Manifestazions atuales speziales

Data

27 de auril 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 27 de auril
Cursc da arpizé
Ai 9 de ma mët man a San Ciascian n curs da arpizé de 8 incuntades, por mitans y mituns dla scora elementara
Le Zënter Families Ergobando, en colaboraziun cun la US La Ila, organisëia n curs da arpize por mitans y mituns dla elementara. An mët man en mercui ai 9 de ma y le curs döra indöt 8 incuntades. I prinzipianc s'incunta dales 16:00, progredis dales 17:00, dagnora de mercui y vëndres. Referënt é Lorenz Clara. Le curs vëgn tigní tl Hotel Störes a San Ciascian. Tó pert pó cina 8 mituns por grup. Infos y prenotaziuns pro Lorenz al 348/4773937.

N gran gigant da orëi bun
A La Ila vëgnel proieté ai 4 de ma "Il Grande Gigante Gentile"
Le Consëi Cultural tl Comun de Badia inviëia dantadöt mitans y mituns dala scora elementara inant ala proieziun dl film d'animaziun dla Walt Disney "Il Grande Gigante Gentile - GGG", en vëndres ai 4 de ma dales 17:00, tla Ciasa dla Cultura a La Ila.
Le film cunta de na möta che vëgn rapida da n orfanotrofe da n gigant. Insciö imparera da conësce n gran amich.

Shanti Powa Orchestra
En vëndres, ai 4 de ma dales 21:00 él söl program tl Zënter Cultural SaJ.un a La Ila le proscim conzert dla seria "1.st.Friday.live.session@SaJ.un", en chësc iade cun le grup conesciü "Shanti Powa Orchestra"
Te chësta ocajiun gnarál presenté l'album nü dl grup "Til insanity". Chësc album á i Shanti Powa Orchestra dé fora da püch y al é por düc na bona ocajiun da gní a d'ascuté sö toc daldöt nüs.
Le grup Shanti Powa Orchestra é nasciü dl 2010 sciöche "soundsystem" y s'á svilupé tl tëmp te n grup de 11 musizisć. Cun sü 9 strumentalisć y dui ciantarins, scriai sües cianties fora de n mix de reggae-crossover, rap, ska, dancehall, funk y rock. Y ai ne lascia mai sté chit le publich!
Cianté vëgnel por inglesc, talian, franzesc y todësch. Söl palch é i musizisć plëgns de energia, cun musiga che cheriëia na atmosfera unica. Tratan so tru á i Shanti Powa Orchestra soné plü iadi pro manifestaziuns te döta l'Europa, p. ej. Rototom Sunsplash (ES), Overjam (SL) y Reeds (CH) y cotan d'atres. Pro chisc conzerc ái partí le palch cun artisć sciöche Max Romeo, The Gladiators, Israel Vibrations, Dub FX, The Skints, Luciano, Inner Circle y tröc d'atri.

"Social Media Marketing" por progredis
Ai 3 de ma a La Ila n curs por Facebook y Instagram
Le "social media marketing" pîta la poscibilité da avëi na presënza "social" sön les plataformes prinzipales, da cherié contignüs che pó gní partis y dá inant dai utënc, da svilupé n raport danter marca y utënt te na manira che la marca vëgnes insciö plü conesciüda.
N manager de "social media" mëss savëi da lauré fora plans de comunicaziun sön les plataformes soziales, da gestí aziuns de reclam, da analisé i dac prinzipai y da mantigní le bun inom dl'aziënda o dla marca, ince tl caje de na crisa. Sü dovëis é danter l'ater chël da lauré fora le plan strategich, da arjigné ca na linia editoriala, da trá ite y mantigní le contat cun i utënc, da proieté y gestí inserac sponsorisá y inultima mëssel ciamó savëi da analisé i resultac.
Le curs vëgn tigní la jöbia ai 3 de ma dales 20:00, tla scora mesana da La Ila. Referënta é Alessia Sorá. An ne mëss nia se prenoté, al basta se presenté en chë sëra. Organisaziun: Consëi de Formaziun Badia

