Manifestazions atuales speziales

Data

28 de setember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 28 de setember
Mësa torona cun candidac ales provinziales
Incö vëndres ai 28 de setëmber dales 20:00, tla Ciasa Runcher a Badia. Sön paladina candidac de partis desvalis
Sön iniziativa dles lies economiches dla Val Badia - Ostis, Paurs, Artejans y Boteghiers, vëgnel metü da jí incö vëndres ai 28 de setëmber dales 20:00 na sëra de discusciun cun candidac ales lîtes provinziales de deplü partis. La sëra vëgn tignida tla Ciasa J. B. Runcher a Badia. Düc canc é dër bel inviá da tó pert.

Vigni sintom ó nes dí valch
Referat sön la presentaziun dl liber "Ogni Sintomo è un messaggio" dla microbiologa Claudia Rainville
Le referat vëgn tigní en jöbia ai 4 d'otober dales 20:00, tl salf dles manifestaziuns da Corvara. Referënta che presentëia le liber é la dra. Alessandra Rossi, naturopata, consulënta de metamedejina y psicosomatica. Chësta é na metoda che fej referimënt ala perfeziun y ala forza de autovarijun. Nosc corp nes baia tres nüsc mai. Gonot chiriunse na gauja por nosc malester y ne la ciafun nia. Al vëgn metü en relaziun le corp, la psica y dantadöt les emoziuns y i sentimënc. Ci che cunta n'é nia ci che i un vit, mo co che i un vit.
L'auturia porta dant plü de 1.300 caji che ara á traté te na manira scëmpla por düc. Al vëgn fat ejëmpli de co se fá les dërtes domandes sön nüsc sintoms, por daidé interpreté i sëgns dl corp che la vita nes porta dant vigni de.

Musiga dal ví tl Saj.un
Le pröm vëndres d'otober, ai 5 dales 21:00 inant, musiga dal ví cun Hubert Dorigatti y Queen Laurin, tl Zënter Cultural SaJ.un a La Ila. Inviada é döta la popolaziun, nia ma la jonëza
Chësta sëra é tla pröma pert sot al moto "Early down home blues". Da canche al á davagné le concurs nazional por la "International Blues Challange" a Memphis, fej Hubert Dorigatti pert dl olimp dl blues. Insciö alda le musizist da Bornech ofizialmënter pro l'elite te chësc stil de musiga. Por Dorigatti é chësc le secundo conzert tl SaJ.un a La Ila, do che al á bele soné da d'altonn 2017 adöm cun Adrian Kirchler.
I Queen Laurin ti dij a süa musiga "minimal rhythm'n'roll" y indichëia cun chësc che le stil de musiga é dër ri da descrí. Les cianties de so repertore vëgn en gran pert da grups che n'á degüna data de scadënza, sciöche i ZZ Top, The Doors, Elvis, Rolling Stones, Eric Clapton, Rory Gallegher y Canned Heat.
"Queen Laurin" ne vá indere nia le tru tradizional, deache ai ne sona nia te na fomaziun rock, mo cun percusciuns (Erwin), piano (Lisa) y chitara acustica (Klaus).
Düc é dër bel inviá da gní a se gode na sëra cun de bela musiga.

Sonns y saûs de Armentara
En domënia ai 30 de sëtember él l'Assoziaziun Turistica La Val che mët da jí por l'otavo iade la manifestaziun Sonns y saûs de Armentara, iniann ince cun n torné
La manifestaziun mët man cun la Santa Mëssa dales 11:00 sön Col de Valacia. La festa jará inant cun musiga y de vigni sort de spezialités gastronomiches, che vëgn dades fora da pert di ostis, dles patrones, dla jonënza da paur y di stödafüch da La Val. Por pici y gragn vëgnel ince metü da jí n valgügn jüc y de vigni sort de animaziun y en chësc ann vëgnel tigní por le pröm iade n torné de palé sön i pra da munt. Al pó tó pert scuadres de sis porsones y al vëgn damané de soghé cun cialzá da jí sö por munt. Les iscriziuns pó gní fates pro l'assoziaziun turistica o en chël de sön Armentara. Düc é dër bel inviá da tó pert.

