Develpai ai mass media ladins!

Data

13 de otober 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’Union di Ladins l’à volù ge dedichèr la Festa del Rengraziament ai mass media ladins.

Chest an l Consei de l’Union l’à tout sù la proponeta de ge dedichèr la Festa a duta la persones che se à dat jù a scriver per ladin, a fèr trasmiscions radio o televijion per ladin.

En sabeda te la sala de la scoles entitolèda a Simonin Maza (un di gregn colaboradores de La Usc e del boletin da Moena, Nosha Jent) dò l’introduzion storica del president de l’Union di Ladins Fernando Brunel l’é stat endrezà doi moments: un più de aprofondiment su la valuta di media ladins anchecondì e n auter più algegher de festa con la premiazion di colaboradores.

Mass media ladins besegn o capriz?

De la situazion di mass media anchecondì l’é stat rejonà te na meisa torona dal titol
“ Mass media ladins besegn o capriz?” con la giornalista de la Usc di Ladins de Fascia Lucia Gross, l responsabol de la redazion de La Usc di Ladins de Gherdena David Lardschneider, la responsabola di Servijes linguistics del Comun general de Fascia Sabrina Rasom e l giornalist de la Rai de Trent Silvano Ploner.

Da la meisa l’é vegnù fora desvalives aspec critics leé ai mass media ladins, problemes e endesfides da tor dant tel curt e lènch davegnir. Lardschneider l’à dit che per scriver o fèr trasmiscions per ladin l’é de gran emportanza saer l ladin, enveze Ploner à responet che dant da dut vegn la coreteza de l’informazion e l contegnù de n articol, “percheche se no – l’à dit Ploner – bastassa tor articoi di sfoes provinzièi e i traslatèr per ladin”.

La premiazion

Vidà da la redadora de La Usc di Ladins de Fascia Monica Cigolla l’é stat l develpai ai colaboradores di media ladins a chi che ge é stat dat na biro con na scrita per ladin. La pruma di premié l’é stat la Veronica Zanoner del Tinoto Gabana, de 97 egn da Moena e enciasèda da egn jun Busan.

Dapò l’é stat l salut de l’ombolt de Moena Edoardo Felicetti, l’assessor Giuseppe Detomas, l president de l’Istitut Cultural Ladin de Fascia Antone Pollam e la presidenta de l’Istitut Cultural Ladin Micurà de Rü, Erika Castlunger.

De bela paroles i à dit ence trei di colaboradores più emportanc di media ladins atives per n gran temp: Fabio Chiocchetti, Claudio Gabrielli de Pavarin e Cecilia Mazzel.

De più su la meisa torona e su la premiazions su La Usc di Ladins de vender ai 13 de otober.

 (vr)

Galaria retrac