Manifestazions atuales

Data

27 de auril 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 27 de auril
Cursc
Curs per se njenië ca a parturì
Per ëiles che aspieta y genitores dl daunì, che à l terminn de agost/setëmber 2018. L'ancuntedes sarà tla palestra dla cësa de paussa a Urtijëi, dai 25.6. ai 30.7. uni lunesc dala 16.00 ala 18.00/19.00. Iscrizions: CUPP tel. 0471/457457, 8.00-16.00 dal lunesc al vënderdi; email vormerkungen.bz@sabes.it; ëifoma 0471/797778, assistënta sanitera 0471/794290.
Pastelné cun Ines
N sada ai 5.5. fajeràn zeche per l di dl'oma. L curs vën metù a jì dala Nëus Jëuni Gherdëina per sculeies dla scola elementera de sada dala 9.30 ala 12.00 tla sënta dla NJG a Urtijëi sun Plaza S. Antone, ulache l vën nce tëut su la iscrizions, 0471 799006.
Fajon zeche de dëuc per l di dl'oma
N merdi ai 8.5. dala 20.00 tla cësadafuech dla Cësa di Jëuni, Ert y Cultura a Urtijëi, mët la Nëus Jëuni Gherdëina a jì na sëira cun la cunditera Elisa, ulache l unirà fat de bon desserc n ucajion dl di dl'oma. Da se scrì ite iel pra la NJG, al numer 0471 799006.
Curs de Ladin per chëi che sà bele n puech
L curs ie nce adatà per se njenië ca al ejam de trilinguism C-D y vën tenì da Karin Comploj, for de merdi y de juebia ai 8, 10, 15, 17, 22, 24, 29, 31 de mei, dala 17.00 ala 19.00 te Sëlva tl Istitut Ladin Micurà de Rü. Da se scrì ite iel nchin ai 4.5. tl Istitut Ladin te Sëlva, str. Nives 16/4, tel. 0471 773225, e-mail: furmazion.gh@micura.it.
Cursc de jadiné y balé cun devertimënt
Tl "Kids dance - Ice Skating - Fun Camp" metù a jì dal Eisclub Gherdëina possa mutans y mutons danter 5 y 10 ani unì a se devertì, fajan sport. L sarà cursc dai 16. ai 20.7., dai 20. ai 24.8. y dai 27. ai 31.8., for dala 9 ala 15.00 y costa 160 euro. N possa se scrì ite nchin ai 10 de mei, cherdan su l 333 2578392 o passan tla butëiga Nero Fluido a Urtijëi.
Curs da fá n cëst cun rames de lersc
Organisé dal Consëi de Formaziun La Val, por en jöbia ai 3 de ma dales 8:45 ales 12:00 a Picedac da La Val. Referënta é Alma Deval. Informaziuns y prenotaziuns pro Alma al 331/2719213.
Seminar de retorica
Sot al titul "Das Handwerk fürs Mundwerk" vëgnel metü da jí en sabeda ai 12 de ma n seminar de retorica cun Alex Ploner. Al döra döt le de - 8 ores - y vëgn tigní tl salf dl Istitut Ladin a San Martin de Tor. Informaziuns y prenotaziuns pro le Sorvisc Formaziun Val Badia al 0474/523110 o formaziun.vb@micura.it. Organisaziun: Consëi de Formaziun da San Martin.
Arjigné n aperitif por deplü ocajiuns
Le KVW da Lungiarü inviëia a n curs de 2 sëres cun Hermann Dapoz, mertesc y mercui ai 8 y 9 de ma dales 19:30, te ciasadafüch dla scolina a Lungiarü. Por informaziuns y prenotaziuns, telefoné anter i 3 de ma a Carla al nr. 0474/590088 (da sëra).
Curs de massaje por de pici mituns da 6 edemes a 6 mëisc
Le Zënter Families Mareo organisëia n curs de massaja por pici mituns cun Sofia Triggiano. Le curs de döes sëres mët man en jöbia ai 10 de ma y vëgn tigní dales 10.00 danmisdé tl local dl Zënter Families Mareo. Al pó tó pert alplü 7 porsones. Iscriziuns al 338/7173577.

