Manifestazions atuales speziales

Data

13 de messel 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 13 de messel
5. Karl Unterkircher Award
Duman sada ai 14.7. dala 21.00 tla cësa de cultura de Sëlva
Chëla da chëst ann ie na edizion speziela, davia che l ie l 10. anuel dala mort de nosc bon cumpani y alpinist Karl Unterkicher. Per l pest da chëst ann possa la grupa de lëur prejenté cun legrëza i numinei:
- Simone Moro (ITA), Ali Sadpara (PAK) y Alex Txikon (ESP), per la prima arpizeda d'inviern dl Nanga Parbat (8.126 m, Karakorum, Pakistan) ai 26.2.2016.
- Ines Papert (DEU) y Luka Lindic (SLO) per la via nueva sun dlacia „Lost in China" dl Kyzyl Asker (5.842m) tl Kirgisistan (Cina) ai 11.1.2017
- Simon Gietl (ITA) y Marcel Schenk (CH) per la via "Amore di Vetro" prima arpizeda sun crëp y dlacia dl Pizzo Badile (3.308 m) tla Svizera ai 16.11.2016.

I alpinisć y si prestazions vën prejentedes duman sada tla cësa de cultura de Sëlva. La ntreda al "Award" ie debant.
Oradechël uniràl nce fat n funzion n lecort de Karl n dumënia ai 15.7. dala 11 danmesdì tla Capela S. Silvester te Val. Sce l ëssa da vester burt tëmp vën la funzion tenida te dlieja de Sëlva.

Vënerdi 13
Giaurida dla mostra dla Lia Artejanat Artistich de Sëlva ncuei vënderdi ai 13.7. dala 20.00 te Tublà da Nives
La Lia Artejanat Artistich de Sëlva à cris ora per la mostra da chëst ann la tematica "vënderdi 13". Aldò de vel'uni iel n di che porta desfertuna, per d'autri iel n di coche uni auter. I artisć che se à dat ju cun chësc argumënt y meterà ora si lëures ie Roland Perathoner, Patrick Senoner, Sigmund Linder, Otto Piazza, Samuel Perathoner, Leo Ferdinando Demetz, Ivan Lardschneider, Adolf Vinatzer, Hubert Mussner, Hugo Senoner, Hannes Mussner y Jonas Senoner. Oradechël iesi tl lëur de fé deberieda n gran lëur de 5 metri de autëza, che sarà ënghe da udëi te Tublà da Nives.
La mostra, che vën giaurida ncuei 13 de lugio resterà davierta nchin ai 5 de agost, uni di dala 16.00-19.00, de dumënia, merdi, mierculdi y vënderdi nce dala 20.30-22.30. Ai 15.7. iela davierta tresora dala 10.00-19.00

Doi dis de festa cun la Mujiga de S. Cristina
N sada y dumënia ai 21. y 22. de lugio, Segra de S. Cristina cun truepa de bela mujiga
Per la Segra dl luech mët la Mujiga de S. Cristina a jì tl Zënter Iman doi dis de festa cun mujiga y devertimënt per duc.
N sada ai 21.7. dala 6 da sëira scumëncia la festa cun la Böhmische de S. Cristina.
I Pamstiddn Kings sciauderà ite da sëira cun mujiga da druch. Ala fin jiràla mo inant cun mujiga DJ pra la party te tenda.
N dumënia, 22.7. di dla Segra, saràl la gran mëssa cianteda y do chël na defileda cun l cor, i guanc dala gherdëina y la Mujiga de Ciastel.
Tl zënter Iman saràl pona n "Frühschoppen" cun la Mujiga de Ciastel.
Dala 12.00 sunerà i jëuni de Ciastel y nce de Gherdëina dla grupa "6 Kraxn".
Inant jiràla cun Mattia Demetz, campion dl mond junior y vizecampion de suné l'armonica Steirische.
Dala 5 domesdì puderàn mo scuté su la sunedes dla cunesciuda "Holzfrei Böhmische".

Dala 9 da sëira, uniràl mo trat ora i pesć dla lotaria, ulache l ie da vëncer danter l auter n viac cun l bastimënt, n jol cun l joler y mo truep d'autri biei pesć.
Da maië y da bever ne manceràl sambën ënghe no, sciche nce i bon crafons da segra. Per i mutons saràl da garat juesc y velch da se devertì.
La Mujiga de S. Cristina se ncunforta sun duc chëi che vën ala festa.