Vin - imparun da conësce chësc monn
Ai 8 de ma a La Ila na sëra cun la degustaziun de trëi sorts de vin, spligaziun dl sorvisc y valutaziun
Al vëgn organisé na sëra, olache al vëgn ciarcé trëi sorts de vins, cun spligaziun dl dër sorvisc, valutaziun y cun n confrunt. Chësc gnará fat ai 8 de ma dales 20:00, tl salf panoramich dla Ciasa dla Cultura a La Ila. La sëra gnará tignida por talian y le numer di partezipanc é limité. Le prisc é de 25,00€ a ce. Chi che foss interessá, dess prëibel scrí a nikfuma@gmail.com o contaté le 331/8876738.

Cëna cun teater criminal - "Vin malsann"
Rejia de Erika Castlunger, cun Ellen Alfreider, Pepi Costner, Sara Moling, Andreas Peccei, Tobias Stampfer, Susann Tavella
Le Consëi de Formaziun dl comun de Corvara mët a jí en sabeda 5 de ma dales 19:30 tl salf dles manifestaziuns a Corvara na cëna cun n teater criminal, olache le publich é invié da stomé che che é l'assassin dla storia, che sará da odëi tratan cëna sön paladina.
Le menü dla sëra é: aperitif, rijoto cun erbes de munt, cern de videl sön sossa de Lagrein cun piré de soni y ajet y verzöra, macedonia cun dlacin.
Le cost dl teater y dla cëna é de 40,00€, por informaziuns y prenotaziuns él da cherdé sö Sonia al nr. 349/1588485 cina ai 30 d'aurí.

Baratada de ciüfs, pelzes y somënzes
En lönesc ai 7 de ma dales 20.00, tl salf di stödafüch a San Martin. Söl program ince n referat cun na esperta
La Uniun dles Patrones dl Comun da San Martin organisëia en lönesc ai 7 de ma la baratada de ciüfs, pelzes y somënzes, te salf di stödafüch da San Martin. La serada mët man dales 20:00 cun n referat de Hildegard Kreiter, esperta de erbes aromatiches y apascionada de urt. Ara baiará dl tema "Im Garten und in der Natur, dem Power-Grünzeug auf der Spur", olache ara ó dé consëis sön laurs t'urt y co adoré i produc de nüsc urc, da erbes cina a verzöres.
Do le referat él la baratada. Portesse para ciüfs, pelzes o somënzes ch'i n'adorëis nia plü denanco les sciuré, y gnide a se do ci che ves mancia. Le patüc é da dé jö pro la portina dl salf di stödafüch dan le referat, dales 19.30 inant (poscibilmënter scrí sö ci sort de ciüf che al é). An pó ince gní sce an n'á nia val' da porté. Val' ciafon sigü da se tó para, sön na picia spënora.

1. Boulder Event a La Ila
Tl local Saj.un a La Ila vëgnel tigní en vëndres ai 4 de ma na competiziun cun plü staziuns
Le Sorvisc ai Jogn inviëia por le vëndres ai 4 de ma dales 18:00 ales 21:00, al 1. Boulder Event, na competiziun a staziuns tl local dl zënter Saj.un a La Ila. Al vëgn fat categories de ëi y ëres, y tó pert pó alplü 30 partezipanc (dai 16 agn insö). Iscriziuns cina ala jöbia ai 3 de ma tres sms al nr. 335/5400890 (Valentin). L'iscriziun costa 10,00€, cun lapró na boanda y lotaria. Dales 21:00 vára spo inant cun musiga dal ví cun la "Shanti Powa Orchestra".