Iadi, jites y escurscions
Jita sun la cima L'Armentara
N dumënia ai 6.5. mët la Lia da Mont de Gherdëina a jì la jita sun la cima L'Armentara tla Val di Sella (Valsugana). L sarà da fé 1.500 m de deslivel y za 5 ëura da jì. N possa se nuté su dai 30.4. nchin a n vënerdi 4.5. da Ciofs Inge, Activ Sport y Sport Bruno Riffeser. Per nfurmazions cherdé su Monica, tel. 339 6563015.
Schitour sön le Pice Vernel
La Lia da Munt Ladinia - Val Badia mët da jí en domënia ai 29 d'aurí na schitour sön le Pice Vernel (2.982 m). Ara é ria, cun n tëmp da jí de 4,5 ores y n deslivel söpert de 1.075 metri. Informaziuns pro Agostin Craffonara al 339/8162715
Festa dla junanza a Salzburg
Dai 18. ai 21.5., bele dai ani se anconta jëuni dl raion tudësch da Pasca de Mei per passé de biei dis deberieda fajan pea pra workshops, referac, musical, funzions, pelegrinajes de nuet y per se devertì. Vënies'a pea nce tu? La Union pasturela Gherdëina mët a jì na curiera y l priesc dl viac ie de 120 €. Per nfurmazions, videos, fotos y se scrì ite nchin ai 30.4.: www.festderjugend.at y pra Claudia Mussner: 338 6406533 o mussner@scizer.com.
Viac tl'Uganda a cialé la miscions cun safari y gorilla tracking
Dai 25.10. ai 5.11.2018. Do l referat cun Maria Prean àn ulù mëter a jì n viac tl'Uganda per jì a ti cialé ala miscions. N fajerà nce n safari y jirà a ti cialé ai gorillas che ie mo i ultimi al mond de chësta sort. Per nfurmazions y iscrizions, nchin ai 15.5.2018 cherdé su l 333 2852859 o l 348 3429443. L ie da se scrì ite tan abenëura pervia de giapé la lizënzes de jì a ti cialé ala gran rarità di gorillas.

Mostres y Ert
Mostra su la percezion del legn a Ciavaleis
La é averta fin en domenia ai 29 de oril al Zenter d'èrt comtemporana de Ciavaleis la mostra "Wood Avalanche" L legn él demò n material? Projet de 4 studenc de la Cademia rencurà da Alice Zottele, Pierangelo Giacomuzzi e Roberta Segata. Oraries h. 16.00-19.00; vender e sabeda ence h. 20.30-22.30.
Mostra: cuadri de Sr. Maria Monica Moling
Tl foyer dla Ciasa de Palsa a San Martin él da odëi cina ai 6 de ma (vigni de dales 8:00 ales 19:00) na mostra de acuarei dla monia da La Val.

Mujiga
Prejentazion dl CD nuef "Suvier" di Helios
N sada ai 28.4. dala 20.30 y n dumënia ai 29.4. dala 18.00 tla Cësa de Cultura a Urtijëi. Ntan i cunzerc uniràl prejentà la cianties scrites dai cumëmbri nstësc, che trata de tematiches atueles che à da n fé cun i jëuni, si speranzes y tëmes. L CD ie unì realisà n ucajion di 40 ani di Helios. La ntreda ie debant.

Referac
Lauré l'urt en sintonia cun la natöra
La Uniun dles Ëres San Ciascian mët da jí en lönesc ai 7 de ma dales 20:00 te calonia da San Ciascian n referat cun Sebastian Ghetta, dal titul "Co laoron pa l'urt en sintonia cun la natöra?"

Teater
Teater per l di dl'oma
La "Jungschar" de Urtijëi nvieia de cuer al teater per l di dl'oma n sada ai 5 de mei dala 20.00 y n dumënia ai 6 de mei dala 18.00 tla cësa de cultura de Urtijëi.

