà tlo per ve spieghé i juesc. Gran vela de juesc d'uni sort da crì ora.
Cin' incuntades por balé line dance
Organisades dal Consëi de Formaziun da La Val. An s'incunta ai 24 d'aurí, spo ai 2, 8, 15 y 23 de ma, tres dales 8:15 ales 9:45, te salf dles manifestaziuns da La Val. Prenotaziuns pro Giovanna Moling al 338/1249472.
Chidlada dla Uniun Maestri Ladins
L'UML mët da jí na chidlada a scuadres da 3, por insegnanc atifs y en ponsiun (dla scolina, elementara, mesana y scora alta), dirigënc y personal de scora de Badia y Gherdëna. En jöbia ai 26 d'aurí dales 15.30, tla chidlara da Runcac a Al Plan. An n'á nia bria da se prenoté.

Sport
Festa sozièla del Ski Team Fascia
Doman sabeda ai 14 de oril l Ski Team Fascia endreza sia festa de fin sajon. Se taca con la messa de les 18.00 te gejia de Poza e dò te tendon cena e premiazion de duta la garejèdes di bec di corsc, di gropes agonistics, alenadores e gregn. Vegnarà premià ence i atlec del STF rué sui podies provinzièi e nazionèi.

Cursc
Pastelné cun Ines
Metù a jì dala Nëus Jëuni Gherdëina per sculeies dla scola elementera, for de sada dala 9.30 ala 12.00 tla sënta dla NJG a Urtijëi sun Plaza S. Antone, ulache l vën nce tëut su la iscrizions, 0471 799006. Ai 14.4. fajeràn antlaries y ai 5.5. zeche per l di dl'oma.
Curs de prim aiut dla Crëusc Blancia
N sada ai 21.4. dala 14.00 ala 18.00, tl Zënter de prim aiut a S. Cristina, Soplajes, cun Hermann Delucca. L curs ie debant per i cumëmbri, ma l ie daviert a duc. Manovres de prim aiut te n cajo de desgrazia o malatia acuta, spiegazion dl sistem dl servisc de prim aiut te Südtirol/ Gherdëina. Per se scrì ite cherdé su l 0471 444396.
Curs da fá trëces
Al vëgn organisé n curs da fá de vigni sort de trëces, tl Salon Manuela a San Martin. Le curs é en lönesc ai 23 d'aurí dales 15.00 inant. Por prenotaziuns telefoné a Manuela al 0474/590114 o 339/2024355. Organisaziun: Uniun dles Patrones dl Comun da San Martin de Tor.
Curs de ginastica cun Simon Dapoz
Curs de 8 incuntades, te palestra da Calfosch. Al mët man en mercui ai 18 d'aurí, dales 9:00 ales 10:30. Por informaziuns y prenotaziuns cherdé sö Paola al 0471/836096. Organisaziun: Uniun dles Ëres da Calfosch.
L'apoteca naturala dles ês
Propolis, gelee royal, cera, mil, stöp de flus. Chëstes é fontanes de forza tla natöra. Sot al titul "Die summende Naturapotheke" organisëia la Uniun dles Ëres da Calfosch n domisdé cun Hildegard Kreiter, en jöbia ai 19 d'aurí dales 14.00 te salf dles manifestaziuns da Calfosch. Al pó tó pert cina 15 porsones. Le cost é de 8,00€ a porsona. Infos y iscriziuns pro Regine al 345/3411991 o Paola al 334/3195717.
Curs da fá n fotoalbum digital
Le curs vëgn tigní de lönesc ai 16 y 30 de aurí dales 20:00 ales 22:00, tl pice salf sot le comun a La Val. Cun n program vëgnel fat n fotoalbum digital, che gnará mené a stampé. Prenotaziuns pro Gustav Frenademez al 333/7689434, anter i 9 de aurí.
Curs de pröm aiüt
Sot al motto "Ci che an dess savëi por salvé la vita", organisëia le Consëi de Formaziun da San Martin n curs de pröm aiüt, deboriada cun la Crusc Blancia. Al vëgn insigné la teoria y la pratica dl pröm aiüt y les normes de reanimaziun. I partezipanc ciafará n atestat. Le cost é de 35,00€ a ce. Infos y iscriziuns pro le Sorvisc Formaziun Val Badia al 0474/523110 o formaziun.vb@micura.it
Curs da fá cajincí arestis y crafuns mori
Organisé dala Uniun dles Patrones da La Val. Al vëgn tigní en mertesc ai 24 d'aurí te salf dles manifestaziuns da La Val. Referënta é Stefania Schuen. Infos y prenotaziuns pro Edith al 333/6768415.

