Manifestazions atuales speziales

Data

16 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 16 november
"Qualcuno volò sul nido del cuculo"
A teàtro con "Ra Filodramatica d'Anpézo"
Sto outón ra Filodramatica ra torna in šèna con un teatro par zivil adatà da Martino Apollonio Varentin da un testo inglese de Dale Wasserman voltà par talian da Giovanni Lombardo Radice. Sul palco se moarà na ventina àtore ogade da Martino Apollonio Varentin, che l'è tornà a me dià na man, e dapò i n' è outretante che no sé vede ma che i s'à dà fei par podè ruà in šena. 'L è un toco anbientà inze un manicomio che feš pensà sóra. Ra prima ra sarà ai 10 de noènbre da res 9 da daséra, ai 11 de noènbre da res 4 dapò dišnà, ai 14, 16 e 17 de noènbre senpre da res 9 da daséra. El vegnirà fato inze ra Sàla da teàtro "Alexander Girardi" in Anpézo. I biliete pò èse fisàde al 3332707943 dapò res 6 da daséra. Ve špetón dùte cuànte.

Festa per i 40 agn dla Comunanza Ladina a Bulsan
Indoman, sabeda ai 17 de november 2018, da les 15:00 inant, tl Ciastel Marec a Bulsan
I Ladins che viv a Bulsan y entournvia á bona rajon de fé festa en chest auton: al é passé 40 agn da canche al fova vegnú metú en pe na union di ladins a Bulsan y ti raions vejins.
L program dla festa veid dantfora la daurida ofiziala da les 15:00 con l salut ofizial y i de plu intervenc: da pert de Carlo Willeit, Erwin Frenes y Franco Doné y Ivan Lezuo. Per l'ocajion vegnel ence partí fora onoranzes a persones che s'á fat merit te duc chisc agn dla Comunanza Ladina. La grupa "De Cater", les Sorans Lezuo y Hilda y Paul Schuen cianta y sona, l joblere Simon Kostner prejenteia n intermezzo comich. Les paures da La Val enjigna n bon bufet de speisa ladina.

Pest de poejies ladines "Angelo Trebo": escrizion dla otava edizion
Termen per mané ite les poejies: 30 de november 2018
Al é n concurs de poejies davert a duc chi che scriv per ladin, metú su dl 1997 a San Martin de Tor. Con l'edizion dl 2012 é l pest trienal vegnú daurí a dutes les variantes ladines y i idioms ladins dl raion dles Dolomites, cie che á porté spo tles ultimes does edizions a na maioura partezipazion da pert de autores y autors. L'edizion nueva, segn daverta, é chela dl 2018. La premiazion é preveduda per d'aisciuda 2019.
Criters y condizions
Da prejenté él - ence en chest iade - anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tó pert él da paié ite sun l cont bancar IBAN IT41H 08010 58830 000 304000455 intesté a l'EPL-Ert por i Ladins la comiscion de partezipazion de 20,00 euro.
Vigni autor/a prejenteia les poejies te cater copies, les contrassegneia con n pseudonim y ajonta lapró te na mendra cuverta scluta si dac anagrafics y l'atestazion dl versament dla comiscion de partezipazion. Sun la mendra cuverta scrivel/ela su si pseudonim.
La miscion per mané ite o dé ju a man l material per tó pert al concurs - anter l 30 de november 2018 - é: EPL-Ert por i Ladins, Pest "Angelo Trebo", str. Stufles 20, 39030 San Martin de Tor/San Martino in Badia, BZ.

"Calënder Ladin 2019"
Festa de presentaziun a San Martin de Tor
Le Comité dl Calënder Ladin y l'edituria EPL-Ert por i Ladins inviëia ala picera festa de presentaziun, en mercui ai 21 de novëmber 2018, dales 18:00, tla Ostaria Nicl a San Martin de Tor. Al gnará porté dant le contignü dla pratica ladina nöia y invié da sté adöm danter colaboradus y editurs. Al vëgn recordé che le "Calënder Ladin" vëgn indô venü fora por les ciases dla valada, y ince te chisc posć: botëga Market Richard Mutschlechner a Longega, botëga La Mascotte a Al Plan y pro la redaziun de La Usc di Ladins a San Martin de Tor y a La Ila. Le prisc é de 13,00 €.

