Passa 10.000 jent a la Festa ta mont

Data

10 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’edizion numer 11 à garatà de grazia a na organisazion percacenta, al bon temp e al lurier de passa 200 volontadives

L temp à didà a far amò più bela, rica e partezipada la edizion numer 11 de la Festa ta mont: n event che à de besegn che l ciel sie seren, o amancol che no l pieve massa, ma segur percheche dut garate ence l più bel soreie no basta.

Mingol l’à ence dat de sora en jù, doi curte pievete en sabeda e cater goce la domenia, ma no tant da roinar la festa: le stime rejona de passa 10.000 persone che anter sabeda e domenia é ruade fin tart te Saùch, Mesaselva e Ciampié, a pe o coi pulmins, per jir a veder, scutar e ciarciar chel che vegnìa sport chest an.

Più che 20 gropes, con passa 200 volontadives, se à endrezà con gaissa per dar fora basć da mont desche polenta, fonghes, ciarn de porcel, gnoches da formai
e da ardel con pria e capusc o patac, ma ence gialuches sul spis e pomes fric, Weisswurst, bruschette, crofegn e dapò douces de ogne sort: sone da pom, fortae, Kaiserschmarren, peta da bachec, yogurt, giacins e ence zucher sul bachet, con se sà ben ence de dut da beiver per parar jù.

Portar sa mont tanta jent l’é semper na bela endesfida, che l grop de endrez vidà da Roberto Bertacco, oramai colaudà dò passa 10 egn de esperienza, cer de far ogne an miec, portan valch neva e miorament a la festa. I 12 pulmins che va su e ju duc i doi dis no i é semper bogn de ge star dò e la couda se slongia, ma l’é segn che ence l nonzech de la festa cresc e l’é semper più jent che rua aposta ence da fora de val: en domenia da doman i à cognù fermar i auti ja Poza, lascian vegnir su per Meida demò chi che aea autre destinazion.

L gran percors de tieje te Val de Sèn Nicolò permet de limitar l’efet “massa” che se aessa con chel gran numer de jent te lesc più picoi o seré, ampò duta chesta jent su na mont domana na atenzion semper maora ence a l’ambient, e te la dificoltà de spartir l refudam, la plastica ge lascia semper più l post ai materiai biodegradaboi.

Valch aspet, desche l’endrez di gropes che sona a na vida che le museghe no se sorapee una con l’autra e no le sceche (per ejempie endana la messa o le scontrade culturale) pel amò vegnir miorà, ma con sinergìa e valch bela intuizion di gropes, n muie l’é i aspec enteressanc de la Festa ta mont, ence aldelà de dut l bel de jir stroz, magnar, beiver e se goder te n ambient da marevea, che l’é semper la pruma rejon che porta n muion de jent a chest event.

De più en cont de la scontrèdes endrezèdes en ocajion de la Festa ta mont su La Usc stampèda en vender ai 10 de aost. 

 (Lucia Gross)

Galaria retrac