Detomas domana sostegn per i ensegnanc

Data

21 de fauré 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L conseier provinzièl envìa la Provinzia de Trent a studièr fora strumenc per ressolver i problemes anter professores e studenc.





Enstadì tel “question time” del Consei provinzièl l conseier ladin de l’Ual Giuseppe Detomas à portà dant na costion emportanta che revèrda i ensegnanc e la situazions critiches che semper de più rua tel mond de la scola.

Ti ùltimes egn l’é stat de gregn mudamentc tel mond de la scola. L’é mudà la vida de se raportèr anter studenc e ensegnanc e la families é semper più critiches e pertendegoles. Apede chest l smaorament del numer de scolees foresć e la situazions de disabilità e de desturbes del comportament domana che i ensegnanc sie enjigné e didé te la gestion de chisc problemes.

Per lurèr delvers te chesta situazions senestres l’é de besegn de n didament formatif spezifich e de na consulenza che deide a troèr soluzions a problemes spezifics, a miorèr la relazions, a svilupèr ressorses, a promuover e svilupèr la consaputa personèla e a tor dant chesta dinamiches che no l’era tel passà te la profescion de ensegnant.

Per chest Detomas l’à domanà a la Jonta colugn che l’é i struments che la PAT met a jir per ge fèr front a chesta situazions.

L’assessor provinzièl Alessandro Olivi à responet che l sà de chisc problemes e che la PAT la deida dozenc e istituzions scolastiches con determinazion, più avisa con la colaborazion de l’Iprase che l se cruzia de la formazion spezifica di ensegnanc. Olivi l’à ence dit che l’é dò che vegn smaorà la enrescides sui comportaments di bec e l projet “Generazion Z” sul raport anter joegn e gregn. I resultac vegnarà prejenté de mèrz. Tinùltima l’é stat ence trat cà de la proponeta de l’Iprase sui percorsc formatives miré a dozenc che tol ite, per ejempie, la promozion del benstèr te clasc.

Detomas l’à sotrissà l’aut livel de la scola trentina, ma l’à ence dit che ge vel pontèr l’atenzion sui problemes de la scola a 360 degrees, ence sui problemes che pel aer i ensegnanc. Segur, na formazion adatèda e che dure tel temp pel dèr respostes a chisc problemes.