Comentar: Bufales e postverità

Data

30 de jugn 2018

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Semper più de spes sention rejonèr de “fake news” o “bufale”, en sostanza informazions fausses, che al scomenz podea nascer ence da n fal o da n sgherz, slarià fora a truz o adinfal, ma che semper più de spes les vegn metudes fora con l’obietif prefissà de condizionèr la percezion de la jent per fins politics o economics.

N fenoment che tras i social media, col sistem asvelt del “click”, de “me pièsc” o de condivijion che no domana de verifichèr, de controlèr, e se proprio nience de lejer più che la pruma paroles de chel che se é dò a condivider, vegn slarià fora a desmesura.

Per chierir de ferèr chest problem é dò a crescer i intervenc che proa a ge spieghèr a la jent co se defener
da la informazions fausses, co verifichèr se n post é stat publicà da na piata seria o manco, e soraldut i racomana de lejer e durèr semper l cef dant de condivider. L’é adertura ence sic, desche “bufale.net” che à desche miscion demò chela de sbujarèr la neves fausses che śira tel web. Ma se parèr l’é semper più senester, per duc.

Anter la pruma robes che n giornalist cogn emparèr l’é chela de verifichèr la informazions, e chest prum de dut fajan referiment a fontènes istituzionèles. Ampò anchecondì ence chesta indicazion é dò a sutèr, ajache ti ùltimes tempes se veit semper più de spes che raprejentanc politics doura fontènes istituzionèles per dèr fora informazions fausses. I ejempies é oramai n grumon, da chi su la manacia de èrmes chimiches per giustifichèr intervenc militères, a chi su la situazions che revèrda i migranc a chi, magari mendres te la portèda ma autertant grieves tel prinzip e ence più vejins a nos, su la azions fausses ostentèdes da raprejentanc politics.

Te pec egn sion stac bogn de mudèr strumenc con na potenzialità ecezionèla per la difujion de l’informazion, de la cultura de l’educazion e de la democrazia, desche la televijion e l web, te strumenc de des-informazion e de difujion de l’ignoranza, bogn de mudèr la percezion de la realtà, de soscedèr la tema, de engaissèr l’odie e l’egoism che l’é te ogneun e de meter al luster la pèrt piora de la persones, dut per l profit de pec.

Anchecondì aon sdoganà adertura n nef conzet, chel de “post-verità”. La parola ingleisa “post-truth” é stata litèda desche parola de l’an 2016 da l’Oxford English Dictionary. Con chest conzet se rua a conscidrèr pech emportant se l fat contà l sie reèl o faus, chel che conta l’é che l secodesce e l conferme la emozions e la sensazions che aon daìte. L’é l fondament del populism, entenù tel segnificat pior de la parola. L Vangele (Mt 5,17-37) disc “Vosc parlèr sie “scì, scì” e “na, na”, l rest vegn dal Malan”.

 (de Lucia Gross)