Manifestazions atuales speziales

Data

09 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 9 de november
"Qualcuno volò sul nido del cuculo"
A teàtro con "Ra Filodramatica d'Anpézo"
Sto outón ra Filodramatica ra torna in šèna con un teatro par zivil adatà da Martino Apollonio Varentin da un testo inglese de Dale Wasserman voltà par talian da Giovanni Lombardo Radice. Sul palco se moarà na ventina àtore ogade da Martino Apollonio Varentin, che l'è tornà a me dià na man, e dapò i n' è outretante che no sé vede ma che i s'à dà fei par podè ruà in šena. 'L è un toco anbientà inze un manicomio che feš pensà sóra. Ra prima ra sarà ai 10 de noènbre da res 9 da daséra, ai 11 de noènbre da res 4 dapò dišnà, ai 14, 16 e 17 de noènbre senpre da res 9 da daséra. El vegnirà fato inze ra Sàla da teàtro "Alexander Girardi" in Anpézo. I biliete pò èse fisàde al 3332707943 dapò res 6 da daséra. Ve špetón dùte cuànte.

Festa per i 40 agn dla Comunanza Ladina a Bulsan
En sabeda, ai 17 de november 2018, da les 15:00 inant, tl Ciastel Marec a Bulsan
I Ladins che viv a Bulsan y entournvia á bona rajon de fé festa en chest auton: al é passé 40 agn da canche al fova vegnú metú en pe na union di ladins a Bulsan y ti raions vejins.
L program dla festa veid dantfora la daurida ofiziala da les 15:00 con l salut ofizial y i de plu intervenc: da pert de Carlo Willeit, Erwin Frenes y Franco Doné y Ivan Lezuo. Per l'ocajion vegnel ence partí fora onoranzes a persones che s'á fat merit te duc chisc agn dla Comunanza Ladina. La grupa "De Cater", les Sorans Lezuo y Hilda y Paul Schuen cianta y sona, l joblere Simon Kostner prejenteia n intermezzo comich. Les paures da La Val enjigna n bon bufet de speisa ladina.

"Jun a cianté!"
En sabeda ai 17 de novëmber dales 16:00 vëgnel presenté tl Istitut Ladin a San Martin le liber "Jun a cianté! - 25 cianties tradizionales por mituns te 4 lingac". Les cianties ará ince n codesc por les ascuté
Al n'é nia n'atra publicaziun cun 25 cianties por mituns te cater lingac: por ladin, todësch, talian y inglesc. Y les cianties n'é chiló nia ma scrites y publicades te n liber, mo ares é ince gnüdes tutes sö te vigni lingaz: indöt 101 cianties ("Berba Iaco" é ince por franzesc) stampades y registrades da n grup de stromentalisć dal vi y ciantades da na möta o n möt dal vi.
"Jun a cianté!" (le titul é tut dala ciantia "Cucu, cucu") atoca n punt important dla formaziun y educaziun d'aldedaincö: la promoziun dl cianté cun mituns y dl plurilinguism tl medemo tëmp. I mesi é classics y moderns: da öna na pert n liber stampé y registraziuns cun sonns tuc sö dal vi y nia computerisá, dal'atra pert na app y la poscibilité da ascuté les registraziuns diretamënter tres n codesc QR.
Les cianties tutes ite é por la gran pert tradizionales, ares á suravit deplü dezens y é tres ciamó atuales. N gran numer é tutes dal cërtl cultural de lingaz todësch, les atres da chël de lingaz inglesc, talian o franzesc. Öna sora é originala ladina ("Pesc dla sëra"). Ma dër püces ê bele da ciafé te deplü lingac - la maiú pert dles traduziuns ti atri lingac y dötes les verjiuns ladines é gnüdes fates da André Comploi.
N valur spezial i dá ala publicaziun les ilustraziuns de Matteo Rubatscher, che n'é nia ma decoraziun, mo é pert integrala. Les interpretaziuns dessignades y depëntes a man de düc i 25 toc dëida trasmëte te na manira plajora le contignü y descür n gröm de details y comentars filigrans ince por i adulc - y alisirëia le cianté cun mituns. Pici y gragn incuntará val' de conesciü, descuriará val' de nü - y sintiará dantadöt ligrëza y plajëi. Sides te familia co ince tla scolina y te scora: "Jun a cianté!"