Radio y Televijion
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
Merdi 1 de mei - Melodies ladines: n proiet nü de Jan Daniel Granruaz
Conduzion: Esther Videsott. La trasmiscion "DAI CRËPS DL SELA" ie da audì uni di dala 19:05 ala 19:30 sun la frecuënzes de RAI LADINIA
Vënderdi 27 de auril - L sistem "Lat"
Pian via dal film "System Milch" vëniel rujnà dla produzion dl lat, de coche i gran conzerns nuza ora i paures drucan sun l priesc y de coche ie la situazion tlo da nëus. L produzion dl lat ie perdrët n grandiscimo "business". L vën fat profit a spëises dla natura, di tieres, dla persones y de nosta sanità. Sun uni pachetl dal lat vëijen suvënz na bela fotografia de na vacia cuntënta, ma la realtà ie bën danz dut n'autra. Program de Simon Moroder.
Dumënia 29 de auril - 1948 - dan 70 ani: Optanc y dobleider
Do la segonda viera ulova truep optanc inò unì dereviers te Gherdëina, dereviers te na valeda che fova mo for despartida danter "Dobleiber" y "Optanc". Tl prim ne n'ulova l guviern talian nia azeté i optanc coche zitadins talianes. Do che la SVP ova fat prescion à l cunsëi di ministri lascià pro l decret de lege nr. 23 dl 2 de fauré 1948˛ chësc ti dajova ai optanc l mesun de anulé la opzion per i Paejes Tudësc. Ma nia duc i optanc giapova la zitadinanza taliana...Program de Sofia Stuflesser.
Lunesc 30 de auril - Bob Dylan – vita y opera (cuarta pert)
Cun Lukas Plancker fajons l viac ala scuviërta de Bob Dylan, al secul Robert Allen Zimmerman, musizist, ciantautëur, poet, scritëur y scultëur american, che à lascià n sëni mpurtant tl mond artistich, ma nce tla realtà soziela y politica de nosc tëmp. Program de Leo Senoner.
Mierculdi 2 de mei - L piajer de saer lejer e scriver
Saèr lejer e scriver l'é vèlch che chiò da nos duc empera ti prumes egn de scola ma no l'é medemo dutintorn soraldut per la femenes che valch'outa no à azes a l'istruzion. Emparer a lejer e scriver é na chief per se rejer miec e se averjer al mond. Program de Anna Mazzel.
TELEVIJION
Merdi 1 de mei dala 20:50 - Mendret –mendranzes tl mond: L cunfin danter dialec y rujenedes
Ciuldì y can ie pa l ladin uni recunesciù sciche lingaz? Ova pa la jënt de nosta valedes la cuscienza de rujené n lingaz particuler y desfrënt bele dan che i studiëusc à studia l ladin? Cie caraterisea pa l ladin? Y ie pa nce l dialet che vën rujenà tla Val di Non na varianta dl ladin dla Dolomites? De chësta y de autra cuestions liedes a nosc lingaz rujenerons tla proscima edizion de Mendret. Program de Elisabeth Kostner, a cura de Anna Mazzel.
Mierculdi 2 de mei dala 20:50 - "CUCALOC" cun Barbara Pizzinini
"Cucaloc" é rové a Picolin tla sënta dl raiun sozio-sanitar Val Badia por conësce damí Barbara Pizzinini, manajadëssa dla cooperativa soziala EOS. Ëra cuntará de so impëgn y laur tl ciamp sozial y de coch'al vëgn manajé la cooperativa EOS, te na ciacolada cun la moderadëssa Esther Videsott. Danterite val' filmat y la musiga de Laura Willeit y Hubert Dorigatti. Program de Esther Videsott e Anna Mazzel.
Juebia 3 de mei dala 20:50 - SCENAR – ert y cultura tla Ladinia: la familia Schuen y Julia Runggaldier
Che la mujiga fej da liam, chël san pu. Purempò à tla familia Schuen la mujiga mo na majera mpurtanza. I genitores Paul y Hilda à bele da canche si trëi mutons fova pitli zidlà la pascion per i strumënc y per l cianté. Al didancuei ie Elisabeth y Marlene, plu cunesciudes coche la "Ganes", na bela realtà tl ciamp dla mujiga ladina, che se slergia ora tres i truep cunzerc sëura duta l'Europa. L fra Andrè ie n bariton cun gran talënt, che à bele lascià audì truep de sé. La peneledes de Julia Runggaldier ie frësces y semea ulëi comuniché n melsté tenì sucrët dala persona. L mond dla parënza y dal'autra pert che dla sensibltà dl'ana mët ëila sun tëila, mustran bele na gran maduranza. Program de Ivan Senoner, produzion de Hanspeter Karbon, a cura de Leo Senoner.
Informaziuns plü menüdes söi programs radio y televijion de RAI Ladinia pôn ciafè sön www.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Temp lede
Ne n'é nia dl'aurela de avëi dl'aurela
N vënderdi ai 4.5. dala 20.00 te Tublà da Nives te Sëlva. Na sëira de paroles y mujiga danter i zogri dl tëmp cun Marco Forni y l duo Malfertheiner-Miglioranza. La bibliotech "O.v. Wolkenstein" meterà ora libri che à da n fé cun l tëmp. La manifestazion fej pert dl proiet „Ti dé tëmp al tëmp".
Trix: sëira de juesc da mëisas per jëuni
N vënderdi ai 4.5. dala 20.30 tl local di jëuni Saut a Urtijëi, Plaza S. Antone. Ueia de Ve devertì te na blòta cumpania? L vën pità juesc da mëisa per uniun. I juesc vën cunsiei y spieghei dai cumëmbri dla lia Trix.
Ie feje n verzon cun tati
N sada ai 5.5. dala 14.30 inant tl verzon dla cësa de paussa a Urtijëi, mët l VKE a jì n domesdì ulache n mut o muta possa fé n verzon aut (Hochbeet) cun si pere. L ie adatà per mutons danter 4 y 7 ani. L vën lascià pro al plu sies pères (1 pere + 1 mut/a). L ie da se lascé nuté su cherdan su l 333 7739605.
Qi Gong
N se anconta uni mierculdi dala 8 da sëira a S. Cristina tla sala Raiffeisen te cësa de chemun cun Rodolf Braunhofer. L se trata de muvimënc fac cun la drëta tecnica de tré l fla, che porta a n miëur bënsté dl corp y fej bon ala sanità. Uniun possa passé n iede a purvé ora chësta tecnica. Nuzëve de chësta ucajion.
I amisc dla letöra s'incunta a Badia
En jöbia ai 3 de ma dales 20:00 s'incunta te biblioteca a La Ila i amisc dla letöra, por s'la cunté de libri che ai á lit. Organisaziun: Biblioteca Sas dla Crusc.
L'ora dles stories a La Ila
En lönesc ai 7 de ma dales 15:00, é mitans y mituns da 6 a 10 agn inviá te biblioteca da La Ila, olache Rossana y Resi liará dant stories.