L daunì dl raion artejanel
N merdi ai 27.11. dala 20.00 tla sala dl Cunsëi de Chemun a Urtijëi
N merdi ai 27 de nuvëmber (y nia ai 20 de nuvëmber coche ruvà ite al infal tla Plata de Gherdëina) uniràl metù a jì na sëira de nfurmazion y descuscion n cont dl daunì dl raion artejanel a Urtijëi. Te chësc raion iel de plu firmes da artejan che à si sënta, ma l fossa mo truepa lerch da garat. Ultimamënter à de plu persones desmustrà nteres y l Chemun ulëssa dé nfurmazions n cont dla puscibltà per artejans de frabiché na berstot. Duc chëi che ëssa nteres y ulëssa avëi nfurmazions plu avisa ie nviei de cuer ala sëira.

L cuartet "de cater" cumplësc 20 ani y prejënta si CD nueva
N dumënia ai 18.11. dala 18.00 tla Cësa de Cultura a Urtijëi
Vint ani iel śën ca da canche nëus - Silvia Delago, Sara Delago, Christine Wanker y Katrin Perathoner - on scumencià a cianté deberieda te chësta furmazion. Do avëi dat ora na prima CD tl 2006, ntlëuta deberieda cun l Herbert Pixner Trio, ons tëut chësc aniverser sciche ucajion per tò su na plata nueva dal titul "de cuer". Sun chësta CD iel da audì nosta plu bela cianties di ultimi ani. Leprò saràl nce da audì vel' pez sunà dal cuintet "Unknown Brass" de Puster. Tres la sëira menerà Sigrun Falkensteiner. Nëus dla grupa "de cater" y l cuintet "Unknown Brass" ulon nvië duc vo a unì a nes scuté su y se ncunferton sun vosc unì y a ciaculé cun vo pra n bon got y zeche da pestlé do la pert ufiziela.

Grupa de Sport per l Cuer te Gherdëina
Dai 20 de nuvëmber vëniel scumencià cun la Grupa de Sport per l Cuer de Gherdëina
Na nuvëmber inant iel nce te Gherdëina na grupa de sport per persones cun problems al cuer. Persones cun malaties croniches dl cuer y dla zirculazion se anconta n iede al'ena a fé ginastica deberieda, ulache les vën acumpaniedes da na duturëssa y da na fisioterapista cualificheda. L muvimënt juda pea acioche n sibe boni de rënder deplù tla vita da uni di y fej nce bon ala sanità n generel. Nfurmazions giàten sot a www.herzstiftung.org.
Dai 20 de nuvëmber inant se ùrten uni merdi, ntan l ann de scola, tla palesta dl ITE Raetia a Urtijëi dala 19.00 nchin la 20.00.
Per nfurmazions y per se scrì ite ala Grupa de Sport per l cuer de Gherdëina: guido.tinderla@gmail.com.

Cunzert de S. Zezilia dla Mujiga de Urtijëi
N dumënia ai 25.11. dala 5 domesdì te Cësa de Cultura a Urtijëi
Chëst ann unirà l cunzert acumpanià dala sopranista dl luech Brigitte Canins. Ëila cianterà deberieda cun i musicontri i pec "Heia, in den Bergen" dla opereta "Die Czárdásfürstin" de E. Kálmán, "Once Upon a Time in the West" y "The Ecstasy of Gold" de Ennio Morricone. Da audì saràl oradechël l pez "Concert pour Trombone" de Rimsky-Korsakoff cun solo de posauna de Jonas Holzknecht. L dirighënt Egon Lardschneider à mo cris ora pec cunesciui coche l pez "James Bond 007" na selezion per mujiga y "Disney Fantasy".
Chësc autonn à la Mujiga metù a jì n proiet deberieda cun la scola elementera de Urtijëi. I sculeies à fat dessënies sun l tema dla mujiga, che sarà tachei ora te sala l di dl cunzert.
Nvion duta la families y cumpanies dla mujiga a unì a scuté su l cunzert de S. Zezilia y a ti cialé ai biei dessënies!