Marcé dl cufer a Corvara
En domënia ai 11 de novëmber dales 10:00 ales 17:00
La Uniun dles Ëles da Corvara organisëia n marcé dl cufer, cun mostra y poscibilité da cumpré de bel patüc fat a man. Le marcé vëgn tigní en domënia ai 11 de novëmber dales 10:00 ales 17:00, tl salf dles manifestaziuns da Corvara. Al sará ince n pice renfrësch - cun spënora lëdia che jará a bëgn dl'assoziaziun Comedicus.

"Alla mamma rompi il braccio ... a me il cuore!"
Chësc é le titul dl referat che vëgn tigní ai 14 de novëmber dala dot.ia Giuliana Franchini, tla cornisc dla mostra sön la violënza assistida te Raiun Sozio-Sanitar a Picolin
Canche mituns mëss vire y/o odëi situaziuns de violënza fisica, verbala y psicologica danter geniturs o porsones a chëres che ai é tacá afetivamënter, baion de violënza assistida. La dr.ia Giuliana Franchini, psicologa y pscicoterapeuta di mituns che laora pro "Il Germoglio - La Strada der Weg" da Balsan dij: "Al é fondamental rumpí le chît y prevení la violënza, savëi da lí i signai dl sté ert di mituns a na moda che ai pois crësce svilupan al miú so monn de afec y emoziuns. Ma a chësta moda podarunse dí de ester na sozieté zivila". Al sará ince la poscibilité da baié cun na rapresentanta dl Sorvisc Ciasa dles ëres da Bornech y da odëi la manira da lauré dles colaboradësses dla Assistënza sozio-pedagogica te Raiun Sozial Val Badia. Düc é inviá en mercui 14 de novëmber dales 20.00 te Raiun Sozio-Sanitar a Picolin.

Teater "I Iubilars"
L'uniun teater de Badia inviëia düc al teater da rí "I Iubilars" de Rolf Bechtel, sot ala rejia de Anna Palfrader, cun la traduziun tl ladin de Sylvia Costabiei
L'uniun de teater de Badia s'la conforta da ves presenté chësc toch da rí y ves inviëia a öna dles 6 rapresentaziuns tl salf dla ciasa Jan Batista Runcher a San Linert: la premiera é incö vëndres ai 9/11 dales 20:00, spo vára inant en mercui ai 14/11 y en vëndres ai 16/11 dales 20:00, sabeda ai 17/11 dales 15:00 y dales 20:00, domënia ai 18/11 dales 15:00. Prenotaziuns al numer 328/0984630, poscibilmënter danter les 19:00 y les 21:30.
Al jobelnëia por os: Erica Aiarëi, Carlo Bernardi, Paola Bernardi, Maddalena Delmonego, Renate Irsara, Magdalena Lerchegger, Gustav Mangutsch, Carolin Pitscheider, Pasquale Pitscheider, André Valentin.

Festa dl Aiüt Alpin Mareo
Indoman sabeda ai 10 de novëmber, tl salf dles manifestaziuns d'Al Plan
L'Aiüt Alpin Mareo inviëia düc canc a süa festa, che vëgn tignida indoman sabeda ai 10 de novëmber dales 19:00 inant, tl salf dles manifestaziuns d'Al Plan. Al sonará danter l'ater Alexander d'Al Plan, i Frak y d'atri grups da druch. Al sará da mangé y da bëre assá por düc y dales 22:30 vëgnel trat fora de bi pesć dala ola dla fortüna.

