Manifestazions atuales speziales

Data

12 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedesi ai 12 de otober
Marcià bio
Duman sada ai 13.10. dala 9.00 inant sun la Pitla Plaza S. Antone a Urtijëi
L cunsёi dla Lia per Natura y Usanzes nvieia duc de cuer a unì a nes crì sun l marcià bio, n sada ai 13 de utober sun la Pitla Plaza de S. Antone a Urtijëi, dala 9.00 daduman inant.
L blòt marcià, ulache paures bio dl Südtirol vënd si prudoc. Nce nëus dla Lia per Natura y Usanzes ve piton velch da maië y da bever: tëurtes y strudel fac nstësc, pans de farina grossa d'uni sort, dut sambën cun prudoc biologics y leprò café, té, vin y soft ciaut. L bon tof da castanies pratedes ne mancerà y l stont dal craut sarà ënghe inò sun plaza. Chëi che uel se mplenì si barijel o se njinië n barijel nuef, possa se lascé fé ju l craut da nosc esperc. L unirà nce inò turnà sun plaza.

Unide duc ala party!
Festa per i 20 ani de tennis nternaziunel tl Zënter dal Tennis a Runcadic, ncuei vënderdi ai 12.10. dala 21.00 inant
Per l iubileum di doi dejeneies de tennis nternaziunel te Gherdëina àn nce ulù mëter a jì na bela festa, na party cun mujiga, a chëla che n nvieia duc i tifosi y pasciunei de tennis y nce chëi che puderà mo l deventé. Nvià àn sambën nce duc chëi che à laurà pea ti ani passei ti cumiteies de urganisazion de chësc avenimënt sportif nternaziunel, per ti sëurandé te chësta ucajion na pitla scincunda. Mancë ne manceràl segur de no vel' atlet o atleta che à cumbatù o nce venciù sun i ciamps dal tennis de Runcadic.
Pra de bela mujiga dla grupa cunesciuda "The Jam'son" y cun bona ueia fajeràn festa nchin tert de nuet.

Luis Piazza y Raimund Mureda
Mostra n lecort di doi artisć, da udëi nchin ai 28.10. tla Cësa de Cultura a Urtijëi
L Museum Gherdëina nvieia de cuer a unì a ti cialé ala mostra speziela per i 110 ani dala nasciuda di doi artisć y per i 60 ani dala fundazion dla Lia dl Museum.
Bera Raimund Mureda, scultëur figuratif, à laurà truep tla mauta cueta dantaldut do l tëmp de stude cun l prufessëur Arturo Martini. Bera Luis da Cudan se à dat ju cun la scultura y cun la pitura, purtan a esprescion si criatività sibe te na forma figurativa che astrata. Tramedoi à nce nsenià tla Scola d'Ert a Urtijëi, fajova pert dl muvimënt artistich "L Ruscel" y fova danter l auter cumëmbri fundadëures dl Museum Gherdëina.
La mostra resterà davierta nchin ai 28.10. da lunesc nchin vënderdi dala 15.00 - 18.00 y de sada y dumënia dala 10.00 - 12.30.

"Cunté y dé inant la storia"
Mëisa turonda cun Leander Piazza, Adriano Sommavilla, Gregor Prugger, Markus „Mec" Schenk, Gretl Senoner, Manfred Mureda y Egon Moroder Rusina, n vënderdi ai 19.10. dala 20.00, basite te Cësa di Cungresc a Urtijëi
Per l proiet "Ti dé tëmp al tëmp" vëniel metù a jì na manifestazion ulache l unirà cuntà de lecorc ntëur ala generazion dl '68. L sarà na mëisa turonda propi amesa la mostra che ie ntan chisc dis cun lëures de bera Luis Piazza da Cudan y bera Raimund Mureda per i 60 ani dla Lia Museum Gherdëina. Muderadëur dla sëira ie David Lardschneider.
Coche i doi artisć bera Luis y bera Raimund ova messù y sapù da jì pea cun i gran mudamënc che ie stat te puec dejeneies, iel propi la generazion ntëur al '68 che tira na rissa da una na pert cun l passà, ma che fej pona su la fundamëntes per l daunì, sambën tl'ert ma pona nce tla pert soziela y politich-ideologica. L se trata de na ucajion per pensé do a cieche n se ova tëut dant ntlëuta, y coche dut se à mudà te chisc cincant'ani. Ie pa dut unit miec o piec? Duc ie nviei de cuer a unì a scuté su!