Gherdëina Craft Beer Festival – n di ntier dedicà al pier!
Per l segondo iede vëniel metù a jì l Gherdëina Craft Beer Festival te Sëlva n sada ai 21.07.2018
Pra na cërcia de pieres defrënc saràl nce velch de bon da maië y de bela mujiga.
L pogram dl di scumëncia dala 11.00 danmesdì y va inant nchin la 12 de nuet:
dala 11:00 giaurida dla Festa
dala 12:00 "Frühschoppen" cun l Sellatrio
dala 14:00 desmustrazion de coche l vën fat pier
dala 17:00 mujiga dal vif cun "Louis & the Space Travellers"
dala 18:00 cërcia meneda de pier, ciajuel y ciculata
dala 20:00 premiazion dla miëura berstot dal pier dla festa
dala 21:00 mujiga dal vif cun i "Pëufla"
Ve aspiton te Sëlva, n sada ai 21 de lugio

Cunzert cun la grupa Ganes
N mierculdi ai 18.07. dala 21.00 te Sëlva sun Plaza de Chemun
La grupa cunesciuda dla "Ganes" se prejenterà te si furmazion nueva y cun si program atuel "An cunta che", che se dà ju cun l mond faszinënt dla lijëndes de Fanes. Nce n cont dla cumposizion di strumënc iel na inuvazion y la ujes dla ciantarines vën acumpaniedes da vidules, contrabas y "Hackbrett", "Lap Steel Guitar", chitara y tlavier.
Danora sunerà l ciantautor de Gherdëina Andreas Kondrak.
La ntreda ie debant.
Unide duc a scuté su, l ie na ucajion unica!

L'é endò ora de "La Bira te Fascia"!
A Ciampedel te Ischia ai 13, 14 e 15 de messèl l festival che porta te val bires artejanèles da mont, con magnadiva de produtores del post, de bona musega e etres evenc!
L'é ruà a la edizion numer 5 e ogne an l ne sporc vèlch neva l'event "La Bira te Fascia", nasciù da la gaissa de 3 amisc pascioné de bira e de produzions da mont de calità.
Per dut l meis de messèl va inant "A spas co na Bira", la scomenzadiva che envìa refuges e restoranc de la val a sporjer bires artejanèles de calità e piac spezièi pissé per valorisèr e vegnir valorisé da la beanda de òr.
Chest fin de setemèna l'é l moment "clou", con trei dis de proponetes te Ischia a Ciampedel per cercèr bires artejanèles da mont de 6 produtores desferenc e magnadiva de aziendes de noscia valèdes, con la formula oramai colaudèda di "getons", e amò apede scutèr de bona musega e tor pèrt a etres evenc desvalives e de valuta, con chest program:
Vender 13.07:
h. 17.00 aur l festival con stonc de magnadiva de produtores del post
h. 17.30 "Beer Roulette Game": n jech per cercèr e descorir i stii de fèr bira
h. 21.00 musega live con l grop folk/rock da la Toscana "L'Avvelenati"
Sabeda 14.07:
h. 17.00 aur l festival con stonc de magnadiva de produtores del post
h. 17.30 "Beer Roulette Game": n jech per cercèr e descorir i stii de fèr bira
h. 21.00 musega live col grop ska/rock trentin "Eravamo Sunday Drivers"
Domenia 15.07:
h. 12.00 aur l festival con stonc de magnadiva de produtores del post
h. 16.00 "Beer Roulette Game": n jech per cercèr e descorir i stii de fèr bira
h. 18.45 premiazion "Foto Challenge" con Igers Trentino
h. 19.30 musega e entrategniment coi "Lebs Trio"
h. 21.00 musega live col grop rock/blues da la Lombardia "Acid Brew"

Info: www.labiratefascia.com.

