Manifestazions atuales speziales

Data

01 de jugn 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 01 de jugn
"Alta Badia Balance" pëia ia
Dai 7 ai 10 de jügn cater dis sot al sëgn dl bëgnester dla porsona y so ecuiliber tla vita y cun l'ambiënt. L'inauguaziun ai 7 de jügn tla Ciasa dl Cultura a La Ila. Söl program de chisc dis él workshops, referac, musiga, y ince n program por mituns
L'edema che vëgn, ai 7 de jügn, éra tan inant: al mët man le festival Alta Badia Balance, dediché ala sanité, al bëgnester dla porsona y a so ecuiliber tla vita da vignidé y cun l'ambiënt. L'inauguraziun dl festival sará en jöbia ai 7 de jügn dales 19:30 inant, tla Ciasa dla Cultura da La Ila. Al gnará presenté le program y al gnará pité le pröm referat metü da jí en colaboraziun cun le Consëi de Formaziun dl Comun da Badia, sön le "Confrunt danter agopuntura y reflessologia", cun la doturia Ilona Bauer da Ciastel y le reflessologh Fiorenzo Libero da Padua (l'entrada é lëdia). Atira dedô sarál na picia festa de inauguraziun, cun aperitif y na sesciun musicala cun vinili de Tnt Aleonce.
Dai 8 ai 10 de jügn jará spo le festival inant tl raiun pic-nic dl Sass Dlacia (Sciaré) a San Ciascian, olache al gnará pité workshops y referac de vigni sort, che pó ispiré da vire sagns, ecuilibrá, en armonia cun se instësc y cun l'ambiënt. Al ne manciará nia la musiga (New Folder, Waira, Perin y Barbarossa, The Ukulele Lovers...) y n program por mituns.
Ai 8 de jügn dales 20:00 sarál n referat sön la chiropratica tla Ciasa dla Cultura da La Ila cun le Dr. Luca Palatini (debann). Le program cun dötes les informaziuns sön ativités, cosć, iscriziuns ai workshops y referac é sön la plata internet www.altabadiabalance.com. I ajornamënc gnará publicá sön la plata Facebook Alta Badia Balance. I se confortun da s'odëi tröc.

Musiga jazz por pici y gragn
Badiamusica inviëia ales serades cun l'Ensemble Panama da Minca, che pîta le conzert-musical "Die Pecorinos - Ein Krimi-Mäusical", cun la pröma pert a Badia y la secunda a Al Plan. La musiga é gnüda premiada cun le pest "Poldi" - Leopold Medienpreis. Sön paladina ince Lucia Kastlunger d'Al Plan
L'Ensemble Panama da Minca inviëia dër bel a so conzert-musical "Die Pecorinos - Ein Krimi-Mäusical" - na storia sonada y ciantada por todësch, te döes perts: la pröma pert sará en sabeda ai 9 de jügn dales 18:00, tla ciasa J. B. Runcher a Badia, la secunda pert en domënia ai 10 de jügn dales 18:00, tl salf dles manifestaziuns d'Al Plan.
Pröma pert a Badia
Les sorüces da orëi bun dl grup jazz "Pecorinos" vëgn acüsades zënza gauja da avëi arobé ciajó. Por chël toleres sü stromënc, la buna löna y n gröm de bela musiga y s'un sciampa da Liverpool demez, tres London a Paris.
Les cin' sorüces Danny, Dizzy, Charly, Mick y Paul s'un sciampa sö y jö por l'Europa, ciaciades dal iat comisar K. y da so fant Henry. Por fortüna ti tomel ite a Billy, la ciantarina dl grup, na idea che metará le grup al sigü... por le momënt.
Secunda pert a Al Plan
Les sorüces inozëntes vëgn intres ciamó ciaciades dal iat comisar K.! Ares s'un sciampa tres le süd dla Francia cina a Rio De Janeiro, olache la cité dl amur y dl carneval fej bate plü dassënn le cör de tröpes sorüces! Ti garatarára indô a nostes sorüces da s'un sciampé?
Le musical
Al é n pot-pourri interessant de beles balades y de aranjamënc movimentá, scric dal componist Franz David Baumann, cun tesć de Henk Flemming y Doris Eisenburger. Chësta musiga é gnüda scrita cun l'idea da ti fá conësce la musiga jazz al publich. I ritms pop, jazz, swing, ragtime, bossa nova y musette fej gní vëia da balé impara a pici y gragn! Te chësta ocajiun sarál ince da aldí la ciantarina jazz Lucia Kastlunger d'Al Plan, che ciantará deboriada cun Barbara Mayer y Matthias Boguth. Sön paladina ince Henk Flemming (moderaziu y presentaziun, cianté), Franz-David Baumann (trombëta y cianté), Stefan Schreiber (saxofon, clarinet), Volker Giesek (clavier), Alex Haas (cuntrabas) y Johannes Friebel (bataria). Badiamusica se conforta da s'odëi düc canc!

