Temp de Nadèl a Sèn Jan

Data

07 de dezember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N pìcol marcià e n grum de scomenzadives lea enc, istituzions e sociazions per valorisèr l zenter culturèl, religious e comerzièl de noscia val.

Anché, jebia ai 7 de dezember, te sala grana de l’Istitut Cultural Ladin a Sèn Jan l’é stat prejentà la pruma scomenzadiva de l’invern 2016/17 de la Proloco de Vich con a cef l conseier de Comun Marco Pellegrin.

L’é l marcià da Nadèl, chest an a Sèn Jan te n percors che pèrt da la Coprativa de Fascia, passa per l’Istitut cultural e rua enscin al Museo Ladin. L’é en dut ot ciasetes e ite per anter i privac che ven artejanat e magnadiva, l’é ence na ciaseta de la Cèsa de Paussa de Fascia con i lurieres fac dai utenc de la strutura ensema ai volontadives e la Scola Ladina de Fascia con lurieres fac a man dai joegn de Betlem.

L responsabol de l’area stampa de la Proloco de Vich, Anton Sessa, l’à dit che Sèn Jan l’é stat cernù per tre rejons: percheche con la Pieif, l’Istitut e l Museo l’é l post mior per viver te l’atmosfera del Nadèl; percheche Sèn Jan (ensema a l’autra frazions de Vich) ge à fat vadagnèr a Vich l recognosciment de Borgo più bel de la Tèlia e percheche Sèn Jan l’é l simbol de la fujion di Comuns de Vich e Poza, che scomenza col 1° de jené 2018.

L’ombolt de Vich, Leopoldo Rizzi l’à spiegà l’emportanza de Sèn Jan te la storia, zenter religious, culturèl, comerzièl e simbol de na union de val che la era tel passà e che i aministradores de Vich e Poza proa endò a fèr con la fujion di Comuns, “prum vèrech envers na union de duc i Comun de la Val” – l’à dit Rizzi.

L diretor de l’Istitut Cultural Ladin “majon di fascegn” Fabio Chiocchetti l’à lodà la scomenzadiva – la pruma te duc chisc egn che l’à leà i desvalives atores prejenc a Sèn Jan, prum de dut l’à metù en conescion con manifestazions l’Istitut con l Museo.

L diretor de la Coprativa de Fascia, Luca Giongo l se à dit ence el content del Marcià che l deida a valorisèr l’area tedant la boteighes. N’outa che se podarà fèr sù i posć per i auti tedò la Coprativa se podarà durèr miec ence l piazal zentral anter la boteighes e l’Istiut.

N develpai l’é jit ence a l’assessora del Comun de Vich Isabella Casari e a la volontadiva Christine Fontana.

L Marcià da Nadèl a Sèn Jan l’é avert enscin ai 10 de dezember e dai 20 ai 24 de dezember da les 15 a les 19, compagné da na lingia de evenc.

En vender ai 8 de dezember

da les 17 te sala grana de l’Istitut Cultural Ladin, conzert de musega jazz e proiezion de filmac entografics

da les 15 a les 19 vijita al Museo Ladin a 1 euro

En sabeda ai 9 de dezember

da les 17 a les 19 te Museo Ladin laboratorie per bec con la Coprativa Soziala Oltre (3,50 euro) e vijita al Museo Ladin a 1 euro

da les 17-19 te sala grana de l’Istitut proiezion de filmac entografics

En domenia ai 10

da les 17 te sala grana de l’Istitut: conzert de Cor de Soraga

Dut l program ence per i etres dis l’é sul sit: www.prolocovigodifassa.com o www.entornvich.com

Tol pèrt: Pech El Pistor; Silvano Ghetta con ogec de legn; Roberto Lorenz con ogec de legn fac a man; Ventura Margherita con decorazions fates co l’acherle; Mario Rasom con ogec de legn fac a man; FassaCoop con prodoc da Nadèl; Masc Aloch con magnadiva; Pro Loco de Vich con vin ciaut; Cèsa de Paussa con lurieres fac dai utenc; Scola Ladina de Fascia con statues de legn e le “Volontadive” de Vich con sones.

 (vr)