Manifestazions atuales speziales

Data

25 de mei 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 25 de mei 2018
Segra da Bula
N dumënia ai 27 de mei iela inò tan inant
Dala 9 daduman cianterà l Cor de Dlieja la Santa Mëssa sot ala direzion de Elisabeth Delago.
Do mëssa uniràl dat ora crafons y zeche da bever sun plaza de dlieja.
Dala 3 domesdì tenirà la Mujiga, sot ala bachëta de Karoline Hempel, si cunzert tradiziunel dla Segra. Sce l ëssa da vester bur' tëmp unirà dut cant spustà tl local dala proes tla vedla scola elementera bas ite.
Se ncunferton sun Vosc unì.

Festa per stlù ju l'Enes dla Familia
Chësta dumënia ai 27.5. sun Mont de Pana
N scumencerà bele dala 9.45 cun n "fotoshooting" per la families pra la ntreda dla Panaraida. Dala 10.30 saràl la mëssa alalergia cun Pater Meinrat tl zënter de pudejé. Dala 11.15 puderàn jì a pië pësc tl lech iló dessëura cun chëi dla Lia dai Pësc che mustrerà coche n fej y dajerà vel'cunsëi. Ma maië y da bever giaperàn da mesdì tl zënter de pudejé y da dedò saràl mo da fe juesc per la families cun l VKE y na desmustrazion dla grupa dai cians "Alpine Dogs". La festa unirà stluta ju cun la premiazion dl quiz sun la bibia y ala fin uniràl mo partì ora na pitla scincunda a duta la families.
Sce l ëssa da pluëi:
dala 10.30 mëssa per la families cun Pater Meinrat te dlieja de S. Cristina y dala 11.30 marënda per duc deberieda te sala de chemun a S. Cristina.

Gherdëina, n viac ti tëmps passei
N sada ai 26.5. dala 17.00 tla Cësa de Cultura a Urtijëi, prejentazion dla publicazion nueva
L Museum Gherdëina à dat ora n liber nuef (Edition Raetia) che conta la storia de Gherdëina, dai milions de ani de evoluzion dla Tiera ai milesc de ani de preustoria dla valeda nchin ai catercënt ani de tradizion tl'ert. N viac tl tëmp, che se stiza sun la culezion dl Museum a Urtijëi. La prejentazion unirà fata dala diretëura dl Museum, Paulina Moroder, che à nce curà la publicazion cun la cunlaurazion de Gretl Senoner. I tesć ie unic scric da de plu autores esperc dla culezions y di esponac defrënc. Chisc autores sarà prejënc y rujenerà tl cuntest dla moderazion de Roland Verra.
La parola arà nce de plu autoriteies y danterite puderàn audì la grupa "Chëifree Jazz"; daldò ie duc nviëi a fé na viva.
Per l'ucajion ie l Museum tla Cësa di Ladins daviert dala 14.00 nchin la 16.30; la ntreda ie debant. Chësta manifestazion fej per dl proiet "Ti dé tëmp al tëmp".

Maratona "Tru di pra"
Le paisc da La Val, che é gnü reconesciü paisc dl jí a pe, organisëia la sabeda ai 2 de jügn por le terzo iade na picera maratona por düc i amanc dla natöra. Da sëra conzert cun "Me and Marie"
Pro chësta maratona ne cunta nia tan le tëmp, mo plücoater la belëza dla contrada y i mile corusc dla natöra, che an pó amiré tratan chësc de. Dales 9:00 pëion ia dal zënter dl paisc por jí cuntra S. Berbura, Ciablun, Runch y Biëi, rovan cina sö dala Crusc da Rît y jí spo cuntra Ciamplorët. Da chiló demez do le tru nr. 15B röion cina sö La Crusc, por gní fora y jö por i pra de Armentara cina Al Bagn y zoruch te paisc. La lunghëza dla maratona por i escurjionisć é de 23km por n dislivel de 820m. Al vëgn organisé plü staziuns, olache al vëgn dé fora da mangé y da bëre y al ne manciará nia intratignimënt y de vigni sort de ativités. Implü vëgnel metü a desposiziun n sorvisc de trasport, por chi che oress fá n percurs plü cört. Le de se stlüj jö cun le conzert dl duo "Me and Marie" dales 21:00, tl zënter de paisc. La cherta por le conzert costa 15€, por i partezipanc ala maratona sará l'entrada debann. Les iscriziuns por la maratona al prisc de 45,00€ pón fá por email a laval@altabadia.org o diretamënter sön la plata internet www.laval-altabadia.com