"Legrëza" de Helga Moroder
Giaurida dla mostra duman sada ai 10.11. dala 17.00 tla sala Luis Trenker, tla Cësa de Cultura a Urtijëi
L titul "legrëza" uel dì per Helga Moroder propi l ti savëi bel a se dé ju cun la criatività, te chësc cajo cun la pitura. La bona man y l sentimënt per i culëures y l'ert ti ie bele unii metui te cuna y nce sce la ert ne n'ie nia si mestier se àla te si tëmp liede for dat ju cun ativiteies criatives.
Tla pitures che Helga lascia udëi te chësta mostra se àla dat ju cun la popes tipiches dla chiena de Gherdëina. I chedri ie depënc cun na tecnica speziela cun cëira y culëures a acril sun tëila, te n stil drët particuler y persunel.
Duc ie nviei ala giaurida n sada domesdì y sambën nce a unì a ti cialé ala mostra, che resterà davierta nchin n dumënia ai 18.11. uni di dala 10.00 ala 13.00 y dala 16.00 ala 20.00.

Trio Stark, Pescia, Mahni
Cunzert n mierculdi ai 14.11. dala 20.30 tla Cësa de Cultura a Urtijëi
Tl cunzert di Jëuni de Mujiga de Gherdëina saràl da audì la Fantasia per vidula y tlavier de F. Schubert y i autri pec da dedò sarà per trio de vidula, tlavier y corn. Plu avisa iel la "Hommage a Brahms" de G. Ligeti y l Trio per corn, vidula y tlavier Op. 40 de J. Brahms. I trëi nterprec ie: Nurit Stark (vidula), israeliana che à studià ti Paejes Tudësc y ie solista o prima vidula de urchestres renumedes; Cédric Pescia (tlavier) à studià tla Svizra y a Berlin y al didancuei sónel tla sales da cunzert plu mpurtantes dl mond y ie prufessëur de tlavier tla "Haute Ecole de Musique de Genève"; Sybille Mahni (corn) à studià a Frankfurt y à venciù pesć pra cuncorsc nternaziunei, la ie prufessëura de corn tla scola auta per mujiga a Würzburg, à sunà sciche solista cun de gran urchestres y cun gran ntujiasm se dàla ju cun la mujiga da camera sunan deberieda cun musizisć de inuem.

Na serada de bal, de gala... n pü' atramënter!
Ai 10 de novëmber a La Val, organisada dal Cor dles Ëres d'Al Plan adöm cun le Cor Raiëta da La Val, cun le sostëgn de Badiamusica
Na sëra plajora cun musiga da salon de na orchestra de 20 porsones che sona archëc y stromënc a fle. Döt cant te n ambiënt da sté saurí, decoré cun savëi, na cëna che plej, n gote de bun vin cun jënt vistida da festa. La musiga fina, la Wiener Tanzmusik, lascia ince pro che an pois s'la cunté, mo suradöt che an pois balé, n iade n pü' atramënter cun saú; an podess feter dí da Opernball, por se lascé porté sön les notes di walzer. Por chi che é gnüs coriusc, é le de da scrí sö la sabeda ai 10 de novëmber dales 19.00 inant, tl salf dles manifestaziuns a La Val. Le Cor dles Ëres d'Al Plan adöm al Cor Raiëta da La Val, cun le sostëgn de Badiamusica, s'á ponsé fora na iniziativa nöia, organisada plü sigü por le pröm iade tla Val Badia. Tl prisc de entrada ala portada de düc, sarál n aperitif lapró. Les chertes pó gní apostades al numer de telefon 349/2303591. Gnide tröc!

"Ollm locker bleibn"
Markus "Doggi" Dorfmann ai 23 de nuvëmber te Tublà da Nives
Se devertì unitant y passé na sëira mpue autramënter, chël ie dessegur zeche che ti fej bon a duc. L "Doggi" fova bele te "Tublà da Nives" dan 3 ani y ova cun si cabaret fat rì duta la sala. Śën iel inò anjenià cun l program nuef "Ollm locker bleibn" y pudon vester segures che mujiga y ironia sarà inò al ordn dl di.
L cabaretist ie cunesciù te Südtirol danter l auter nce per i "Hits" coche "Jesolo", "Himpr Pimpr", "Feirum", "Hymne an die Tscheggl" y pona sambën nce i majeri suzesc "Dr Franz vom Grödnertol".
L cabaret ie n vënderdi ai 23 de nuvëmber da mesa la nuef da sëira te Tublà da Nives (Sëlva). La ntreda costa 10 € (cumëmbri dl Tublà da Nives paia 8 €). L vën prià bel de apusté la chertes danora scrijan a info@tubladanives.it davia che l ie mé 90 lueges da garat.