Co capí y afronté i desturbs da mangé
Desturbs da mangé canche i mituns devënta jogn: co féjon pa da capí canche zacai á chisc desturbs y ci pón pa fá?
Le Consëi de Formaziun Badia mët da jí en jöbia, ai 22 de novëmber 2018, dales 19:30, a La Ila tla Scora mesana na serada cun la psicologa Dot. Antonietta Mastrandrea. Canche i mituns devënta bel plan jogn, él n tëmp olache so corp se müda, olach'ai vir emoziuns stersces y se sint porchël gonot stressá, confusc o ansiusc. Avisa te chësc tëmp dl'adolescënza pól gní fora desturbs da mangé sciöche l'anoressia, la bulimia o le „binge eating", ince sc'al sozed tres plü gonot che mituns y mitans de 10-12 agn á bele chisc problems. Le fin de chësta incuntada é da capí co che i familiars pó s'intëne de chësta sort de desturbs, co ch'ai pó fá da nen baié cun sü mituns y ci ch'an pó fá por i curé.

Cëna de chi dl '63
I nasciüs dl 1963 dla Val Badia é bel inviá a na cëna y aurela cörta, ai 6 de dezëmber a Badia
Chi dl 1963 ó festejé sü 55 agn cun na sëra de alegria y aurela cörta, porchël é düc chi dla classa dla Val Badia inviá ala festa, che vëgn tignida la sabeda ai 6 de dezëmber dales 19:00, tla ostaria La Munt a Badia. L'invit mené fora dij insciö: "A os düc dl sessantetrëi, ai 6 de dezëmber da sëra ci él mo mai, i jun a La Munt dal lift de Badia, da fá festa, tolesse la bria. Na bona cëna, assá da bëre y la musiga ne pó nia mancé, por 70,00€ él döt organisé. Passede inant la parora, plü che i sun, plü bel che al é, mo chi dala lüna dess s'un sté."
Por tó pert ala serada, él da paié ite la soma anter la fin de novëmber söl cunt IT88D 06045 58180 000000098500, intesté a Susanna Castlunger. Por informaziuns cherdé sö le 320/1741872.

"Jun a cianté!"
Indoman sabeda ai 17 de novëmber dales 16:00 vëgnel presenté tl Istitut Ladin a San Martin le liber "Jun a cianté! - 25 cianties tradizionales por mituns te 4 lingac". Le liber sará ince na app por smartphone y tablet
Al n'é nia n'atra publicaziun cun 25 cianties por mituns te cater lingac: por ladin, todësch, talian y inglesc. Y les cianties n'é chiló nia ma scrites y publicades te n liber, mo ares é ince gnüdes tutes sö te vigni lingaz: indöt 101 cianties ("Berba Iaco" é ince por franzesc) stampades y registrades da n grup de stromentalisć dal vi y ciantades da na möta o n möt dal vi.
"Jun a cianté!" (le titul é tut dala ciantia "Cucu, cucu") atoca n punt important dla formaziun y educaziun d'aldedaincö: la promoziun dl cianté cun mituns y dl plurilinguism tl medemo tëmp. I mesi é classics y moderns: da öna na pert n liber stampé y registraziuns cun sonns tuc sö dal vi y nia computerisá, dal'atra pert na app y la poscibilité da ascuté les registraziuns diretamënter tres n codesc QR.
Les cianties tutes ite é por la gran pert tradizionales, ares á suravit deplü dezens y é tres ciamó atuales. N gran numer é tutes dal cërtl cultural de lingaz todësch, les atres da chël de lingaz inglesc, talian o franzesc. Öna sora é originala ladina ("Pesc dla sëra"). Ma dër püces ê bele da ciafé te deplü lingac - la maiú pert dles traduziuns ti atri lingac y dötes les verjiuns ladines é gnüdes fates da André Comploi.
N valur spezial i dá ala publicaziun les ilustraziuns de Matteo Rubatscher, che n'é nia ma decoraziun, mo é pert integrala. Les interpretaziuns dessignades y depëntes a man de düc i 25 toc dëida trasmëte te na manira plajora le contignü y descür n gröm de details y comentars filigrans ince por i adulc - y alisirëia le cianté cun mituns. Pici y gragn iacuntará val' de conesciü, descuriará val' de nü - y sintiará dantadöt ligrëza y plajëi. Sides te familia co ince tla scolina y te scora: "Jun a cianté!"