Na bona marënda per nosta jënt de tëmp
La Lia Sarëinn nvieia duta la jënt sëura i 60 ani de Gherdëina a se nuzé de chësc servisc nuef a Urtijëi, a S. Cristina y te Sëlva
Nviei ie duc chëi che à la residënza te Gherdëina y à passa 60 ani. Chësta scumenciadiva ne n'ie nia mé per i pueresc, ma per duc i seniores, che à ueia de se maië n bon cëif n cumpania.
Uni merdi puderà la jënt de tëmp jì tla pitla sala dla Cësa de Cultura Luis Trenker a Urtijëi a maië da marënda. For de merdi se ancunterà nce chëi de tëmp che ulerà jì a marënda a S. Cristina, iló vën l servisc pità tla sala Raiffeisen,te cësa de Chemun. Uni mierculdi se urterài te Sëlva, for dala 12.00, te stua di seniores, sun calonia. L priesc dla marënda ie de 4,00 € per persona.
Chiche uel jì a marënda muessa se lascé scrì su almanco nchin al di dant do marënda, cherdan su: - per Urtijëi l numer 335 1031751
- per S. Cristina l numer 333 1499949
- per Sëlva l numer 335 6558633

Curs de jadiné
Dai 6 de utober inant ntan dut l inviern, n iede al'ena tl stadio Pranives de Sëlva
L Eisclub Gherdëina mët a jì da śën inant y ntan duta la sajon da d'inviern, de sada danmesdì, n curs de jadiné per mutons y mutans che sà bele da jadiné o nce per chëi y chëles che scumëncia permò.
L curs scumëncia ai 6.10. y dura nchin ala fin de merz 2019. L ie uni sada dala 10.00 nchin la 11.00 danmesdì tl stadio Pranives de Sëlva. L priesc per fé pea ie de 180,00 euro.
Per se lascé scrì ite o nce per d'autra nfurmazions pòssen cherdé su l numer de telefonn 333 2578392 o l 338 8838382.

"Mel al jenodl" tla Dolomiti Sportclinic
Di de furmazion n sada, ai 29 de setëmber dala 8 daduman inant tla Tlinica Sportiva Dolomiti tl Zënter 181 a Urtijëi
Cie pòssen pa fé canche l jenodl fej mel?
Dutores y fisioterapisć cunterà dla patologies dl jenodl y di cunzec de terapia che possa vester cunservatifs o chirurgics.
Fé pea possa duc i nteressei. Acreditamënt ECM per duta la figures prufesciuneles tl ciamp dla medejina sun la plata internet www.congressvenezia.it.
Per plu nfurmazions prëibel cherdé su l 0471 086000.

50 ani Crëusc Cuecena Gherdëina
Festa n dumënia ai 30.9. dala 9.30 tl zënter Iman a S. Cristina
Dan 50 ani iel unì giaurì la prima sënta dla Crëusc Cuecena te Gherdëina y chësc anuel uelen festejé deberieda cun duta la jënt y dantaldut chëi che fej y à fat pert de chësta istituzion de aiut.
N dumënia ai 30 de setëmber saràl dala 9.30 na Santa Mëssa alalergia iló tl zënter Iman. Dala 10.15 uniràl benedì na ambulanza nueva. Inant jiràla cun i saluc dla autoriteies, danter l auter dl sëurastant provinziel Arno Kompatscher y dl'assessëura per la sanità Marta Stocker. L sarà nce na pitla ciaculeda n cont dla storia dla Crëusc Cuecena Gherdëina cun reprejentanc da ntlëuta y da śën, meneda da Ellis Kasslatter.
Dala 11.30 inant pona aperitif, juesc, mujiga y marënda. Duc ie nviei de cuer a unì ala festa.