Curs da cujiné a 2.000m
Tratan l'isté vëgnel metü da jí deplü manifestaziuns liades ala gastronomia. Öna dles novités de chësta sajun é i cursc da cujiné, che vëgn tignis tles üties dl'Alta Badia a 2.000m
Le cogo dla ütia presentará na rezeta de na spezialité tradizionala, y ti mostrará a vigni partezipant la preparaziun dl taí. Chi che tol pert á la poscibilité da cujiné y arjigné ca instësc so taí. Le pröm apuntamënt é preodü por la jöbia ai 19 de messé tla ütia Piz Arlara, olache an pó imparé da fá les cütles da pom. L'edema dedô sarál le cogo dla ütia I Tablá che insëgna da fá bales da spinot, ai 2 d'agost pón ciaré pro tla ütia de Bioch sciöche an fej da fá cajincí t'ega. L'ultim apuntamënt vëgn tigní tla ütia Club Moritzino sön Piz La Ila ai 23 de agost, olache al vëgn arjigné ca les tutres. Le curs mët dagnora man dales 15:00 y an mëss se scrí ite anter le de denant te un di ofizi turistics dl'Alta Badia.

Cursc da jadiné
L'Ice Club Alta Badia organisëia cursc da jadiné por prinzipianc y progredis
En lönesc ai 23 de messé mët man i cursc da jadiné por mituns y mitans dai 4 agn insö, pitá dal Ice Club Alta Badia por prinzipianc y por progredis. I cursc jará inant cina ala fin de agost. Le curs por prinzipianc (che n'á ciamó mai tut pert a n curs o á fat un n curs) sará n iade al'edema, vigni lönesc dales 16:00 ales 16:45. Le curs por progredis (che á bele fat plü co un n curs) sará vigni lönesc dales 16:45 ales 17:30 y vigni mercui dales 16:00 ales 16:45.
Le cost dl curs por i prinzipianc é de 55,00€, por i progredis de 85,00€. Düc i mituns y dötes les mitans che à vëia de jadiné dess s'anunzié. Por informaziuns y prenotaziuns pón telefoné o scrí al 333/2930586, anter i 16 de messé.

Nos mituns, por n dé pro i Stödafüch
I Stödafüch dl Raiun Alta Badia organisëia indô por düc i mituns dl post, dai 7 ai 12 agn, le "Dé di mituns", indoman sabeda ai 14 de messé
Por le "Dé di mituns" s'incunton en sabeda ai 14 de messé dales 9:00 dan i magazins di stödafüch da Calfosch, Corvara, San Ciascian, La Ila y Badia. Da chiló gnará i mituns acompagná a Corvara, olache al sará de vigni sort de jüc y cosses interessantes da odëi, imparan insciö da conësce le monn dla proteziun zivila sot forma de jüch. Por na bona marëna gnarál ince fistidié. Dales 15:00 gnará spo düc indô acompagná derevers cina pro magazin di stödafüch de vigni paisc. Sce le tëmp ess da ester malsigü, gnarál tut la dezijiun en chël de da doman sce tigní la manifestaziun o nia. I geniturs che acompagnëia i mituns da doman, gnará periá da firmé na detlaraziun por la responsabilité. Mituns y mitans dl post é dër bel inviá da tó pert!

"Accents" cun le Trio les Finés
Badiamusica deura le Festival cun le conzert "Accents", incö vëndres ai 13 de messé dales 21:00, tl salf dl Istitut Ladin a San Martin de Tor
Cun chësc program proa le trio de i dé ala musiga da ciamena val' azënt nü. Les composiziuns originales vá dal impressionism cina ala musiga minimalista de Peterson. Na gran impresciun fej la fujiun y la parité di sonns danter i trëi stromënc y la moscedaziun de sonorités vies y elastiches. Sön paladina él Michéle Schladebach al clavier, Angela Palfrader ala vidora y Esther Videsott al saxofon. Al sará da aldí de Mark Eychenne (*1933) la "Cantilene et Danse (for alto saxophone, violin and piano)", de Russel Peterson (*1969) le Tribute Trio "Trio 2", de Jean-Luc Defontaine (*1965) i "Couleurs d'un Rêve".

