Studenc protagonisć amò anché al CEAC de Ciavaleis

Data

13 de mei 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La V clas feguratif del Liceo artistich de Fascia à metù fora na beliscima mostra al Museo de èrt contemporana.

330 operes, fates te 2 egn da 13 bec (anzi da 15, conscidran ence i 2 compagnes che chest an no i é più te la clas) metudes fora sui 2 partimenc del Museo de èrt contemporana e vedudes e aprijièdes per 9 dis da n muie de jent.

Chisc i numers de na mostra straordenèra, dal titol “Oltre la lente. Quando l’arte è da scoprire” che i studenc de l’ùltim an del liceo artistich de Fascia à realisà con i professores Lara Steffe e Claus Soraperra. N percors peà via jai doi egn, portà a compiment con l’alestiment de l’esposizion te la prestigiousa senta de Ciavaleis e con la vijita vidèda, semper da pèrt di medemi studenc, e che se sera sù apontin anché, domenia ai 13 de mé, ùltim dì de la mostra che se pel veder con orarie 15.30-19.30.

L’é batères, celules, pìcoi grans de polver i ogec che, vedui travers la lent de n microscop, i à ciapà forma e color col lurier di studenc, e i é mudé patoch, doventan operes grafiches e pitures dassen de gran beleza.

Sala per sala se pel veder dai sboc di projec ai prumes dessegnes e studies grafiches sun papier con ciarbon o śes sun suporc e mesures desferentes enscin a la pitures co la teres e con pigmenc selezioné, con la mans e coi penìe, per ruèr en ultima a la realisazion de la teiles. Apede a la parbuda estetica, frut de n alestiment dassen percacent, dut l percors de reflescion, realisazion, coinvolgiment emotif, alestiment, inaudazion e vijites vidèdes te Museo de èrt contemporana de Ciavaleis per chisc studenc ti ùltimes egn de scola auta te Fascia l’é stat de segur straordenèr.

Chiò podede veder mìngol de retrac de la mostra, ma no ve lascià sciampèr l’ocajion amò anché de jir a la veder dal vif.

De più podarede lejer su La Usc Stampèda de vender ai 18 de mé.

 (Lucia Gross)