Felicetti e i “azzurri” sun Ciareja per la Copa del Mond

Data

06 de dezember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Forin Mont de Vich se se enjigna per la pruma garejèda del zircuit internazionèl ai 14 de dezember. La nazionèla talièna de brea l'à jà tacà a se arcedèr sul portoi Pra di Tori.

Mencia ot dis a la pruma garejèda de slalom lèrch paralel de Copa del Mond ai 14 de dezember sun Ciareja e colassù l’é jà n gran moviment con i arcedaments di atlec de nonzech. Enscin a en vender che vegn la squadra talièna de brea fenirà sia preparazion.

L’é l ladin da Moena Mirko Felicetti e si compagnes più cognosciui: Nadya Ochner, Aaron March, Christoph Mick, Roland Fischnaller, Edwin Coratti e Maurizio Bormolini. Apede l’é ence i atlec de la neva generazion desche Daniele Bagozza, Marc Hofer, Giulio Gasparri, Elisa Caffont, Vivien Santifaller e Alice Lombardi.

Chisc “snowboarder” fazile i sarà chiamé ence per chesta pruma garejèda de Copa del Mond a scomenz sajon olache, apede ai “azzurri”, sarà ence autres 22 nazions.

Te la lista di partezipanc l’é jà ite desvalives inomes de foresć che vel se arcedèr ence per i Jeghes Olimpics che sarà de firé del 2018.

Apede ai sacotences atlec, ence tenc giornalisć internazionèi se à credità. Demò da la Republica Ceca cognessa ruèr na dejina de reporter. L motif prinzipal de chest gran enteress da pèrt di cechi l’é de segur la partezipazion de Esther Ledecka, per doi outes campionessa del Mond de brea e che da pech la se à fat cognoscer per aer fat l mior temp te l'ùltima proa de la libera a Lake Louise.

L program per la Copa del Mond de brea sun Ciareja

en mercol ai 13 de dezember del 2017

da les 18.00: festa de scomenz con estrazion di numeres de gara

en jebia ai 14 de dezember del 2017

da les 8.45: calificazions slalom lèrch paralel

da les 12.30: slalom lèrch finèl paralel

da les 13.45: premiazion

en vender ai 15 de dezember del 2017

da les 20.00: festa per la fin de la Copa del Mond 2017

 (vr)