"N iade y l'anima"
Chësc é le titul dl liber de poesies de Cristina De Grandi, che vëgn presenté en mercui ai 6 de jügn a San Martin de Tor
L'Istitut Ladin Micurá de Rü inviëia dër bel ala presentaziun dl liber de poesies "N iade y l'anima", scrit da Cristina De Grandi y ilustré cun pitöres de Alfred Tavella. La presentaziun vëgn tignida en mercui ai 6 de jügn dales 20:30, tl salf dl Istitut a San Martin de Tor. Al sará na serada de poesia, ert y musiga, cun tesć portá dant dal'auturia y da Roland Verra, na mostra di chedri de Alfred Tavella y musiga de Alessandro Trebo.

Galaria Ghetta: Sense and Sensibilia
Giaurida dla gran mostra cun plu artisć tla Galaria Doris Ghetta a Puntives, ncuei vënderdi ai 1. de juni dala 19.00. Duc ie nviei de cuer
Ncuei vënderdi iel ora Puntives la giaurida dla mostra „Sense and Sensibilia", cun i curadëures Luigi Fassi y Chiara Nuzzi. L ie da udëi opres de diesc artistes y artisć jëuni: Sabrina Belouaar, Jeanne Berbineau Aubry, Gillian Brett, Gaetano Cunsolo, Eitan Efrat y Sirah Foighel Brutmann, Haroon Gunn-Salie, Hilario Isola, Lito Kattou, Marzena Nowak y Luca Resta.
L titul y la tematica drët nteressanta dla mostra vën ora dal scrit dl filosof J.L. Austin "Sense and Sensibilia", che ie unì publicà posthum, do si mort, tl 1962, ulache l trata la tematica dla perzezion y dla relazion danter la nfurmazions coche nëus les tulon su, cun nosc sentì, y la cosses reéles. La va de urità, de sëmies, ma nce de aluzinazions permez ala realtà ogetiva. N curt iel l raport danter l mond subietif y chël obietif. Na filosofia de y tres la rujeneda, che i artisć jëuni tol su te si opres da udëi te Gherdëina, tla mostra che vën giaurida nsnuet.

Mesa maratona ntëur Saslonch
N sada ai 9.6. cun pië via y travert sun Pana/Ciandevaves
"Dolomites Saslonch Half Marathon" ie la formula nueva dla garejeda de sauté da mont su che vën metuda a jì chëst ann dai ASV Gherdëina Runners mpede l Val Gardena Mountain Run. L se trata de n percus de 21 km cun n deslivel de 900 metri ntëur la grupa dl Saslonch, te na cuntreda de marueia.
Fé pea possa sibe atlec prufesciunisć che chëi che sauta per hobby. La iscrizions ie da fé online jan ite sun la plata www.saslong.run. L vën pità n bel pachet de garejeda y da vëncer iel ënghe de biei pesć.
Sambën ie nce duc i autri nviei a unì a cialé pro a fé tifo ai atlec che fej pea. Pià via vëniel dan l Hotel Cendevaves ntëur la 10.45 y ntëur la 14.00 saràl iló nce la premiazion y ntan dut l di giaperàn iló nce velch da bever y da maië.