"summit Bach 1"
Festival Badiamusica: conzert de orghe de dlijia cun Gustav Auzinger, en lönesc ai 16 de messé dales 21:15, tla dlijia de Badia
Le conzert pîta n iade dala perioda classica vieneja a sü scolars y al gran maester instës, ala colma dla musiga por orghe: a Johann Sebastian Bach. Lapró sarál da aldí pro "summit Bach 1" tla dlijia de Badia composiziuns de Johann Christian Kittel, Joseph Haydn, Johann Ludwig Krebs y Carl Philipp Emanuel Bach.
L'orghelist Gustav Auzinger á ciafé so pröm insegnamënt d'orghe da Peter Planyavsky y á spo fat le diplom ala Wiener Musikhochschule (musiga de dlijia, pedagogia musicala y orghe da conzert pro Michael Radulescu). D'atri stüdi ál fat tla Talia, tla Svizra y tl'Olanda. Dal 1978 incá é Gustav Auzinger diretur dla Landesmusikschule Rohrbach y insëgna al Conservatore dla diozeja de Linz. Al sona sciöche orghelist te deplü dlijies (Stadtpfarrkirche Rohrbach, St. Anna/Steinbruch y Schlosskapelle Neuhaus), y sciöche mëmber dla comisciun di orghi de dlijia dla diozeja de Linz se dál jö cun tröpes costruziuns de orghi nüs y cun restauraziuns de orghi vedli.

"divertimento & lamento"
Chësc le titul dl conzert en gaujiun dl Festival Badiamusica, che gnará tigní en mercui ai 18 de messé dales 21:15, te dlijia da Corvara. Al sará da aldí l'ensemble QuinTirol
L'ensemble QuinTirol é metü adöm da Gertraud Frank al clarinet, Ingrid Gantioler al fagot, Michael Cede al fabló, Lukas Runggaldier al'oboa y Egon Lardschneider al corn. A Corvara presentëiai na paleta ampla de composiziuns dër desvalies. La cornisc vëgn formada dal "divertimento n. 1" de Joseph Haydn cun le „Chorale St. Antoni", o indere le cuintet vital "Op. 56 n. 2" de Franz Danzi. Ti toc "Trois Pièces Brèves" di agn 1930 áldon tan bun che Jacques Ibert sá da traté i sonns di stromënc a fle de lëgn te na manira lisiera, da corusc y virtuosa da stil franzesc. Le contrast ne podess nia ester maiú che cun "Music for a Deceased Friend" (musiga por n amich defunt) de Peteris Vasks. Le compositur contemporan letonich mët a d'espresciun plüra y dolur cun na musiga mistica religiosa de gran espressivité. Sciöche da n ater planet vëgn ala fin l'odüda umorista dla musiga popolara tiroleja da pert de Werner Pirchner te so "Streichquartett für Bläserquartett", le cuartet por archëc a fle.

"for ever modern"
Festival Badiamusica: conzert cun le posaunist Mikael Rudolfsson y la pianista Valentine Buttard, en jöbia ai 19 de messé dales 21:15, tla Ciasa J. B. Runcher a Badia
Rudolfsson y Buttard vá al'archirida dla gran sonorité y s'indüna danter le vedl y le nü, inrësc sön desvalianzes y somëies danter toc dal romantizism y toc de compositurs d'aldedaincö. Le program "for ever modern" pîta composiziuns de Robert Schumann, Leoš Janàček, Bent Sørensen, Philippe Gaubert, Frank Martin, Philippe Hersant, György Kurtàg. Incoroné vëgn le program dala composiziun "Spiegel im Spiegel de Arvo Pärt."
Mikael Rudolfsson (*1987 a Stockholm) é gnü invié dai festivals plü importanc dl monn, insciö dai Donaueschinger Musiktage, da Wien Modern o ince dal Festival Internacional Cervantino. Sciöche solist ál soné cun orchestres y ensembles tla Germania, Slovenia, Russia, Messico, Norvegia y Svezia. Dal 2017 incá él mëmber dl Klangforum Wien.
Valentine Buttard (*1986 a Belfort/Francia) s'impegnëia da plü agn incá por la musiga contemparana. Ara á ciafé so insegnamënt de clavier da Rena Shereshevskaya a Colmar y á studié dal 2005 al 2014 ala Hochschule für Musik, Theater und Medien de Hannover. Intant ára deplü diploms sciöche solista y pedagoga y tëgn conzerc tla Francia, Germania y Svizra.