Reuniun generala dla Lia da Munt Ladinia Val Badia
En vëndres ai 23 de novëmber dales 19:30, tl salf dles manifestaziuns a San Martin de Tor
La Lia da Munt Ladinia Val Badia s'abina ai 23 de novëmber a San Martin de Tor, tl salf dles manifestaziuns, por tigní la reuniun generala. Al vëgn fat n bilanz sön l'ativité fata tratan l'ann 2018, al vëgn presenté le program por l'ann 2019, mo al vëgn ince fat festa por sté adöm en compagnia. An podará constaté tan dinamica y ativa che la Lia da Munt é, y tan tröpes manifestaziuns desvalies che vëgn organisades. Al ne manciará nia n intratignimënt musical y sambëgn val' de bun da mangé.
La Lia da Munt Ladinia Ves inviëia a tó pert a chësta sëra de informaziun y d'aurela cörta, y se conforta da podëi Ves saludé.

Conzert "Tiere Ladine"
"Tiere Ladine" o "Teres Ladines" é le titul dl conzert, a chël che la Müjiga da San Ciascian y la Mujica da Fodom inviëia en sabeda ai 24 de novëmber dales 20:30, tla Ciasa dla Cultura a La Ila
Al dess ester na ocajiun por alzé fora le liam sterch danter les valades ladines y por alzé fora y renforzé nosta identité ladina, döt chësc tres la musiga. Le dirighënt de intrames les musighes, Giuliano Federa, á chirí fora n program dër desvalí por chësta sëra. Le conzert gnará daurí cun na fanfara trionfanta, dal titul de "Fanfare and flourishes" dl componist James Curnow. Inant jarára spo cun musiga da film, an podará aldí le toch "La Storia" de Jacob de Haan.
N pü' le zënter dla sëra sará dessigü la presentaziun por le pröm iade tla Val Badia, dl toch "Tiera Ladina", n toch scrit dal componist Antonio Rossi por la Mujica da Fodom, sön inciaria dl presidënt de chësta, Giovanni Pellegrini.
N pü' sciöche les döes musighes á orü alzé fora le liam danter les döes valades ladines, á ince le componist Armin Kofler orü alzé fora le liam musical danter döes musighes dal nord y dal süd dles Alpes, cun le toch "Transalpina", che gnará spo presenté. Inant jarára indô cun musiga da film, cun n toch de John Powell dal titul "How to train your dragon".
Tla secunda pert dl conzert podarán aldí n potpourri de 30 melodies conesciüdes te 3 menüc, tl toch "Instant Concert" metü adöm da Harold L. Walters. Tratan la sëra ne podô sambëgn nia falé na bela polca: "Von Freund zu Freund" dl componist Martin Scharnagl. Tla finada aldiarán spo ciamó la marcia "Ruetz Marsch" de Erwin Trojan y n medley dër da druch de melodies conesciüdes dal titul "Les Humphries in Concert" metü adöm por musiga da fle da Kurt Gäble. Düc é dër bel inviá da gní a ascuté sö chësc conzert n pü' particolar.

"Dis cumpedá é dis de valüta"
Meinhard Feichter lî fora de so liber "Gezählte Tage sind kostbare Tage", ai 23 de novëmber tla biblioteca dl Istitut Ladin a San Martin
"Gezählte Tage sind kostbare Tage": chësc é le titul dl liber scrit dal librá da Bornech Meinhard Feichter. Ël á ciafé dan 6 agn na diagnosa de n crebesc nia da varí y cunta te na manira sinziera y daverta sciöche al á fat da se dé jö impara y da resté positif dant a so destin. Al é n liber de esperiënzes che ó ti fá coraje ales porsones che mëss se confronté cun na burta maratia, mo al é ince por chi che é sagns y ti ciara ala vita cun na majera atenziun y cosciënza. Un de sü messaji é: tla maratia pón ciafé na strategia por crësce a livel personal. L'autur lî fora de so liber te biblioteca dl Istitut Ladin a San Martin de Tor, en vëndres ai 23 de novëmber dales 20:00.

