Sessanta candidac per Sèn Jan

Data

24 de auril 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’é stat prejentà la listes per la litazions di 27 de mé. Trei listes, con en dut 42 candidac, sostegn desche ombolt Giulio Florian e una lista con 18 candidac sostegn desche ombolt Leopoldo Rizzi.
En mèrtesc ai 24 de oril se à serà sù l termin per la prejentazion de la candidatures per la litazions del Comun de Sèn Jan, che sarà ai 27 de mé. L’é stat ofizialisà, descheche l’era jà stat anunzià, la prejenza de trei listes a sostegn de la candidatura a ombolt de Giulio Florian de Ciout e de una lista a sostegn de la candidatura a ombolt de Leopoldo Rizzi.

Vich, Poza e Pera per Sèn Jan
Les à inom “Vich per Sèn Jan”, “Poza per Sèn Jan” e “Pera per Sèn Jan”, la trei listes a sostegn de Giulio Florian a ombolt: dutes trei à l medemo simbol, muda demò l color: un l’é sun fon brun, un sun fon bianch e un sun fon vert, a na vida che metui un apede l’auter i posse componer la bandiera ladina.
Sul simbol l’é dessegnà trei fegures stilisèdes en cerchie, che raprejenta apontin la trei comunanzes de Pera, Poza e Vich, desche leèdes te na tonda o n braciacol.
Te la lista de Vich l’é 15 candidac, e de chisc 5 eles, l’età mesèna la é sot i 40 egn.
Te la lista de Poza l’é 14 candidac, 4 l’é eles e ence chiò l’età mesèna la é sot i 40 egn.
Te la lista de Pera l’é 13 candidac, l’é demò 1 femena e l’età mesèna la é avisa de 40 egn.

Duc valives duc medemi
La lista che sostegn Leopoldo Rizzi desche ombolt l’à inom “Duc valives duc medemi” e la tol ite 18 candidac. De chisc 6 l’é femenes; 10 i é da Vich, 5 da Poza, 2 da Pera e 1 da Roma. L’età mesèna la é de 50 egn.
L simbol de la lista à sul fon i 3 colores de la bandiera ladina e l prejenta la Pieif de Sèn Jan stilisèda, con tedò Sas da le Undesc e Sas da le Doudesc e apede n fior de arnica, che raprejenta la capazità e l’obietif de portèr l benstèr anter la jent. L’inom vel sotrissèr che aon duc i medemi deric e i medemi doeres e che no l’é desferenzes anter un e l’auter.

La candidatures doventarà ofizièles demò dò che la Comiscion litala de Ciavaleis arà verificà che sie a post i requisic e la documentazon perveduda per ogneun.

Podede ampò troèr duc i inomes su La Usc stampèda de vender ai 27 de oril.

 (Lucia Gross)