"dances & variations"
Le Festival Badiamusica pîta n conzert cun le duo Somigli - Sintoni, che mët dant na suravijiun söla leteratöra por clavier a 4 mans. En jöbia ai 26 de messé dales 21:15 tl salf dles manifestaziuns da San Ciascian
Tl conzert vëgnel eseguí composiziuns de auturs conesciüs mo che n'é nia da aldí gonot te na forma liada al bal y ales variaziuns. Tl conzert vëgnel ince evidenzié le svilup dla scritöra por clavier a cater mans tres les epoches desvalies. Paolo Somigli y Chiara Sintoni al clavier porta dant de gran composiziuns de Edvard Grieg, Franz Joseph Haydn, Ludwig van Beethoven, y Robert Schumann.
Le duo al clavier é gnü fondé dl 2009. Intrami n'é nia ma musizisć, mo ince musicologs y se dedichëia ala musiga ince te d'atri ensembles y ince sciöche solisć; implü ési atifs ince tla difujiun y comunicaziun dla musiga. Chiara Sintoni é insegnanta de musiga pro l'istutut "Marcelline" (Balsan) y Paolo Somigli é professur pro la Facolté de Sciënzes dla Formaziun dl'Université Lëdia de Balsan.

"Dolomites Yoga Days"
Tl fin dl'edema dai 19 ai 22 de messé án tl'Alta Badia la poscibilité da imparé y perfezioné les tecniches dl hatha yoga
A La Ila vëgnel metü da jí por le terzo ann n program cun deplü workshops y cursc por prinzipianc y ince progredis. L'insegnant Egon Castlunger da La Ila mostrará les ativités, focalisan sön les posiziuns fisiches, la dërta respiraziun y la pert meditativa dl yoga. La jöbia dales 10:00 vëgnel presenté le program tl salf dles manifestaziuns a La Ila, sciöche ince mostré le tecniches prinzipales dl yoga. Le vëndres dales 10:00 vëgnel tigní sön Piz Sorega n curs de yoga asana, de respiraziun y meditaziun. La sabeda dales 10:00, tres sön Piz Sorega, él söl program na leziun focalisada sön la forza dla respiraziun. I "Dolomites Yoga Days" se stlüj jö la domënia ai 22 de messé cun na sesciun completa de hatha yoga, dales 9:30 tla ciasa dla cultura a La Ila. Les iscriziuns mëss gní fates te un di ofizi turistics dl'Alta Badia anter le de denant.

La Jöbia de Corvara
Dai 19 de messé cina ai 6 de setëmber él vigni jöbia sëra animaziun por pici y gragn, tres le zënter da Corvara. Le pröm apuntamënt i é dediché ala musiga tradizionala
Le zënter dl paisc da Corvara i fajará ince chësc isté da cornisc ala manifestaziun "La jöbia de Corvara", che gnará metüda da jí dal'Assoziaziun Turistica da Corvara vigni jöbia, dai 19 de messé ai 6 de setëmber. Vigni apuntamënt sará caraterisé da n ater tema, che vá dal'animaziun por mituns ala musiga tradizionala, mo ince al'ert de strada y musiga jazz & blues. Le pröm apuntamënt é dediché ala musiga tradizionala. Dales 17:15 ales 19:15 y dales 21:00 ales 22:15 sarál grups de bal popolar, de platleri y grups musicai che porta dant bai y musiga tradizionala fora por le zënter dl paisc. En ocajiun de vigni jöbia de Corvara vëgn la strada prinzipala da Corvara stlüta al trafich dales 17:00 ales 22:30. Al é na bona ocajiun por mituns y families da sté adöm y passé n domisdé n pü' atramënter.

Incuntades leterares cun auturs taliagn
Ince iniann d'isté vëgnel pité tl'Alta Badia les incuntades cun l'autur sot al titul "Un libro, un rifugio"
La manifestaziun leterara "Un libro, un rifugio. Incontri con l'autore" curada da Gianna Schelotto en colaboraziun cun Alta Badia Brand, röia chësc isté ala chinejima ediziun. Dai 17 de messé ai 20 d'agost vëgnel tigní deplü incuntades cun personaji dla leteratöra taliana, ti salfs dles manifestaziuns di paisc dl'Alta Badia. Tratan les presentaziuns gnarál traté deplü temesc d'atualité y n valgügn apuntamënc gnará abelis dales melodies de Simona Bondanza, acompagnada da Alex Trebo y Michi Lösch. Dötes les incuntades mët man dales 17:30 y é davertes a düc.
I apuntamënc
17/07: "Tipi che corrono" de Fulvio Massini, a La Ila
20/07: "Eravamo immortali" de Manolo, a Corvara
26/07: "Il boss è immortale" de Massimo Nava, a La Ila
30/07: "Resto qui" de Marco Balzano, a Corvara
03/08: "Un paese senza leader" de Luciano Fontana, a Corvara
05/08: "Il signor diavolo" de Pupi Avati, a Corvara
07/08: "La maestra e la camorrista. Perché in Italia resti quel che nasci" de Federico Fubini, a La Ila
09/08: "Il caso Regeni" incuntada cun i geniturs de Giulio Regeni, a La Ila
10/08: "Trump e la fine dell'American Dream" de Sergio Romano, a Corvara
12/08: "Lui, io, noi" de Dori Ghezzi, Giordano Meacci y Francesca Serafini, a Corvara
14/08: "L'agente del caos" de Giancarlo De Cataldo, a La Ila
16/08: "Nel Muro" de Mauro Corona, dales 10:30 a La Crusc a Badia (sce al é bur' tëmp, dales 17:30 a La Ila)
17/08: "Sangue giusto" de Francesca Melandri, a Corvara
20/08: "Indagine sull'eternità" de Guido Rispoli adöm cun Piercamillo Davigo, a Corvara.

