Manifestazions atuales speziales

Data

04 de mei 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 04 de mei
"Euforia"
Chësc é le titul che la Musiga da La Val á chirí fora por so conzert d'aisciöda, söl program ai 12 de ma
La Musiga da La Val á le plajëi da invié a so conzert d'aisciöda, che gnará tigní en sabeda ai 12 de ma dales 20:30, te palestra da La Val. Sot al titul "Euforia" gnarál pité n program de 8 toc nüs. Danter chisc podarán aldí "Virginia" de Jacob De Haan y "Hymn to the Fallen" de John Williams, aranjé da Paul Lavender, n toch por recordé i 100 agn dala fin dla Pröma Vera. Soné gnarál danter l'ater "Robin Hood - Prince of Thieves" de Michael Kamen (ar. Erick Debs), y le toch de conclujiun "Euphoria" de Martin Scharnagl. Danter la pröma y la secunda pert sarál l'ocajiun da surandé valgünes onoranzes.

La Musiga da Rina inviëia a conzert
Le conzert d'aisciöda vëgn tigní en sabeda ai 5 de ma a Rina
La Musiga da Rina invieia düc dër bel al conzert d'aisciöda, che vëgn tigní la sabeda ai 5 de ma dales 20:30, tl salf dles manifestaziuns dl paisc. Al sará n program che va da marces a melodies de ABBA, y sambëgn ince polches. Al sará ince l'ocajiun da surandé a plü membri dla uniun onoranzes por i agn de ativité.
La Musiga tol chësta ocajiun ince por i dí n dilan a döta la comunité por le sostëgn finanziar che ara ciafa ia por l'ann.

Dé Internazional tl Museum Ladin
Por le De Internazional di Museums, vëgnel ai 13 de ma pité manifestaziuns particolares tl Museum Ladin Ciastel de Tor y tl Museum Ladin Ursus ladinicus
A San Martin pitunse la rapresentaziun teatrala por mituns "Rosalinda, la stufosa", portada dant da Veronica Irsara, Silvia Liotto y Roland Pizzinini, cun rejia de Erika Castlunger, la scenografia y les mascheres de Barbara Tavella. Les rapresentaziuns é dales 14:30 y dales 16:30.
Dër interessanta é ince la manifestaziun a San Ciascian. Dailó esplorunse reperc: cun n microscop pón ciaré plü avisa sciöche n element dla natöra é fat. Tolésse para n obiet y nos l'analisun: n os, na fëia, n mineral. Da aconsié a döta la familia, dales 10:30 - 11:15, 14:30 - 15:15, 15:30 - 16:15.
L'entrada y le program por intrami i museums é debann.
A San Ciascian é le museum davert dales 10 ales 18, a San Martin dales 13 ales 18.

La variora da proteziun
Sëra de informaziun, en jöbia ai 10 de ma a La Ila
Fá la variora é un di intervënc plü importanc por la sanité dla popolaziun! Ti ultims agn, bonamënter deache tröc á metü man da ne lascé nia plü fá la variora, y por les porsones che vá plü saurí co denant da n post dl monn al ater, vëgnel indô sö maraties ch'an minâ d'avëi eliminé.
Les variores adoron sciöche proteziun de nos instësc y de chi che vir incër nos ia! Le suzes di programs de vazinaziun depënn porchël dala colaboraziun de vignun por podëi garantí le bëgn de düc.
La sëra de informaziun y de sensibilisaziun vëgn tignida en jöbia ai 10 de ma dales 20:00, tla scora mesana da La Ila. Referënta é la doturia Livia Borsoi dl Ofize de Igiena dl Ospedal da Bornech, che portará dant la tematica te na manira tlera, aprofondida y saurida da capí. Organisaziun: Consëi de Formaziun dl Comun de Badia.

Rosalinda, la stufosa
Teater por pici y gragn
La vacia Rosalinda mina da savëi sciöche i atri tiers y le paur á da s'astilé, tres ára val' da critiché y ara brontora döt le de. Le paur ne la tëgn nia plü fora y porchël ti cumprel na cherta dl fligher por l'Africa.
Le teater por pici y gragn é da odëi en domënia ai 13/05 dales 14:30 y dales 16:30 tl Museum Ladin a San Martin de Tor, en lönesc ai 14/05 dales 18:00 a Corvara tl salf dles manifestaziuns, en vëndres ai 25/05 dales 18:00 a Al Plan de Mareo tl salf dla Cassa Raiffeisen, en sabeda 26/05 dales 18:00 a La Ila tla Ciasa de Cultura y en domënia ai 27/05 dales 18:00 a San Martin de Tor, tl Istitut Ladin.
Sön paladina él Veronica Irsara, Silvia Liotto y Roland Pizzinini, la rejia é de Erika Castlunger, la scenografia y les mascheres de Barbara Tavella.