Chino
Al chino de Pardac
Insnet, vender ai 27 de oril da les 21.15 se pel veder "Avengers. Infinity war". Doman, sabeda ai 28 e en domenia ai 29, da les 17.00 vegn moscià "Sherlock Gnomes" e da les 21.15 en 3D vegn moscià "Avengers. Infinity war". En lunesc al prum de mé da les 17.00 l'é "Avengers. Infinity war" e da les 21.15 "The silent man". Info: www.cinemapredazzo.com
LiteraKino, proiezion de films per granc
Tla Bibliotech San Durich a Urtijëi vëniel mustrà ncuei vënderdi ai 27.4. dala 20.30 n film tla rujeneda tudëscia. N vënderdi ai 4.5. saràl da udëi n film per talian. L program plu avisa di films che unirà mustrei proscimamënter ie da udëi tla bibliotech, ulache l ie nce julantins da pudëi se tò pea.

Sport
Alenamënc de sauté per mutons
I Gherdëina Runners fej a l savëi che l vën inò scumencià cun i alenamënc per mutons dala prima elementera insù y plu avisa n mierculdi ai 9.5. dala 18.00. N se anconta sun l troi da jì a spaz dan l tunel de La Curta. Trainadëura ie chëst ann Kathrin Insam, che ie nce maestra de sport tla scola mesana.