Dolomitale: l gran Filmfestival
Dai 8 ai 11 de nuvëmber tl Circolo/Lia Mostra d'Ert a Urtijëi
Cun l film dl reghisser de Gherdëina Martin Prinoth "Die fünfte Himmelsrichtung" vëniel giaurì n juebia dala 20.00 l filmfestival. Ti trëi dis do saràl da udëi na bela lingia de films, documenteres y films curc, n vënderdi bele 8 daduman inant y n sada y dumënia dala 14.00 inant, cun danter l auter n cuncors de films curc n sada dala 16.00.
Masterclass n sada dala 14.00 cun Natalie Halla dl'Austria, produtëura de films, che cunterà coche l vën a s'l dé n film per l chino, cun na udleda do la cultrines de si film "Life in four Elements".
Party, brunch y Museum: n sada dala 10.00 "Filmbrunch" cun l mesun de rujené cun reghisseres, produtëures, autores pra velch da pesslé y dala 22.00 inant gran party cun i Madax. N vënderdi vijita debant tl Museum Gherdëina.
Priejes: 18 € per duc i 4 dis, 9 € per un n di, 5 € per un n film (priejes lascei do per cumëmbri dl VKE, dla ULG y dla Lia Mostra d'Ert, persones cun handicap, jëuni nchin a 21 ani, studënc nchin a 26 ani). Chertres danora sot a www.dolomitale.com/#tickets. (Cëla nce a plata 16)

"La roda dl tëmp"
N vënderdi ai 9 de nuvëmber dala 20.00 te Tublà da Nives
Ntan chësc ann à i Cunsëies de Furmazion de Gherdëina metù a jì l proiet "Ti dé tëmp al tëmp", ulache l ie stat de plu manifestazions y scumenciadives ntëur a chësc argumënt atuel y de mpurtanza per duc canc. Śën iesen ruvei ala fin de chësc proiet y sciche ultima manifestazion vëniel metù a jì na sëira de descuscion che va sot al "Forum Sëlva" y che à l titul "La roda dl tëmp". Trëi generazions se anconta y conta de si esperienzes de vita y plu avisa puderàn audì bera Tobia Insam da Paratoni (87 ani), Marco Forni de Sëlva (57 ani) y Valeria Mussner de Sëlva (23 ani). Moderadëur dla sëira sarà Vinzenz Senoner. Duc ie nviei de cuer a unì a scuté su! L vën metù man dala ot da sëira.

Pest de poejies ladines "Angelo Trebo": escrizion dla otava edizion
Termen per mané ite les poejies: 30 de november 2018
Al é n concurs de poejies davert a duc chi che scriv per ladin, metú su dl 1997 a San Martin de Tor. Con l'edizion dl 2012 é l pest trienal vegnú daurí a dutes les variantes ladines y i idioms ladins dl raion dles Dolomites, cie che á porté spo tles ultimes does edizions a na maioura partezipazion da pert de autores y autors. L'edizion nueva, segn daverta, é chela dl 2018. La premiazion é preveduda per d'aisciuda 2019.
Criters y condizions
Da prejenté él - ence en chest iade - anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tó pert él da paié ite sun l cont bancar IBAN IT41H 08010 58830 000 304000455 intesté a l'EPL-Ert por i Ladins la comiscion de partezipazion de 20,00 euro.
Vigni autor/a prejenteia les poejies te cater copies, les contrassegneia con n pseudonim y ajonta lapró te na mendra cuverta scluta si dac anagrafics y l'atestazion dl versament dla comiscion de partezipazion. Sun la mendra cuverta scrivel/ela su si pseudonim.
La miscion per mané ite o dé ju a man l material per tó pert al concurs - anter l 30 de november 2018 - é: EPL-Ert por i Ladins, Pest "Angelo Trebo", str. Stufles 20, 39030 San Martin de Tor/San Martino in Badia, BZ.