Jita en fum la tieja de Titol sun Lauscel

Data

10 de jené 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En mèrtesc ai 9 de jené l’à ciapà fech la tieja de Luigi Pollam Titol da Poza. I studafech no i à podù fèr trop e de la tieja no l’é restà nia.

A veder l fech e chiamèr per prumes i socorsc l’é stat i patrons del Refuge Zedron sunsom Bufaure che da l’autra man de la val i à vedù la tieja de Luigi Pollam Titol sun Lauscel a 2.150 metres de auteza ciapèr fech.

L’era cinch a les trei canche i studafech da Poza i à ciapà la chiamèda e sobito la squadra vidèda dal comandant Andrea Winterle la é pontèda sù envers Lauscel. I era ence n muie cruzié ajache sie patron, Luigi, no l responea al fonin: aló no l ciapa e el no l’era nience al lurier. L’aea dormì te tieja la net dant percheche ló apede, a presciapech 300 metres, l’à la stala con ite bestiam.

Rué sul post i à vedù che Luigi l stajea ben, ampò sia tieja la era jà duta che la brujèa. No se à podù fèr trop, percheche la strèda per ruèr sun Lauscel la é strenta e adorta, amò de più co la neif. Apede dapò ence l’elicoter da Trent con la vasches de èga no l’à podù ruèr sul post per colpa del catif temp, l’era moza e l fiochèa. Se à bele cognù lascèr brujèr la tieja. Apede l’é dut intorn n gran muie de neif (en mèrtesc n sarà stat beleche doi metres) e no l’era pericol che ciape fech de auter.

No sé sà amò la cauja, anché (mercol ai 11 de jené) jia endò sùi studafech a enrescir de miec.

 (vr)