Avisc
Rumé su i ruves y l luech de Urtijëi
Duman sada ai 28.4. mët l Chemun inò a jì la azion de jì a rumé su i ruves y l luech. Duc i zitadins a chëi che l ti sta a cuer nosc bel luech ie nviei a judé pea. N se ancunta dala 8.00 daduman dan la cësa de chemun, ulache n giaperà la massaria aldò y pierà te grupes ora per plu raions dl luech.
Lascé cialé do la bombules da destudé l fuech
I Destudafuech de Urtijëi pieta nce chëst ann l servisc de cialé do la bombules y plu avisa n sada ai 5.5. dala 8.00 nchin la 12.00 y dala 13.00 nchin la 15.00 tl magasin di Destudafuech tla streda Purger a Urtijëi.
Di dla porta davierta de "La Vëta"
La lia nueva nvieia n sada ai 12.5. a unì tla bertotes de scultëures, artisć, moleri, nduradëures y marcadënc a cialé coche l vën laurà te chësc artejanat artistich. Plu avisa iel la berstotes de Gregor Mussner, Alfons Runggaldier, Christian Stuflesser, Gerald Moroder, Uli y Jessica Noflaner, Rari y Armin Grunt, che sarà daviertes dala 9.00-12.00 y dala 14.00-17.30.
Vië y scrite it al proiet SAKL – l te dajrà sodisfazion y te mperes ngrum de nueva cosses.
L' iscrizions dl proiet da instà SAKL (Sommer activ, kreativ live) metù a ji dala Nëus Jëuni Gherdëina à abù n gran suzes y desmostra che l program plej dassënn ai sculeies de duta la valeda.
Mo lerch pra n valguna ativiteies dl SAKL
La Nëus Jëuni Gherdëina fej a l savëi che l ie mo lerch pra l'enes criatives sciche chëla dl cujiné y ciarcë deberieda, chëla dl'ert metuda cun i artejans jëuni cun si lia „la Vëta", l'ena de teater cun Hannen Huber y chëla dla geologia n cunlaurazion cun l Museum Gherdëina. Lerch iel nce er i dis sun la Plose y la "Fahrt ins Ungewisse" per i sculeies dla prima y segonda tlasses dla scoles autes. Per nfurmazions passé tl ufize dla NJG o cherdé su l 0471 799006.
Incuntada dl grup "Atmosfera"
En jöbia ai 3 de ma dales 15.30 ales 17.30 s'incunta te Raiun Sozial a Picolin le grup "Atmosfera", por ëres y ëi atocá da problems psichics. En chësc iade modelunse l'arjila y lasciun lëdia nosta fantasia. I se tolun ince le tëmp da s'la cunté adöm cun Irina Tavella y Barbara Rungger. Infos pro Sabine Rainer al 0474/524519. Düc é bëgnodüs.
A Ciampedel rua Bertol
En vender ai 4 de mé te Baita Ischia de Ciampedel da les 17.00, tel chèder de l'Aisciuda Ladina 2018, vegn endrezà n domarena con Bertol per duc i bec e la prejentazion del liber "La Val di Fassa tra fantasia e realtà" de Alberta Rossi con ativitèdes didatiches per ladin.
Ciampedel festejea la cobies
En domenia ai 13 de mé, te la messa de les 9.30, la curazìa de Ciampedel recorda i cedeegn de maridoz, l prum an e dapò dal 5° an ogne 5 egn. Dal 51° an inant enveze vegn festejà duc i aniversaries. Dò messa se se troa te Calonia per mìngol de festa. L'é da se scriver ite dant de en domenia ai 6 de mé.
A Vich cors de franzous
La biblioteca de Vich endreza n cors de franzous intermedie, ogne mèrtesc e jebia, dai 3 de mé ai 5 de jugn da les 20 a les 21.30. L cors é de 15 ores spartides fora te 10 lezions, l cost é de 110 euro. Ge vel se scriver ite a vigodifassa@biblio.infotn.it o al nr 0462 763062.
A Sèn Jan inaudazion de l'Aisciuda Ladina
En mercol ai 2 de mé da les 17.00 a l'Hotel Olympic vegn inaudà l'Aisciuda Ladina 2018. Dò l salut de l'autoritèdes e la prejentazion del program vegn portà dant i resultac di corsc e se pel cercèr l buffet endrezà dai partezipanc al cors de cojina con l chef Stefano Ghetta. Iscrizions amò anché al 0462 764500.
A Ciampedel inaudazion del Stont
En domenia ai 6 de mé a Ciampedel vegn inaudà l Stont – Imperial-Regio Casino di bersaglio, neva sezion del Museo ladin. Se se troa da les 8.30 te piaz de Ciampedel, da les 9 l'é l Frontabschreitung, da les 9.30 messa grana, da les 11.00 zerimonia de inaudazion del Stont con l referat storich de Maria Piccolin.
Per miorèr l'energìa vitala
La Kinesiologa-Naturopata Biotranier Irene Deflorian endreza cinch encontres a l'averta con prateghes de Qi Cong per armonisèr l'energìa vitala, miorèr la sanità e l'armonìa del cef e del corp. Ogne mercol dai 9 de mé da les 6.30 a les 7.30 sun Pianac. Info e iscrizions: 349.3264800, info@irenedeflorian.it.
Prejentazion del liber 45 egn de Marcialonga
Insnet, vender ai 27 de oril da les 19.00 a la Fondazione Caritro de Trent vegn prejentà l liber "Marcialonga Legends neves stop skiing – 45 egn de Marcialonga travers i recorc di senatores", Con Angelo Corradini, Claudio Gregori, Susanna Sieff e vèlch un di senatores. Moderazion de Fausta Slanzi.
A Moena enconter con Fernando Ramallo
En jebia ai 3 de mé da les 17.00 a l'Agritur El Mas a Moena, tel chèder de l'Aisciuda Ladina 2018, vegn endrezà na conferenza laboratorie de confront con Fernando Ramallo de l'Università de Vigo te la Galicia che rejonarà del fenomen di neves locutores.
Sun Sela per cognoscer la storia di Ladins
En sabeda ai 5 de mé, tel chèder de l'Aisciuda Ladina 2018, l'Union di Ladins de Fascia envìa duc sun Jouf de Sela per cognoscer mingol de storia de chest popul e de sia bandiera. Se ponta demez da les 15.00 a Sèn Jan. Info al 0462 764545.
Servije zivil a la Coop Oltre
Este n joen anter i 18 e i 28 egn? Veste te arvejinèr al mond del lurier e fèr na bela esperienza? Gei a veder l projet de servije zivil portà dant adum da Maso Toffa e Projet Ensema. Se pea via al prum de jugn e l'é temp per se scriver ite enscin ai 30 de oril. Te pes troèr duta la informazions sul sit: www.oltre.coop.