Referac
Vester ëila de uni viers – Avëi ardimënt per se mudé
N vënderdi ai 20.4. dala 20.00 tla Bibliotech Tresl Gruber a S. Cristina, referat cun Martha Erlacher.
Na persunalità sterscia ie la cundizion per avëi suzes, rënder, vester sani y cuntënc plu giut.
Vitalisé la tiera de verzon zënza chimica
N vënderdi ai 20.4. dala 20.00 a Urtijëi, tla sala Raiffeisen suaut, cun Alexander Huber - cultures biodinamiches y permacultura. L ie na sëira de nfurmazion, n referat sun de plu manieres de biocultura per na majera valorisazion di verzons y dla tiera. Ala fin pòssen nce fé dumandes. Metù a jì dala Lia Sanynton.
Varenton nosc mutons dala ngianedes di media
N sada ai 21.4. dala 19.30 tla gran sala dla calonia de Urtijëi, cun Annalisa Colzi. Sëira dantaldut per i jëuni, ma nce per manco jëuni, per chëi che crë' o ne crëia nia, davia che l melvester che vën su tres i media ie n problem de duc y per duc. L vën damandà na dunfierta per curì la spëises. Metù a jì dal Cunsëi de pluania.
Da olá vëgn pa i migranc?
A chësta domanda i ván do te n referat che vëgn tigní en vëndres ai 20 d'aurí dales 20.00, te salf dles manifestaziuns da Calfosch. Referënta é Laura Palatini, che portará dant stories dal Pakistan, dal Sudan y dala Nigeria. Organisaziun: Consëi de Cöra.
Al vëgn fat dles dötes por abiné i fedei a mëssa
En vëndres ai 20 d'aurí dales 20.00, él tla Ciasa J. B. Runcher a Badia n referat cun siur Sepl Granruaz, dal titul "Al vëgn fat dles dötes por abiné i fedei a mëssa - Nes unse desmentié le salm 32/33?". Organisaziun: Consëi de Cöra.
Serada sön alcol y droga
I Clubs di alcolisć y le KVW da La Ila inviëia dër bel a na serada d'informaziun dal titul "Alcol y droga - Informaziun, prevenziun, aspec iuridics", en mertesc ai 24 d'aurí dales 20.00, te scora mesana da La Ila. Referënt é le dr. Peter Mazzurana, dotur dla Polizia de Stat y gran espert di problems liá al consum de alcol y droga.

Mostres y Ert
"Mare Nostrum" na speranza tl'ega
Giaurida dla mostra-proiet de Gregor Prugger ncuei vënderdi ai 13.4. dala 19.00 a Sëuc, tl Hotel Nature Residenz Dolomitenhof, streda Hauenstein 3. L artista se à dat ju cun la tragedies che suzed tl Mediteran, cun jënt che chier mé na miëur' vita. I 80 lëures tla nudadoia dl hotel ie da udëi nchin ai 22.4. uni di dala 17.00 ala 19.30.
Mostra dla Scola prufesciunela per l Artejant artistich
Tla sala dla Lia Mostra d'Ert a Urtijëi, Plaza S. Antone, iel da udëi la mostra dal titul „Ancuntedes", cun lëures fac dai sculeies dla tlasses de scultura, pitura, dessëni y de spezialisazion. La mostra resterà davierta nchin n dumënia ai 22.4. uni di dala 10.00-12.00 y dala 17.00-19.00.
Mostres tla Ciasa dl Parch a Al Plan
Tla Ciasa dl Parch Natural Fanes - Senes - Braies él da odëi döes mostres speziales: öna reverda "Le monn demorvëia di andri dles Dolomites", en gaujiun di 30 agn dla descurida dl ander de Conturines. La mostra "Munts de vera" tematisëia les conseguënzes dla pröma vera sön natöra y contrada.
Mostra: cuadri de Sr. Maria Monica Moling
Tl foyer dla Ciasa de Palsa a San Martin él da odëi cina ai 6 de ma (vigni de dales 8.00 ales 19.00) na mostra de acuarei dla monia da La Val.

Concursc
Zipla... n juech tl 2018
Simposium nternaziunel de scultura sun Ciampinëi dai 30.7. ai 5.8., metù a jì dala Lia Mostra d'Ert. Da ziplé iel n juech ora de n gran tlapon, cun juech ne n'iel nia mé minà "fé damat" ma nce formes plu astrates coche l juech dla lum, dla formes o l juech coche matada.
La cundizions per fé pea y se scrì ite, nchin ai 1.5., ie da giaté sot a www.circolosymposium.com. Per nfurmazions: 339 8392560 (Jan).

Galaria retrac