L’é stat troà mort te cambra, no se sà la caujes

Data

12 de merz 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L joen Michele Defrancesco da Moena l’era te la Val Badia a lurèr per na firma de eletrich. La sepoltura la é doman, mèrtesc ai 13 de mèrz te gejia de Moena.

L’à lascià gran destraboniment e marevea, ma soraldut n gran padiment, la neva che da en jebia passèda se à slarià fora te Fascia canche se à sapù che l joen de 21 egn da Moena Michele Defrancesco l’é stat troà mort te na cambra de n hotel vin Badia olache l lurèa per la firma de eletrich Euroluce de Soraga.

Michele en jebia da doman bonora canche l’é levà no l stajea tant ben e l ge à dit a so compagn de lurier che l preferìa se n stèr te cambra. So compagn l ge à dit che l lo aessa chiamà più tèrt per saer coche l stajea. Canche entorn mesdì, dò che no l ge aea responet al fonin, l’é jit te cambra a veder coche l stajea, l lo à troà oramai zenza vita. Anché, lunesc ai 12 de mèrz, l’é stat fat l’autopsia sul corp de Michele per capir delvers la caujes de la mort che purampò no se vegnarà a saer dant de 60 dis. A sentir si coleghes de lurier e l dotor che l’à vedù somea che sie stat aboncont per caujes naturèles, l cher de Michele se à fermà per via de na valvola che se à serà.

L’é stat scrit e dit n muie de robes chisc dis dintornvìa la mort de Michele. I disc ence che en domenia l’é crodà coi schi, en lunesc defat l se lamentèa de mèl a n jeneie e l’aea na tòtola sul cef, ma no se sà se chest à contribuì al malesser e a la mort.

Michele “Micio” l’era n muie cognosciù te Fascia e Fiem, l’aea fat la Scola d’èrt a Poza e l’é stat ence sportif e pascionà de schi. N muie de si conscric e amisc lo à saludà sun sia piata Facebook. “Micio porta toa legreza e to voa de viver ence ai agnoi!” i ge à scrit. Sie père Ivan, patron de na firma de tisler a Pecé, sia mère Nicoletta e sie fra Marco é destrametui dal padiment. Doman, mèrtesc ai 13 de mèrz, l’é la sepoltura te gejia de Moena da les 14.00. L preve don Enrico Conci da Moena l lo cognoscea ben e l ge à fat ence catechesi. “Per sia familia l’é na desgrazia desmesurèda – l’à dit – ence percheche no i sà inout la cauja de la mort, demò con la vejinanza se pel chierir de la didèr a la passèr fora.”      

 (mci)