Te Fascia l’é endò l bike-sharing

Data

20 de jugn 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Coi 15 de jugn l’é endò peà via l servije per se spostèr da n paìsc a l’auter de la val con la rodes a eletrich, col met, a Moena e a Poza, de ciarièr debant ence rodes e auti a eletrich privac.



Per engaissèr la mobilità alternativa e a chesta vida fèr vèlch per smendrèr l trafich su la strèdes, da la metà de jugn a la metà de setember vegn endò metù a jir, con velch neva, l projet “Fascia E-Motion”.

L servije de bike sharing, endrezà per l terz an de seghit te Fascia, chest an l perveit vèlch mudament enteressant: l cost, che l’é de 2 euro per i prumes 30 menuc e de 3 euro per vigni autra mesora, la tesseres, che les é neves e desferentes, la vida de les dèr fora e l paament (con chèrta de credit o bancomat), che se pel l fèr aló da la colones loghèdes te la postazions “Fascia E-Motion” di desvalives paìjes.

I sentadins de Fascia che perveit de durèr da spes la rodes a eletrich, i pel ciarièr la tessera per duta la sajon, per n cost de 30 euro, e durèr la rodes a eletrich per no più che nonanta menuc al dì. Se no i pel cerner, apontin desche i ghesć, de ativèr la tessera canche i vel, la ciarian con 5 o 10 euro, e de durèr la rodes a eletrich canche i à de besegn.

“Via per l’istà – disc Matteo Iori, Conseier de Procura del Comun general che l coordenea l projet – volassane sostegnir l bike sharing, fajan doventèr semper più fort chel prinzip che perveit de se spostèr a na vida spedienta e de perveder che la maor pèrt di utenc i se emprevèle de la trenta rodes a eletrich a la leta. En cont de chest, se cogn conscidrèr la variazions di priesc respet ai egn passé, ma ence l met de ciarièr debant, te la postazions de Poza e Moena, la rodes e i auti privac.”  (es)