La chëuta di vedli mutons
Teater te Sëlva cun la prima reprejentazion n mierculdi ai 3.10. dala 20.30 te cësa de cultura de Sëlva
La doi veteranes dl Teater de Sëlva, Wally Mussner y Bernardette Senoner, à sëurantëut per l prim iede la regia dl pez che la grupa de teater à mparà ite per chësc autonn. L ie n teater da paur coche n dij, de Walter Kalkus, repurtà tl gherdëina da Lidia Delazer.
Se traté se tràtela tlo de scioldi. Duc i vedli mutons ie cherdei a paië na chëuta nueva, la chëuta di vedli mutons. Ma nce tlo iel ezezions; mé chëi che possa mustré su de avëi giapà almanco "trëi cestons" ne muessa nia paië. Trëi cumpanies drët maladëc, Moz, Piere vulpon y Tita, sambën dut vedli mutons, prova śën a uni maniera de abiné ca da vel'ëila n tel ceston. Ma ala fin vàla sambën dut autramënter de coche i se nmaginova... y vel' una uel se maridé, a duc i cosć...
L fej pea bën set atëures coche Emanuel Demetz, Ingrid Mussner, Evi Perathoner, Ivan Senoner, Juri Demetz y i doi atëures nueves Vera Mussner y Simon Bernardi, che ie pra si prima esperienza sun palch.
Dla paladina se cruzia Thomas Mussner, Igor Demetz, Alex Runggaldier y Werner Senoner, mascra de Laura Lussardi, fotograf ie Ivan Mahlknecht, frisera ie Laura Senoner, di recuisic de cruzia Helga Kerschbamer y nia da desmincë Lidia Delazer che dij ite.
L teater ie da udëi:
n mierculdi ai 3.10. dala 20.30,
n sada ai 6.10. dala 20.30,
n dumënia ai 7.10. dala 17.00,
n mierculdi 10.10. dala 20.30 y
n sada ai 13.10. dala 20.30
for te cësa de cultura de Sëlva.
Chertes danora pòssen apusté tla butëiga Minishop de Rudi Avi te Sëlva o cherdan su l numer dla butëiga 0471 794085.

"Nosta vita nes dà dant la streda"
N vënderdi ai 5 de utober a Urtijëi
L proiet "Ti dé tëmp al tëmp" va inant nce d'autonn y la proscima manifestazion sarà n vënderdi ai 5 de utober 2018 dala 20.30 a Urtijëi, te sala de Calonia. Ntlëuta saràl de plu persones de Gherdëina che se anconta pra na mëisa turonda per cunté de si sperienzes vivudes. L unirà jit ite sun de plu mumënc de si vita y audiron coche cërta ntraunides à mudà si cunzet dl tëmp. Tres la sëira mëina Leo Senoner.
La manifestazion vën metuda a jì dal KVW de Urtijëi. Nfurmazions n cont dl proiet "Ti dé tëmp al tëmp" abìnen sun www.manif.it y www.facebook.com/furmaziongherdeina sciche nce sun de plu stampac.

Luis Piazza y Raimund Mureda
Giaurida dla mostra n sada ai 6.10. dala 11.00 tla Cësa de Cultura a Urtijëi
L Museum Gherdëina nvieia de cuer ala giaurida dla mostra speziela per i 110 ani dala nasciuda di doi artisć y per i 60 ani dala fundazion dla Lia dl Museum.
Velch deplù dla mostra y di artisć saverà da cunté la diretëura dl Museum Paulina Moroder, la esperta de storia dl'ert Danila Serafini y sambën i cumëmbri de familia, che sarà nce prejënc ntan i dis che la mostra ie davierta.
La presidënta dl Museum Marie Theres Thaler y l ambolt de Urtijëi Tobia Moroder purterà si saluc, y do n valgun pec sunei dala "Grödner Geigenmusig" ie duc mo nviei a fé na viva.
La mostra resterà davierta nchin ai 28.10. da lunesc nchin vënderdi dala 15.00 - 18.00 y de sada y dumënia dala 10.00 - 12.30.