Les morvëies dl "Cenote"
Tl Frignun dl „Cenote" de Conturines: esploraziun y stüde dl plü gran magazin de dlacia sot tera ite tles Dolomites. Referat cun l'espert Francesco Sauro, ai 17 de messé tla Ciasa dl Parch natural Fanes-Senes-Braies
La Ciasa dl Parch natural Fanes-Senes-Braies á l'onur da podëi invié al referat de Francesco Sauro, un di speleologs plü importanc a livel mondial che insëgna tl'Université da Bologna y laora por la assoziaziun de esploraziuns geografiches "La Venta". Por le Time Magazine él un di "10 next generation leaders" dl 2016, un di jogn che podess mudé le monn. Dlungia sües spediziuns tl'America Latina y tl'Asia zentrala se crüziel ince de esploraziuns chiló tles Dolomites - danter l'ater ince dl ander gigant "Cenote", danter les pizes de Conturines y Lavarela. La storia dl'esploraziun de chësc ander é bindebo interessanta, ára pö doré cina tl 2010 cina che i speleologs é rová tl gran salf 300m sot tl crëp. Adöm cun Francesco Sauro cuntará ince Luca Dal Molin y Francesco Coccomiglio dl Club speleologich "Proteo" da Vicenza de co che ai é jüs jö por chësc ander plëgn de dlacia, che ê cina dl 1994 sté n lech. Le referat - por talian - vëgn tigní en mertesc ai 17 de messé dales 21:00, tla ciasa dl parch a Al Plan. L'entrada é debann.

Curs da soghé al palé por mituns dles elementares
Sön le ciamp dal sport da La Ila. Le pröm iade en lönesc ai 16 de messé, indöt 11 incuntades
La Uniun dl Sport Alta Badia mët da jí n curs da soghé al palé por mituns dles scores elementares, cun Ubi Valentini. Le pröm iade s'incunton en lönesc ai 16 de messé dales 15:00, pro le ciamp dal sport da La Ila.
Indöt vëgnel fat 11 incuntades. Les iscriziuns vëgn tutes sö diretamënter pro la pröma incuntada. Informaziuns ciafon ince al 338/3462087.

Zacan y Incö - Jí a scora tles valades ladines
Chësc é le titul dla mostra che gnará daurida en vëndres ai 20 de messé dales 18:00, tl Museum Ladin Ciastel de Tor
En gaujiun di 70 agn da canche al é gnü metü sö le sistem formatif paritetich ladin te Gherdëna y tla Val Badia, organisëia le Museum Ladin, en colaboraziun cun le Departimënt Scora y Cultura Ladina na mostra particolara. Tres esponac y n fi cöce storich-didatich dess chësc sistem formatif ti gní porté pormez al publich interessé. La daurida dla mostra é en vëndres ai 20 de messé dales 18:00, tl Museum Ladin Ciastel de Tor. Ara restarà spo daverta dai 21.07.18 cina ai 26.05.19, ti orars de daurida dl museum.

