Sèn Nicolò ge porta n don spezièl a Bambi

Data

05 de dezember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La sociazions de Poza e Pera se à metù ensema per endrezèr la sègra. Chel che vegn regoet va per finanzièr doi ambulatories per i bec pìcoi.

L paìsc de Poza festeja sie sènt patron en mercol ai 6 de dezember e desche ogne an vegn fat gran festa da duta la comunanza.

Chest an Sèn Nicolò rua a Poza a portèr n don dassen spezièl, n don particolèr per Bambi. I volontadives de duta la sociazions de Poza e Pera se à metù ensema per didèr Bambi a realisèr sie ensomech. La sociazion che deida fora la families con bec che à vèlch desabilità, volessa portèr te Fascia i ambulatories de logopedìa e de fisioterapìa per i bec che à de besegn. Te la veia Calonia de Pera fossa l post per fèr fora chisc doi ambulatories, ma ge vel la restruturèr.

Program de la sègra

Da les 10.30 defilèda da la gejia de Sèn Nicolò fin a la gejia de la Madona de l’Aiut, da les 11.00 messa grana ensema ai bec de la populères, da les 12.00 te piaz de Comun vegn descuert la statua de Tita Piaz.

Sobito dò te tendon marena per duc e domesdì, da les 14.00 spetacol de la pìcola Schuhplattlerinnen, da les 15.00 l spetacol de Circensema, da les 14.45 marindel con Bambi, da les 16.30 premiazion de la families con bec nasciui del 2017 e di venjidores del “Cianton rencurà”, da les 17.00 rua Sèn Nicolò, sobito dò l’é la ola de la fortuna e da les 18.00 conzert de la Musega da Poza. Da les 19.30 l’é la cena e da les 20.30 musega e devertiment con la Spritz Band.

La festa é averta a duta la families e duc i bec de Fascia. L’é na ocajion emportanta per didèr fora i bec manco fortuné e per sostegnir n projet de valuta ensema a Bambi. Sèn Nicolò ve speta!  (Monica Cigolla)