Ra boteghes de i artejane in Boschedel

Data

11 de setember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Par Nadà se podarà fenì i fabricate: d’ousciuda e d’istade del 2018 se śirà inze, da podé scomenzà a lourà. Duto nasce da ‘l insogno de 24 parsones e de ra so families, da podé restà inze ‘l so paes
De chi zinche capanoi su ra spona de Boschedel, tre i é deboto fenide, i é ruade a cuerto, i à fodrade de len, ades i é drio a lourà de inze, da i fenì. S’in vede un outro, deboto fato del duto, su pede el stradon. El cuinto i é drio a ‘l scomenzà ades, con chera de el fenì ignante de ‘l inverno. «On dute acaro, i laore i prozede polito, son drio a mantegnì chel che voraon, canche ón scomenzà» - el me disc Roberto Zambelli Nichelo, presidente de el Consorzio botteghe artigiane di Cortina. «Par Nadà chi capanoi i sarà dute fenide; dapò sarà da scomenzà co ra operes de urbanisazion, strada, scortes, aga, lun e duto chel che ocore, par lourà polito. Conto de śì inze, co ra boteghes, par scomenzà a lourà, par d’ousciuda e d’istade del 2018». Propio ste dis i é drio a bete el pra, r’erba verde, sul cuerto che ‘l é via par sora i prime doi capanoi. A vardà da sora in śo, deboto no s’i vedarà, canche sarà fenì duto.

«Se sà che par ogni laoro ‘l é calchedun che critica, che à da taià śo, ma io ei acaro de cemodo che i é drio a cresce, ste capanoi: i me sà biei – śonta pede el Nichelo – son parsuaśo che see un projeto in armonia, pensà polito, da canche ón scomenzà fin ades, fin canche el sarà fenì. Pi che see ‘l é pensà par lourà polito inze chera boteghes. Voraon aé rispeto par ‘l anbiente e par el bel che ón d’intorno. Par scioudà inze sarà una sola zentrale de cheres a cippato, da brujà pestuze de len. Sora i jete de peton, fate da ra dita De Rigo de Anpezo, vien su i capanoi, in prescia, co i toche pareciade da ra Progress da Parsenon. I mure i é fate polito, da no strazà el cioudo, in Clase A».

I é drio ades a scomenzà ra strada, una sola, che śira duto d’intorno: se và śo de un ver, se torna su da chel outro. Ogni botega r’à ra strada daante. I camion i fesc el śiro, senza aé da fei manovra. In duto sarà vintecuatro boteghes, de outretanta aziendes del paes. «Ei acaro che son restade dute aduna – el disc el presidente – e negun à zedù. Son dute ca, salde, cemodo che son moeste: vó dì che dute crede inze chesto projeto». A i domandà parcé bete dute chi sode ades, ‘ste ane de crisi, ‘l aea respondù: «Voron ese pronte, co ra nostra aziendes, da podé lourà, canche r’economia s’invia danoo». In duto i spendarà sié milioi e meśo de euro; pi de un milion e meśo par cronpà el fondo, su chera spona intrà Śuel e Agabona, sora Pian da Lago. Dinultima sarà zinche capanoi, par 5.500 metre cuadre in duto, su un fondo de 11.970 metre; ogni botega ra sarà pitosc pizora da 150 a 300 metre cuadre cadauna.

«Duto chesto no n’é nasciù par caprizio, ma par responde a ‘l biśoin de trope arteśane, de trope śoen, che à chera de restà inze chesto paes a lourà e a vive. Aziendes che vó lourà e cresce, aduna col turismo de Anpezo, par ese su ‘l mercà, contra chi che rua da fora, ogni di. Son dute drio a se parecià un luó da podé lourà polito. Son drio a ‘l fei ades, che no n’é fazile: ma ‘l é propio chesto che me preme a no zede».

 (Marco Dibona)