Opereta ladina "la zingaindra"
Sön paiun d'La Pli de Mareo, cun rapresentaziuns ai 27, 28 y 29 de messé, y 3, 4 y 5 d'agost 2018, dales 21:00
Ara se trata de n teater cianté original ladin mareo, dal libreto y tesć scric dal autur de ciasa Iaco Rigo y la musiga componüda da Ludwig Rindler. Sön scenar él da odëi chës 35 porsones, lapró vëgnel i sis musizisć che sona. La regia é de Tone Palfrader. Les jobleres y i jobleri é en gran pert dal post. L'organisaziun é surantuta dal'EPL-Ert por i Ladins, en colaboraziun cun le Teater La Pli, Jonëza d'La Pli y d'atres uniuns de paisc.
Le teater cianté gnará presenté indöt sis iadi, dai 27 de messé inant, dagnora tl zënter de paisc. Les chertes vëgn dades fora y venüdes dlungia paiun amez paisc vigni sëra che al é na rapresentaziun, dales 19:00 inant (prisc: cherta normala 18,00 euro, cherta smendrida: 15,00 euro). Les prenotaziuns di posć vëgn tutes sö da sëgn inant ala misciun mail opereta@posteo.de o danter les 14:00 y les 19:00 por telefon y SMS al numer +39 328 575 9851.

I mercui de ra Cultura Ladina
Per duc i marcui de luio e agosto l'Ulda la met a jì col storico Paolo Giacomel desferente ocajiogn per cugnesse meo la storia de la val de Anpezo
Dal 18 di luio al 5 de setembre torna per l sesto an in Anpezo "Storia e cultura del mèrcui", la scomenzadiva organizada da l'Ulda in colaborazion col prof. Paolo Giacomel che la inconsent de ruà a cugnesse ogni stemana tanc de aspec de la storia, de l'arte e de la cultura anpezana.
Chest l programa per la sajon 2018:
Marcui 18 de luio: Da Dogana Vecia a Piés de ra Mognes
Marcui 25 de luio: L pais e gejuola militar de Vervei
Marcui 1 de agosto: A la inressida de Botestagno
Marcui 8 de agosto: L auteriol de San Mene a Ronco
Marcui 15 de agosto da le 10.30: Latteria Cortina (bele caserma Kaiserjäger) e ra jeja de Bastian a Val de Sot
Marcui 22 de agosto da le 10:30: La famea dei preve Frenademetz
Marcui 22 de agosto da le 16:30: Vijita acompagnada al museo etnografico de le Regole a la mostra "Anpezo in Musica"
Marcui 29 de agosto: La Strada de le Dolomiti - Ponte Corona
Marcui 5 de setembre: La porta del dio Silvano nanter storia e legenda

Dute le gite, fora che chele del daremesdì, le pearà via da le 10.30. Duc i apuntamenc i é debann, unizi cosc sarà, per i partezipanc, chi dei mujei e chi dei mezi per arjonje l luoch de la caminada o de la vijita. I luoch ulà se ciatà per pèe via i vegnarà lassei savè ota per ota sui placac, su la plata Facebook de l'Ulda e incia nanter le manifestaziogn de La Usc. Nte sto istà 2018 l'Ulda e l prof. Giacomel i ve speta de cotanc!

Sant Andreu Jazz Band al Navalge con JMMJ!
L grop catalan rua per la pruma outa te la Tèlia: l sarà a Moena en domenia ai 15 da les 21.00. Pruma assoluta te la Tèlia per l'orchestra di joegn "Sant Andreu Jazz Band" de Barcelona, reta dal maester Joan Chamorro. L conzert aur l nef event JMMJ "joegn, mendranzes e musega jazz" endrezà da la sociazion "La Grenz" tel chèder del Panorama Music.
Tel teater Navalge en domenia ai 15 de messèl da les 9 da sera pearà via na neva vijion de la musega tel lengaz minoritèr; n panoram musical desferent dal solit, semper più feruscol e en evoluzion.
Chest l'é l soul event de dut l Panorama Music che vegnarà portà dant te paìsc e da sera e l'é dassen na ocajion unica de poder scutèr, gratis, chest grop de gran nonzech e braùra. I 22 joegn musizisć dai 8 ai 22 egn che fèsc pèrt de chesta orchestra i se dèsc jù con si strumenc tolan sù na padronanza che ge permet de colaborèr con gregn inomes del jazz mondièl. A Moena i sarà compagné da doi talenc del sax Luigi Grasso e Pietro Tonolo.
N event da no perder che, vedù l gran suzess arjont ti ultimes egn de chesta orchestra straordenèra, ve farà viver de gran bela emozions.