Mostra "n memoria" dl scultëur Vinzenz Peristi
Giaurida dla mostra n merdi ai 16.10. dala 20.30 te Tublà da Nives te Sëlva
Chëst ann iel avisa 75 ani ca che l scultëur Vinzenz Peristi ie mort. Per chësta ucajion vëniel metù a jì tl Tublà da Nives na mostra n si memoria. Vinzenz ie nasciù tl 1909 sun l luech da Banch sa Sacun. Si prima furmazion artistica giapa Vinzenz tla Scola d'Ert de Sëlva ti ani 1923/24 y 1924/25. Si maester ie Albino Pitscheider. Daldò vàl a lauré tla berstot de Rudolf Vallazza a Urtijëi. Tl 1928 vëncel a Milan l cuncors "Presepio in famiglia" cun na si gran cripl. Do avëi fat l saudé a Roma mëtel man de lauré coche scultëur te cësa di siei sa Sacun.
Sensazion à zënzauter descedà l gran crist che Vinzenz à ziplà deberieda cun Batista Walpoth d'instà dl 1933 sun Sëurasas. Ël mpera a cunëscer per cajo l scultëur Josef Thorak, artist ufiziel statel ai tëmps de Hitler. Vinzenz tol la dezijion de jì a viver, a studië y a lauré a Minca. Tl 1942 vëniel cherdà pra i saudeies y mor sun la front russa ai 25 de juni dl 1943.
La mostra resterà davierta nchin ai 4.11. da merdi nchin dumënia dala 16 nchin la 19. De sada y de dumënia saràla nce davierta danmesdì dala 10 nchin la 12. N Unissant iela stluta.

Mudamënc de perspetiva
Ncuei vënderdi 12.10. scumëncia la mostra de Mayr, Fuchs y Risch tla sënta dla Lia Mostra d'Ert/Circolo a Urtijëi
Clara Mayr (Südtirol), Christoph Fuchs (Svizra) y Marc Risch (Liechtenstein) ie i trëi artisć che à venciù l segondo Symposium nternaziunel sun Ciampinëi l ann passà y prejënta te chësta mostra lëures da na gran tenscion. Nce sce Mayr, Fuchs y Risch vën da paejes desferënc, se ài ti ultimi mënsc giamià ora n con' de "mudamënc de perspetiva". N mierculdì se ài ancuntà per definì y mëter ora l'opres d'ert te 48 ëura. L troi y l prozes ie l travert.
Chël che cunlieia i trëi artisć ie la reduzion cunsecuënta dla forma, la cunverscion dla materia y la opres sotmetudes al ambient naturel ntëurvia – si lëures mostra nce for su zeche de ascundù da descuvrì.
I vijitadëures dla mostra possa se ncunferté sun na mostra, te chëla che l vën cunlià ambienc naturei y de azion desferënc di trëi artisć.
Fuchs, Mayr y Risch Ve nvieia de cuer a n mudamënt de perspetiva persunel a Urtijëi.
La giaurida dla mostra ie ncuei vënderdi 12.10. dala 20.30 tla sala dla mostres sun Plaza S. Antone y la resterà davierta nchin ai 25.10.2018 uni di dala 10.00-12.00 y 16.00-19.00.