"L'aministradú de sostëgn" - n curs
Curs de basa ai 20 y 22 de novëmber, te Raiun Sozial Val Badia a Picolin
L'Assoziaziun por l'aministraziun de sostëgn - "Verein für Sachwalterschaft" organisëia n curs de basa sön chësta tematica ai 20 y 22 de novëmber dales 16:30 ales 19:30, te Raiun Sozial Val Badia a Picolin. L'aministradú de sostëgn dëida porsones che n'é daldöt o en pert nia bones da fá da sores, che adora sostëgn, ince pro cosses dla vita da vignidé, sciöche te caji de demënza p.ej. pro l'aministraziun dl patrimone o da fá domandes al'aministraziun publica o sanitara, o pro chestiuns de banca. Al gnará dé informaziuns sön la normativa, sön les responsabilités y sön i dovëis de n aministradú de sostëgn. Le curs é debann y an pó se scrí ite anter i 16 de novëmber 2018 sot ala mail info@sostegno.bz.it. Al é ponsé por porsones ches fej chësc sorvisc, sciöche ince dötes les porsones che foss interesades da le fá tl dagní.

"L inuem"
La Grupa de Teater de Urtijëi nvieia a unì a ti cialé ala cumedia, ulache la va de n inuem che rëudla su n drë stuep
L se trata de na cumedia franzëusa de Matthieu Delaporte y Alexandre de la Patellière, che vën purteda dant tla rujeneda tudëscia cun l titul "Der Vorname".
L prufessëur liberel nteletuel Pierre, prufessëur de leteratura, y si fëna Elisabeth nvieia a na cëina cun Vincent, l fra de Elisabeth, persona da n grandiscimo suzes y si fëna Anna che aspieta iust n pop, y cun l cumpani ti tëmps da jëuni Claude.
La sëira ie drët plajëula y de cumpania, nchin che Vincent cunedësc te n mumënt de riedà, che a si mut ti dajeràl inuem Adolf. Duc ntëur mëisa ie ora de sé, ma bel plan, se n dijan via y ca, vën uniun a frida a dì cie che ti druca. Depierpul che la descuscion va inant y vën for plu ciauda, vëniel nce a lum do y do cunflic che cujova bele giut dovia y sucrëc giut scutei via.
Sun palch per chësta reprejentazion saràl da udëi:
Heidi Rabanser sciche Elisabeth, Luis Mahlknecht tla pert dl prufessëur Pierre, Rudi Insam l cumpani, Adam Demetz tla pert dl fra de suzes de Elisabeth y Irene Insam ie la fëna che aspieta.
L pez ie unì mparà ite sot ala regia de Patrick Perathoner cun la assistënza de Hanenn Huber.
L teater vën purtà dant tl "Wirtschaftspark 181" a Urtijëi tla streda Purger
n mierculdi ai 21.11.
n sada ai 24.11.
n merdi ai 27.11.
n juebia ai 29.11.
n vënderdi ai 30.11.
for dala 8 da sëira.
Chertes danora giàpen coche for tla butëiga Scudela, tel. 0471 797298.

Festival de bal "Alps Move"
Ncuei vënderdi, 16.11. dala 20.00 a Urtijëi tla Cësa de Cultura
Per l festival de bal Alps Move, vëniel metù a jì nsnuet nce na sëira a Urtijëi. L sarà da udëi na performance de bal y teater cun 4 balarins, danter chisc la balarina de Urtijëi Anastasia Kostner. I bai ie ispirei ala tematica "strive", al se purvé de arjonjer, de vester for danora, a vester i miëures, carateristica tipica de nosta sozietà, che spënj semea mé de viers dl suzes.
Anastasia à scrit la coreografia dla performance per la cumpania de bal de Maran Fucinadanza. L se trata de bal cuntemporan che tol truep elemënc dal bal tlassich, ma nce dai bai tradiziunei dl Iapan y dl Brasil, nchin a abiné formes nueva de bal.

Sëira de nfurmazion y prupostes per i zitadins
N merdi ai 20.11. dala 20.30 tla Cësa de Cultura de Urtijëi
L'aministrazion dl Chemun de Urtijëi nvieia duc i zitadins a na sëira de nfurmazions y prupostes.
I reprejentanc de Chemun dajerà nfurmazion n con' de cie che l ie unì fat ti ultimi ani y cie che l ie udù danora proscimamënter.
I zitadins arà sambën la ucajion de fé dumandes, ma nce prupostes. Dut adum unirà prejentà te na forma mpue particulera.