Fascia anter sajon e “Ghost village”

Data

17 de mei 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Proon a fèr l pont de la situazion vardan al mudament de Fascia anter sajon e tempes morc, tant per i ghesć che per i fascegn.


Canche se vel meter a una duc i fascegn bèsta dir che Fascia la é bela, che l’é un di lesc più bie che se posse veder su chest mond. Fajan però n vèrech inant, se podessa domanèr: coluna él pa la val de Fascia, chela bela? Chela de la sajon, canche l turism porta te noscia cèses na fraca de ghesć e ence nos fascegn podon goder de n muie de servijes o chela di meisc 'morc', canche dut tèsc e podon se tor na paussa dal coas? Per troèr na spartijon tel pensier de la jent de Fascia donca, bèsta dir na parola: desajonalisazion.

Bendeché se à sentù rejonèr del projet de desajonalisazion desche n progress che ne servissa te Fascia. Ma él dalbon na bona idea? Perché pa ge volessel l fèr e co? No él ence l derit de se pussèr dal lurier turistich? Sun chest argoment, aon domanà fora Andrea Weiss, diretor de l’Apt Val de Fascia che l ne à rejonà de la ’Neva sajons’; Luca Guglielmi, assessor al turism de Cianacei che l ne à dat sia opinion tant da funzionèr che da gestor del Wurstelstand Pippotto; Nicole Weiss de l’Agritur Weiss sun Tamion, strutura a conduzion familièra averta dut l’an, che la ne à desmostrà na gran pascion te l ge dèr servijes ai ghesć; n espert tel setor sportif, che l no laora de gra ai ghesć e che l ne à dat na bela definizion de n turism nia stressant.

Desajonalisazion, l prum pensier va chiaramenter al turism. A chesta vida se à jà sentù rejonèr belebon te Fascia, fosc tant da no aer nience più brea de tor cà chest argoment. Epura chiò sion a scriver n’autra piata, che vel meter dant vèlch de più, l second pensier!, chel che vegn dò al “prum” e che met la desajonalisazion en relazion con la vita di fascegn: cognone pa semper pissèr ai ghesć e mai ai patrons de cèsa? Él na maniera per ruèr a se pussèr e poder ence magnèr na pizza zenza passèr fora duta la val, jir a fèr mingol de bon shopping zenza cogner corer te zità, se troèr dedant a n bon café zenza cogner se pissèr colun bar ne conzede l lus de fèr mingol de comunanza ence de mé? Desche zenza, fossa da troèr vèlch che staghe te mez, zeche che daghe mingol de servijes zenza tor demez l derit de se pussèr, derit de ogne femena e om, ence de chi de Fascia.

 
De più su la Usc 19 che vegnarà fora en vender ai 18 de mé


 (Daniele Verra)