Dotors y Apoteches
Dotors
L dutor de servisc te Gherdëina da n sada ai 28.4. dala 8.00 daduman nchin la 8.00 daduman de n lunesc ai 30.4. ie l dutor Simon Kostner de Sëlva, tel. 347 2297492. Dopro ie de servisc nchin n mierculdi dala 8.00 daduman l dutor Valentin Tröbinger de Sëlva, tel. 0471/773073 o l 335 6844944.
L'apoteca che ie de servisc per Gherdëina, ora dl orar ordiner de giaurida, da n vënderdi ai 27.4. nchin n vënderdi ai 4.5. ie chëla de Ciastel, tel. 0471/706323 (orar: lu-ve 8.30-12.00/15.00-19.00, sada 8.30/12.00. Turnus: sa. 8.30-12.00/16.00-19.00, du. 10.00-12.00).
Doturs Val Badia: Le dotur en sorvisc ti cin' comuns dla Val Badia, tl fin dl'edema di 28 y 29 d'aurí, é le dotur Luca Galiazzo, tel. 342/5181295. Sura la festa dl 1. de ma sarál en sorvisc la doturia Margarete Mahlknecht, La Val, tel. 349/0667034 o 0474/523018.
Apoteches
L'apoteca de servisc tla zità plu daujin ie ntan chësta ena la "Hofapotheke" a Persenon, pitla Laubes 2, tel. 0472/835642.
L'apoteca en sorvisc tla Val Badia, fora dl orar ordinar, dal vëndres ai 27 d'aurí dales 19:00 al vëndres ai 4 de ma ales 19:00, é chëra d'Al Plan, tel. 0474/501240.

Religion
Pelegrinaje a Plaus
Organisé dala Uniun dles Porsones Vëdues y Sores dla Val Badia, en jöbia ai 24 de ma. An jará tla dlijia de Santa Monica a Plaus.
Laía mëssa cun siur degan Iaco Willeit. Iade cun bus dala Val Badia y marëna costa 45,00€.
Informaziuns y prenotaziuns anter i 20 de ma pro la rapresentanta de paisc o al numer 0474/590069.

Galaria retrac