Alta Badia Balance!
Le festival dediché ala sanité, al sport, al ecuiliber dla porsona tla vita da vignidé y cun la natüra
Dai 7 ai 10 de jügn sarál la secunda ediziun dl festival "Alta Badia Balance", n evënt che porta adöm profescionisć, esperc y apascioná locai y da foradecá che pitará referac, workshops y cursc por amanc dl bëgnester, dl sport, dla natöra y dl yoga.
Al sará n gröm de ativités che pó ispiré a vire sagns, ecuilibrá, en armonia cun se instësc y cun l'ambiënt. Sön le program él workshops de pilates-crossfit y de plü sorts de yoga; workshop de slackline, n curs da s'arpizé y n referat sön i prighi dla munt y le pröm aiüt. Al gnará baié de ecuiliber ambiental y de permacultura, por imparé da organisé l'urt en armonia cun la natöra.
An podará porvé da trá cun l'erch y les tecniches pur suravire tla natöra. Sambëgn sarál ince ativités plü meditatives sciöche le Qi Gong, 5 Tibetans® y tröp d'ater!
Por i plü pici sarál workshop interativs, creatifs y didatics y por se relassé podarán se lascé fá massaji Shiatsu, de reflessologia y infujiuns de gong y i.i..
Al sonará i Ukulele Lovers, Perin & Barbarossa, Waira y i New Folder y al sará ince n bagn de gong por düc, sön spënora lëdia.
Da mangé sarál de bun patüc cun ordöres bio de Biokistl y i fajarun n festival a impat ambiental minim, ciaran da smendrí la produziun de refodam y tignan la natöra nëta.
Ví a nes ciafé al Sass Dlacia, lascet'la jí bona y dëidesse da lascé le post romené sö y bel nët. Dötes les informaziuns sön le festival, söi cosć y i ajornamënc é sön la plata internet www.altabadiabalance.com

Wisetime&Pëufla tl Saj.un
Tla cornisc dl "1.st.friday.live.session@SaJ.un" sonará en vëndres al 1. de jügn dales 21:00 i grups "Wisetime" y "Pëufla"
Le grup "Wisetime" é incö n grup de sis jogn, metü sö ti pröms mëisc dl 2011 da, "Guz" Gustav Mangutsch y "Tepo" Stefan Piccolruaz de Badia, che â bele da plü tëmp le dejidere da mëte adöm n grup nü 'cover', por i dé indô vita a de vedles cianties rock y oldies nia plü tan ascutades o ince jüdes a perde cun le passé di agn. Le grup é defata gnü conesciü tla Val Badia y á ciafé tröpes ofertes da soné te locai y pro festes alaleria.
I Pëufla é n grup rock - pop dër aprijé de Gherdëna, atif da passa 23 agn. La band, metüda adöm da 5 mëmbri, sona cianties por inglesc, talian, todësch y ladin componüdes da ëi instësc y cover de d'atri grups. Cun usc, tastiera, chitara, bas y percusciuns.

Rosalinda, la stufosa
Teater por pici y gragn, ultimes rapresentaziuns
La vacia Rosalinda mina da savëi sciöche i atri tiers y le paur á da s'astilé, tres ára val' da critiché y ara brontora döt le de. Le paur ne la tëgn nia plü fora y porchël ti cumprel na cherta dl fligher por l'Africa.
Le teater por pici y gragn é da odëi incö vëndres ai 25/05 dales 18:00 a Al Plan de Mareo tl salf dla Cassa Raiffeisen, en sabeda 26/05 dales 18:00 a La Ila tla Ciasa de Cultura y en domënia ai 27/05 dales 18:00 a San Martin de Tor, tl Istitut Ladin.
Sön paladina él Veronica Irsara, Silvia Liotto y Roland Pizzinini, la rejia é de Erika Castlunger, la scenografia y les mascheres de Barbara Tavella.

Melodies d'aisciöda a San Martin
Le conzert d'aisciöda dla Musiga da San Martin é söl program por en sabeda ai 26 de ma dales 20:30 tl gran salf a San Martin de Tor
La Musiga da San Martin de Tor presentëia ai 26 de ma i toc impará ite ti ultims mëisc. Sot ala direziun de Sepl Pezzei podarán aldí n conzert te döes perts. Tla pröma gnarál porté dant i toc "So schön ist Blasmusik" de Erich Becht - aranjé da Martin Scharnagl, "Hoch Heidecksburg" de Rudolf Herzer, "Träumerei" de Mark Sven Heidt, "Hindenburg" de Michael Geisler y "Böhmische Liebe" de Mathias Rauch. Tla secunda pert gnarál soné "Conquest of Paradise" de Vangelis - aranjé da Ron Sebregts, "Eighties Flashback" aranjé da Paul Murtha, "Moment for Morricone" de Morricone y de Mey y "Abel Tasman" de Alexander Pfluger.
Cun ligrëza Ves inviëia düc i mëmbri dla Musiga a passé na sëra cun de beles melodies.

Trus - conzert cun "cantus iuvenis"
Le cor da Viena "cantus iuvenis" - sot ala direziun de André Comploi - röia indô te Südtirol. I ciantarins jogn se presentëia cun n conzert dal titul "Trus", en vëndres al 1. de jügn dales 19:30 tla Ciasa Ragen a Bornech y en sabeda ai 2 de jügn dales 20:00 tla Ciasa J. B Runcher a Badia
Le program da corusc se dá cun i trus desvalis dla vita, tres stils musicai desvalis. Sciöche al é usanza pro le cor, vëgnel ince presenté de plü toc ladins. Ince chësta ota sarál da aldí n toch scrit aposta por le cor, che gnará porté dant por le pröm iade: "Le lisció" cun parores de Iaco Rigo y la musiga de Iarone Chizzali.