L vën cialà do la bombules da destudé l fuech
Duman sada ai 5.5. tl magasin di Destudafuech de Urtijëi
Nëus destudafuech raton che l sibe de gran mpurtanza avëi te cësa na bombula da destudé l fuech, da tò ca riesc te n cajo de bujën y pudëi nsci schivé suvënz n majer dann. Y acioche la bombula sibe bën da pudëi avëi canche l romp ora n meldefuech, cunsions de la lascé cialé do regularmënter.
I Destudafuech de Urtijëi pieta nce chëst ann l servisc de cialé do la bombules y plu avisa duman sada, ai 5 de mei, dala 8.00 nchin la 12.00 y dala 13.00 nchin la 15.00 tl magasin di Destudafuech tla streda Purger a Urtijëi.

"La Vëta" di dla porta davierta
N sada ai 12.5. ie duc nviei a unì a cunscidré y cialé o a udëi velch da nuef...
La lia nueva "La Vëta" nvieia al di dla porta davierta, a Urtijëi n sada ai 12.5. dala 9.00 - 12. 00 y dala 14.00 -17.30. L unirà mustrà te n valguna berstotes coche i lauranc de nosc artejanat artistich fej gën si lëur. Ulà pa:
da Gregor Mussner (Scizer), scultëur y ferlëigher, str. Tavela 34
da Alfons Runggaldier, scultëur-artist, str. Nevel 15
da Christian Stuflesser (Petlin), Guido y Flavio Goller, ferlëigher y scultëures y Sara Stuflesser che depënj chedri, str. Purger 42
da Gerald Moroder, scultëur-artist, str. Mureda 46
da Uli y Jessica Noflauner, nduradëures y moleri, str. Retia 360
tla firma Rari de Christof Rifesser, ferlëigher y lëura sun la mascins da ziplé, str. Socrëp 4
da Armin Grunt, scultëur-artist che lëura cun la sia a motor, str. Socrëp 4

"Ne n'é nia dl'aurela de avëi dl'aurela"
Na sëira de paroles y mujiga danter i zogri dl tëmp te "Tublà da Nives"
L ie n titul pruvocant, povester mé n juech de paroles chël che l scritëur Marco Forni à cris ora per chësta sëira. Nëus duc messon suvënz se viver ite te chësta prëscia da uni di, nosc uedl toma mez l tëmp sun l'ëura, l semea che son for massa tardives, ma sce n se tulëssa pa datrai dl'aurela de se senté ju y paussé pona jìssela pa bën ënghe. Tan inant ne dassëssela bën no ruvé che n muessa propi se damandé sce n à pa mo dl'aurela de se tò dl'aurela? La sëira unirà abelida dal duo Malfertheiner-Miglioranza, che se viverà ite tl argumënt musicalmënter.
Chëi che à dl'aurela ie nviei a unì n vënderdi ai 4 de mei dala 20.00 te Tublà da Nives te Sëlva.
La manifestazion toma ite tl proiet "Ti dé tëmp al tëmp" y vën metuda a jì dal Tublà da Nives, la Bibliotech de Sëlva y l Istitut Ladin. Nfurmazions dl proiet abìnen sun www.manif.it y www.facebook.com/furmaziongherdeina sciche nce sun de plu stampac.

"La Vëta", l liam nuef per nosc artejanat artistich
Prejentazion n juebia ai 10.5. dala 10.30 tl sotët dla Scola de Mujiga a Urtijëi
Scultëures, moleri y artisć, ferlëigheri, produzënc y marcadënc prejënta:
"La Vëta", l liam nuef per l daunì de nosc artejanat artistich, tl sotët dla Scola de Mujiga a Urtijëi sun Plaza de Dlieja, n juebia ai 10 de mei 2018 da mesa la undesc danmesdì.
Sëis duc nviei!