Bmw Hero Südtirol Dolomites: ‘eroes’ de Fascia

Data

20 de jugn 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A la garejèda de nonzech de roda da mont à tout pèrt ence atlec fascegn. Descorion i resultac

En domenia ai 17 de jugn l'é stat la Bmw Hero Südtirol Dolomites, garejèda de roda da mont che ponta via vigni an da la val Gherdena e la va a roda per la cater valèdes ladines entorn l Sela. Na garejèda de nonzech che veit scialdi la partezipazion di miores atlec de chest sport e che la vèl desche proa de Copa del Mond Uci Marathon.

A pontèr demez da Selva 4018 atlec, che se à dat batalia per duc i 86 chilometres, su per ertes che à tocà i 2300 metres e ju per pontaes enscin a 1450 metres (per n total de 4500 metres de dislivel positif). L prum a passèr l travert l’é stat l colombian Leonardo Paez, ruà coscì al quinto suzess su chesta strèdes; la pruma femena l’é stat enveze l’austriaca Christina Kollmann-Forstner.

Anter chest gran grum de bikers, l'era ence i atlec del Fascia Bike Racing Team, che à otegnù de bogn resultac, soraldut con Manuel Verra che col temp de 5 ores e 32 menuc l'à serà sù al terzo post de categorìa e 63° assolut. Te la competizion ence Valerio Bacchiocchi che, penalisà da n azident, l'à fat segnèr l temp de 6 ores e 51 menuc; Sandy Ballis é ruà te 7 ores e 29 menuc; Simone Romano te 8 ores e 48 menuc.

L suzess più gran anter i atlec fascegn l’é ruà da l’atlet del Team Spacebikes, Gabriele Depaul, che con n temp che nesciugn se pissèa (5 ores e 12 menuc) l’é stat l prum master (no profescionisć) a passèr l travert. L se à coscita vadagnà l prum post te sia categorìa e la 33^ piaza assoluta. N resultat straordenèr otegnù dò tempes senestres a ciaval de sia roda.



 (Daniele Verra)