Manifestazions atuales speziales

Data

20 de auril 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 20 de auril
Shanti Powa Orchestra
En vëndres, ai 4 de ma él söl program tl Zënter Cultural SaJ.un a La Ila le proscim conzert dla seria "1.st.Friday.live.session@SaJ.un", en chësc iade cun le grup conesciü "Shanti Powa Orchestra"
Te chësta ocajiun gnarál presenté l'album nü dl grup "Til insanity". Chësc album á i Shanti Powa Orchestra dé fora da püch y al é por düc na bona ocajiun da gní a d'ascuté sö toc daldöt nüs.
Le grup Shanti Powa Orchestra é nasciü dl 2010 sciöche "soundsystem" y s'á svilupé tl tëmp te n grup de 11 musizisć. Cun sü 9 strumentalisć y dui ciantarins, scriai sües cianties fora de n mix de reggae-crossover, rap, ska, dancehall, funk y rock. Y ai ne lascia mai sté chit le publich!
Cianté vëgnel por inglesc, talian, franzesc y todësch. Söl palch é i musizisć plëgns de energia, cun musiga che cheriëia na atmosfera unica. Tratan so tru á i Shanti Powa Orchestra soné plü iadi pro manifestaziuns te döta l'Europa, p. ej. Rototom Sunsplash (ES), Overjam (SL) y Reeds (CH) y cotan d'atres. Pro chisc conzerc ái partí le palch cun artisć sciöche Max Romeo, The Gladiators, Israel Vibrations, Dub FX, The Skints, Luciano, Inner Circle y tröc d'atri.

Turnoi "blitz" y referat de scioh
N mierculdi ai 25.4. dala 3 domesdì te Tublà da Nives te Sëlva
L proiet "Ti dé tëmp al tëmp" à te si program udù dant per n mierculdì ai 25 de auril 2018 (festa naziunela) n turnoi "blitz" de scioh, ulache i jugadëures à mé a despusizion cin' menuc per partida. Oradechël saràl Rainer Demetz, che tenirà n referat n generel dl scioh.
N se ancunterà te Sëlva, tl Tublà da Nives y l turnoi meterà man dala 3 domesdì. Nteressei a fé pea pra l turnoi, possa se scrì ite nchin n sada ai 21 de auril, cherdan su l 345 8835488 (Ruben).
Nfurmazions n cont dl proiet "Ti dé tëmp al tëmp" giàten sun www.manif.it y www.facebook.com/furmaziongherdeina sciche nce sun de plu stampac.

Prejentazion dl CD nuef "Suvier" di Helios
N sada ai 28.4. y n dumënia ai 29.4. tla Cësa de Cultura a Urtijëi
La Grupa Helios nvieia duc de cuer a unì ai cunzerc de prejentazion dl CD nuef "Suvier". Ntan doi cunzerc spetaculeres uniràl prejentà la diesc cianties nueves che i cumëmbri dla grupa à scrit nstësc ti ultimi doi ani. La cianties ie te bёn cater rujenedes – ladin, tudësch, talian y nglëisc – y trata de tematiches atueles che à da n fé cun i jëuni, si speranzes y tëmes tla vita da uni di. L CD ie unì realisà n ucajion di 40 ani di Helios y ntan i cunzerc uelen festejé deberieda.
I cunzerc sarà n sada, 28 de auril dala 20.30 y n dumënia, ai 29 de auril, dala 18.00 tla Cësa de Cultura a Urtijëi. La ntreda ie debant. Prion bel de resservé n post cherdan su l ufize dla Nëus Jëuni Gherdëina sot al numer 0471 799 006. La Grupa Helios se ncunforta sun Vosc unì!

Serada sön alcol y droga
En mertesc ai 24 d'aurí nen jarára de informaziun, prevenziun y aspec iuridics
I Clubs di alcolisć y le KVW da La Ila inviëia dër bel a na serada d'informaziun dal titul "Alcol y droga - Informaziun, prevenziun, aspec iuridics", en mertesc ai 24 d'aurí dales 20.00, te scora mesana da La Ila.
Referënt é le dr. Peter Mazzurana, dotur dla Polizia de Stat y gran espert di problems liá al consum de alcol y droga.

Spetacol d'aisciuda
I Pavei d'Arjent ve envìa en lunesc ai 23 de oril da les 19.00 te stadie de la giacia de Dèlba a veder l "saggio" che sera sù na bela sajon de sport e fradaa
L'é oramai aisciuda e l lonch e rich empegn de dut chest invern de arcedamenc e garejèdes de la sociazion sportiva Val de Fascia Artistico Ghiaccio é dò a ruèr junsom.
Per serèr sù en legreza i joegn balarins e balarines envìa de cher duc chenc a l'ejibizion de bal sui feres che vegn metù a jir per se passèr ensema na bela sera e ge moscèr ai parenc, ai amisc e a duta la jent i gregn progresc arjonc te duta la sajon.
L'apuntament l'é per en lunesc ai 23 de oril da les 7 da sera aló dal stadie de la giacia Gianmario Scola de Dèlba, olache nesc "pavei", anter pirles, sauc e pasc de bal, i portarà na ventèda de legreza e de aisciuda per l piajer e l devertiment de duc chenc.
Donca no mencià, vegnì de n muie, se pel ite zenza paèr nia!