"Irish nights
N dumënia ai 6.5. dala 18.00 tla Cësa de Cultura de Sëlva
Na sëira cun mujiga irlandeja prejenteda dai Flat Caps, cor de Bulsan sot ala direzion de Aaron Demez cun i Rambling Pitchforks, band irlandeja de Bulsan, acumpanieda da Eva Vinatzer (tlavier) y Maicol Demetz (percuscion).
Do l gran suzes a Bulsan y a Gargazon, vën i Flat Caps cun la band irlandeja "The Rambling Pitchforks" śën nce te Gherdëina per prejenté si proiet de mujiga irlandeja "Irish Nights" y ve tol pea sun n viac tres l'ijula vërda dl nord. Cun strumënc tipics dl'Irlanda vëniel sunà mujiga tipica, moderna y folk. Na sëira de bona ueia y da mprescions nueves.
Dopro After-Show-Party cun Monpiër y DJ Uwe.
Chertes danora, al priesc de 15 €, pòssen apusté cherdan su l 344 3836486.

"La spersa"
Mostra di cumëmbri dl cunsëi dla Lia Mostra d'Ert. Giaurida ncuei vënderdi ai 27.4. dala 20.30 tla sala dl Circolo a Urtijëi
Dodesc cumëmbri dl cunsëi dl Circolo/Lia Mostra d'Ert meterà ora lëures d'ert, che à da n fé cun l titul dla mostra "La spersa", che possa vester la pert sëuravia de zeche, p.ej. de na mëisa, de n parëi o dla tiera. Uni cossa, planta o tier à na spersa - che possa vester la pel o povester nce l'aura. La spersa possa vester fina, mujela, grovia, sutila, grossa, cun o zënza culëur. Dlongia l senificat de spersa coche pert dedoravia de zeche, uel la parola nce dì la lerch che zeche à, per tudësch "Fläche" o per talian "area". Coche udon possa la parola "spersa" unì nterpreteda te plu manieres y chël puderàn nce udëi te chësta mostra dl cunsëi dl Circolo, cun lëures de Adam Demetz, Silvia Demetz, Sophie Eymond, Mirko Insam, Andreas Kondrak, Medea Moroder, Hannes Mussner, Fabio Perathoner, Simon Perathoner, Christine Runggaldier, Patrick Senoner y Sofia Stuflesser. La mostra resterà davierta nchin ai 13.5. uni di dala 10 ala 12 y dala 16 ala 19. De lunesc resta la mostra dsareda.

La chitara, mi plu bel strumënt
Fé pea nce tu y vie a suné la chitara! N juebia ai 17 de mei
Es'a ueia de suné dan n publich sun ti plu bel strumënt, la chitara? La lia "Tublà da Nives" mët a jì na sëira dedicheda ala chitara y a si bela cianties. De plu sunadëures y ciantautores lascerà audì "covers" y/o si cumposizions.
Palch liede per mujiga d'uni sort cun pasciunei dl bel sonn dla chitara.
Es'a nteres a fé pea? Duc i nteressei, pitli y granc, amatëures y prufesciunisc', ie priei bele de mandé na email a info@tubladanives.it o cherdé su l numer 348 3380455.
Tublà da Nives - tlo se anconta cultura.

"Ne n'é nia dl'aurela de avëi dl'aurela"
Na sëira de paroles y mujiga danter i zogri dl tëmp te "Tublà da Nives"
L ie n titul pruvocant, povester mé n juech de paroles chël che l scritëur Marco Forni à cris ora per chësta sëira. Nëus duc messon suvënz se viver ite te chësta prëscia da uni di, nosc uedl toma mez l tëmp sun l'ëura, l semea che son for massa tardives, ma sce n se tulëssa pa datrai dl'aurela de se senté ju y paussé pona jìssela pa bën ënghe. Tan inant ne dassëssela bën no ruvé che n muessa propi se damandé sce n à pa mo dl'aurela de se tò dl'aurela? La sëira unirà abelida dal duo Malfertheiner-Miglioranza, che se viverà ite tl argumënt musicalmënter.
Chëi che à dl'aurela ie nviei a unì n vënderdi ai 4 de mei dala 20.00 te Tublà da Nives te Sëlva.
La manifestazion toma ite tl proiet "Ti dé tëmp al tëmp" y vën metuda a jì dal Tublà da Nives, la Bibliotech de Sëlva y l Istitut Ladin. Nfurmazions dl proiet abìnen sun www.manif.it y www.facebook.com/furmaziongherdeina sciche nce sun de plu stampac.