Reunion Generela dl FC Gherdëina
N merdi ai 5.6. dala 20.00 tla sala dl Chemun de S. Cristina. Vela dl cunsëi nuef
Sun l ordn dl di iel l salut dl presidënt Michael Platzgummer y la relazion dl'atività fata cun la scuadres defrëntes. L sarà i reprejentanc de chemun che tulerà la parola per passé pona al rëndicont de cassa cun dé pro dl bilanz y desćëria dl vedl cunsëi. Pra la descuscion aràn ucajion de purté dant prupostes y critiches, dan che n passerà pona a prejenté i candidac per la veles dl cunsëi, che menerà la lia ti doi ani che vën. Dé ju la stima possa duc i cumëmbri dl FC Gherdëina che à bele cumplì i 16 ani, sciche nce un n genitor per uni mut/a scrit ite. L vën nce tëut su gën mo prupostes de candidac.
Duc i cumëmbri, simpatisanc y amatëures dl juech al palé ie nviei de cuer.

Manieres de fé cumpost nstësc
N sada ai 2.6. dala 16.00 tla sënta dla Lia Sanynton, str. La Sëlva 101
Referat sun l argumënt "Kompostiermethoden, ganzheitlich & einfach". L vën spiegà tla pratica y cun ejëmpli co fé cumpost. N giapa nfurmazions saurides da mëter n droa, ora dla filosofia dla permacultura, sibe per la cësa che per l verzon.
Pudon nstësc fé ciarbon y l fustejé. L ciarbon rënd la tiera plu rica jan dl viers dla "Terra Preta".
Se baraton ora esperienzes y nfurmazions.
Ala fin saràl mo n blòt sté deberieda cun pitla marënda. Duc tol pea na piculëza.
La grupa de lëur "Sanynton" nvieia duc a fé pea.

"Cronos e Kronos: La misura del Tempo e il tempo della Vita"
Museum Gherdëina - giaurida dla mostra cun cunferënza
L Museum Gherdëina nvieia ala giaurida dla mostra speziela cun cunferënza de Danila Serafini, sun i portaëura de Gherdëina per la borghesia europea, n vënderdi ai 8 de juno 2018, dala 18.00, tla biblioteca dla Cësa di Ladins y tl Museum Gherdëina.
Tla mostra iel metù ora n vint portaëura de lën, crisc ora aldò dla formes y dla mesures, dla nuzeda y dl tëmp de produzion, che va plu o manco dal ultim chert dl 18ejim nchin ala metà dl 19ejim secul. L'ëures à senià l passé via di avenimënc, les à regulà i ritms dla vita y les ie nce states simbul de paruda dl bënsté y dl prestisc soziel.
La mostra nes dà la puscibltà de prijé la cualità tecnica y l valor storich-artistich de chisc portaëura; defati, ie n valguni la esprescion de reflescions sapientes, d'autri, al incontra, à n stil scëmpl ma a uni moda elegant, coche per testemunië tan mpurtant che fova l sëniatëmp nuef y l manufat che l teniva.
Chësta scumenciadiva fej pert dl pruiet „Ti dé tëmp al tëmp", metuda a jì dai cunsëies de furmazion de Gherdëina.

Claus Vittur va de viac cun "unterwegs"
Giaurida dla mostra n juebia 7.6. te Tublà da Nives te Sëlva
L instà dla mostres mët man de juni cun n artist dla Val Badia. Claus Vittur (*1967) à fat la Scola d'Ert te Sëlva y a Urtijëi y à studià tl'Academia d'Ert Brera a Milan. Te na esposizion panoramica mostra Claus Vittur opres unides a s'l dé te spanes de tëmp criatif di ultims diesc ani. L titul "unterwegs" dà da ntënder che la se trata tlo de n viac che nëus coche usservadëures vivon pea tres chësta rafigurazions dla cuntreda. Se muvon tl tëmp y tl spazium, ala scuvierta de monc dedora y dedite, ma nce n viac tres formes d'esprescion artistica y mesuns esprescifs dla pitura. La maniera de raprejentazion fotorealistica da pludagiut vën giamieda ora cun n gest scialdi liede, cun chël che l culëur devënta na cuntreda viva.
La giaurida sarà n juebia ai 7.6.2018 dala 20.00 cun la ntroduzion artistica de Sabine Gamper. La mostra ie davierta uni di dala 16.00-19.00, de vënderdi nce da sëira dala 20.30-22.30; de lunesc réstela stluta. Nfurmazions nce sot a www.tubladanives.it.