"Jon danter nosta jënt"
Südtirol-Tour dla SVP te Gherdëina
I candidac dla SVP sarà ai 17 de utober te Gherdëina per prejenté si ideies y si programs y dantaldut per se cunfrunté cun la jënt: plu avisa dala 18.00 tla Cësa di Cungresc a Urtijëi. I candidac dla SVP sarà deberieda cun l presidënt dla provinzia.
L sarà mujiga, da maië y da bever, ma dantadut l mesun de se cunfrunté cun i candidac dla SVP.

"Jun danter nosta jënt"
Südtirol-Tour dla SVP tla Val Badia
I candidac dla SVP sará ai 18 de otober ti comuns dla Val Badia por presenté sües idees y sü programs y dantadöt por se confronté cun la jent.
Chisc é i orars:
Comun da Corvara dales 8:00; Comun de Badia dales 9:30; Comun da La Val dales 11:00; Comun da San Martin de Tor dales 12:30; Comun de Mareo dales 15:00.

Ma scüfs por ciasarines?
En mertesc, ai 16 d'otober 2018, dales 20:00, gnarál tigní a La Ila tla Scora mesana na serada söla spartiziun di laurs te ciasa, cun Astrid Schönweger
"Das bisschen Haushalt macht sich von allein... sagt mein Mann" - chësta ciantia conesciüda é tla orëdla de tröc. Le laur de ciasa vëgn tres ciamó araté n laur dles ëres, sciöche ince l'educaziun di mituns y la cura dles porsones atempades. Chësc laur ne vëgn mai paié da degügn, mo al é la fondamënta dl'esistënza de vignun y ince dla sozieté. Implü vá les ëres ince ciamó a lauré. La referënta Astrid Schönweger dará consëis de co se partí sö i laurs cun l'om y de co s'organisé por ester bones da fá döt. Le referat vëgn metü a jí dal Consëi de Formaziun Badia en colaboraziun cun le Comité Provinzial por l'avalianza de oportunités.

Conzert cun cater cors de dlijia
La seziun "Musiga" dl'EPL-Ert por i Ladins inviëia en sabeda, ai 20 d'otober, dales 20:00 te Dlijia da San Martin de Tor
L'EPL-Ert por i Ladins inviëia en sabeda, ai 20 d'otober 2018, dales 20:00, a San Martin de Tor a n conzert sacral tl cërtl dla Edema dla Fede. Al cianta chisc cater cors de dlijia: cor de dlijia da San Martin de Tor, cor de dlijia da La Ila, cor de dlijia da Lungiarü y Cor dles Ëres d'Al Plan.

Pest de poejies ladines "Angelo Trebo": escrizion dla otava edizion
Termen per mané ite les poejies: 30 de november 2018
Al é n concurs de poejies davert a duc chi che scriv per ladin, metú su dl 1997 a San Martin de Tor. Con l'edizion dl 2012 é l pest trienal vegnú daurí a dutes les variantes ladines y i idioms ladins dl raion dles Dolomites, cie che á porté spo tles ultimes does edizions a na maioura partezipazion da pert de autores y autors. L'edizion nueva, segn daverta, é chela dl 2018. La premiazion é preveduda per d'aisciuda 2019.
Criters y condizions
Da prejenté él - ence en chest iade - anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tó pert él da paié ite sun l cont bancar IBAN IT41H 08010 58830 000 304000455 intesté a l'EPL-Ert por i Ladins la comiscion de partezipazion de 20,00 euro.
Vigni autor/a prejenteia les poejies te cater copies, les contrassegneia con n pseudonim y ajonta lapró te na mendra cuverta scluta si dac anagrafics y l'atestazion dl versament dla comiscion de partezipazion. Sun la mendra cuverta scrivel/ela su si pseudonim.
La miscion per mané ite o dé ju a man l material per tó pert al concurs - anter l 30 de november 2018 - é: EPL-Ert por i Ladins, Pest "Angelo Trebo", str. Stufles 20, 39030 San Martin de Tor/San Martino in Badia, BZ.

"Instant Acts - cuntra la violënza y le razism" tla Val Badia
Le Sorvisc ai Jogn Val Badia adöm cun les scores altes da La Ila, mët da jí le proiet "Instant Acts - cuntra la violënza y le razism", en mercui ai 17 d'otober
"Instant Acts - cuntra la violënza y le razism" é n proiet teatral internazional dla formaziun culturala di jogn, che mët da jí dal 1993 inant da iade a iade da d'altonn dis de proiet dandadöt ti pici paisc de nosta provinzia. Dl ensemble internazional de Instant Acts fej pert 13 artisć jogn, che vëgn chiris fora sura döt le monn. Iniann é lapró p.ej. Mushegh dl'Armenia, Matylda dla Polonia, Yacine dl'Algeria, Larissa dal Brasil, Isabella dla Cina o Ambra dla Talia. Ëi laurará danmisdé diretamënter cun i 119 studënc, olache al sará workshops, p.ej de breakdance, beatbox, body-percussion, capoeira y cotán d'atri.
Dales 14:00 i tóchera spo ai artisć intësc. Ëi portará dant döt so savëi te na performance de za. 80 menüc, tla palestra grana da La Ila. A chësta inviunse düc i interessá da tó pert. L'entrada é debann y al n'ó ester degöna prenotaziun.

"Nia de Parora" - la pasciun a La Val
L'Uniun Teater La Val adöm al Cor de Dlijia da La Val porta sön paladina la storia dla Pasciun de Gejú, cun situaziuns y personaji dal stamp modern
Le toch, dal todësch "Die Ungetreuen - Eine Jüngerpassion in fünf Akten" de Karl Herbst, é gnü traslaté tl ladin da Matteo Rubatscher, ince ideadú dl proiet y regist. Adöm cun Sylvia Costabiei, Anna Deiaco y Carlo Suani ál lauré sön la dramaturgia dl toch y porté la storia dla Pasciun te nosta realté: le test resta chël dl teater de Herbst, mo les situaziuns y i personaji dess avëi n stamp modern.
La storia ciafa corú, profondité y intensité tres les cianties fora dl "Messias" de Georg Friedrich Händel, che gnará portades dant dal Cor de Dlijia da La Val cun n ensemble baroch sot ala direziun de Elio Clara. Intratan n workshop cun la balarina y coreografa Anastasia Kostner á le cor colié adöm musiga, movimënt y contignü dla storia. Ursula Tavella á dessigné scenografia y costüms, Julian Marmsoler é responsabl dl design dles löms, le tonn é tles mans de Benni Valentin.
Les rapresentaziuns é te dlijia da La Val. Premiera en vëndres ai 19/10 dales 20:00, les atres rapresentaziuns é: domënia ai 21/10 dales 16:00, jöbia ai 25/10 dales 20:00, sabeda ai 27/10 dales 20:00 y domënia ai 28/10 dales 16:00. I posć n'é nia numerá. Les chertes vëgn venüdes n'ora dan les rapresentaziuns. Informaziuns al 333/8236384.

La Ila: film por mituns
Ai 19 d'otober vëgnel mostré le film animé "Coco"
Le Consëi Cultural de Badia inviëia da gní a ti ciaré al film animé "Coco", en vëndres ai 19 d'otober dales 17:00, tla Ciasa dla Cultura a La Ila. Miguel á na gran pasciun por la musiga y ince sce süa familia ti proibësc da fá musiga, ti vál do a süa gran pasciun y röia pro sü antenac che le daidará.

La politica y la jonëza
Lîtes provinziales: ai 16 d'otober na sëra d'informaziun y discusciun cun i candidac ladins, sön tematiches de mituns y jogn
En gaujiun dles lîtes provinziales 2018, mët da jí le Sorvisc ai Jogn Val Badia en mertesc ai 16 d'otober dales 20:00 tl Zënter dla Jonëza y Cultura SaJ.un, na sëra costrutiva d'informaziun y discusciun cun i candidac ladins, sön tematiches che reverda i mituns y la jonëza, mo nia ma, sciöche: Sorvisc ai Jogn, strotöres por la jonëza, monn dl laur, frabiché-contribuc, uniuns dl sport, scora de musiga, volontariat, burocrazia y responsabilités tles uniuns, sorvisc zivil, sanité, viabilité...
La moderaziun é de Diego Clara. Inviada é döta la popolaziun!
Le Sorvisc ai Jogn Val Badia se vëiga sciöche istituziun por le sostëgn sussidiar ales porsones, ai grups, ales uniuns, ales assoziaziuns y istituziuns che se dá jö cun le laur por y cun i mituns y la jonëza de nosta Valada. Dlungia chësc rapresentunse i interesc dla sozieté y dla politica y fajun da interlocutur por les ghiranzes di mituns y di jogn.

Le malester psichich
"Maraties psichiches - canche an perd la ligrëza y la crëta da vire. Co pói pa vire impara?" N domisdé cun siur Tone Fiung, ai 18 d'otober dales 15:30, tla stüa da Oies a Badia
La porsona ó se sté bun y ara spera che ara vais ince tres da se sté bun. Ma che tla vita ne vára nia dagnora insciö y la sanité depënn da tröpes cosses, da avenimënc, dala personalité de vignun, dala forza da afronté les situaziun ince dramatiches. Spo perdon la ligrëza y la crëta de vire, an á la "loade", dijôn plü da dî. Les depresciuns, tëmes o fobies é maraties cun chëres che tröpes families y porsones é aldedaincö confrontades, deache vignun pó tome ite. Al é cosses che fej pert de nosta realté moderna, porchël desson capí, ci che an pó fá, co che ara vá da azeté de te' situaziuns, mo suradöt che an dess se lascé daidé. De döt chësc baiará siur Tone Fiung en jöbia ai 18 d'otober dales 15:30 tla Stüa da Oies, en ocajiun dla incuntada dl grup de autoaiüt "Atmosfera". Düc é inviá da tó pert.

Festa del Rengraziament: "L ladin te fana"
L'Union di Ladins de Fascia, col didament del Comitat Manifestazions de Ciampedel e del Comun de Mazin, met a jir la Festa del Rengraziament en domenia ai 14 de otober a Ciampedel e Ciampestrin.
Program:
Se pea via da les 9 con la defilèda da Piaz de Ciampedel con la Musega Auta Fascia e Gropes de Folclor per jir fin sun gejia, olache da les 9.30 l'é la messa grana ofizièda da don Luigi Trottner.
Dò messa, fora de Gejia sarà vèlch sonèda de la Musega e i intervenc del president de l'Union Fernando Brunel e de l'autoritèdes.
Domesdì da les 15.00 a Ciampestrin tel PalaDolomites meisa torona su la tradizions, la cultura e l lengaz te la magnadiva e i prodoc de noscia val e consegna de n recognosciment a la Sociazion Cheghes de Fascia.
La festa se serarà sù con de pìcola cerces de l'Azienda agricola biologica "Soreie".

Le monn demorvëia di tiers
Proieziun de fotografies de Silvan Lamprecht , en jöbia, ai 18 d'otober dales 20:30 a San Martin de Tor
Le Fotoclub Val Badia á le plajёi de invié en jöbia ai 18 d'otober dales 20.30, tl salf dl Istitut Ladin "Micurá de Rü" a San Martin de Tor, a na proieziun de fotografies dl fotograf Silvan Lamprecht. Al sará da odëi le monn di tiers te situaziuns particolares dla natöra. Bele da pice insö é Lamprecht sté afasciné dala natöra y chёsc l'á porté a se dé jö cun la fotografia. Al oress partí chёstes ligrёzes cun i atri y al dess nasce n sentimёnt de respet y de amiraziun ti confrunc dla natöra.