Nef endrez per l telesocors e telecontrol

Data

11 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Aproèda la neva proponeta del Servije Sozio assistenzièl del Comun general per ge perferir serenità a la jent d’età e con autonomia smendrèda.

En lunesc ai 6 de aost te la scontrèda del Consei de procura del Comun general de Fascia l’é stat aproà n nef servije che respon al besegn de ge arsegurèr a la jent con autonomia smendrèda o a risech de emarginazion n intervent tempestif de aiut ti caji de malor, azident o autra nezessità de urgenza.

Na perferida de chesta sort era jà stata portèda dant ti egn da la Crousc Biencia e da la Crousc Checena, che apontin les ge dajea sostegn a la jent con besegn. Purampò la Crousc Checena l’uton passà à palesà la fadìa de jir inant, vedui i ultimes mudamenc te la tecnologìes di fonins e no aan più i strumenc per garantir na prestazion de efizienza. Dai 15 de aost donca la Crousc Checena lasciarà ló de perferir chest servije, la Crousc Biencia enveze la seghita per l moment a l portèr inant.

La Provinzia de Trent à la competenza e la cogn arsegurèr l servije, che l vegn fat te dut l Trentin da na Zentrèla operativa unica tras la Comunità de la Vallagarina, l Comun general de Fascia à donca dezidù, per empienir la locia te Fascia, de tachèr ite ence nosc raion te chesta rei. 

La Crousc Checena enscin ades à perferì chest servije debant, purampò col nef trasferiment de manscion l sarà a paament, e l cost jirà dò al coefizient ICEF (la zifra podarà mudèr da n minimal de € 0,10 a n massimal e € 1,00 al dì). 
L'é avert i termins per portèr dant la domanes per se enscinuèr ite te chest servije. Per se scriver ite ge vel se oujer a Sèn Jan alóda la senta del Comun general de Fascia ti ofizies del Servije Sozio Assistenzièl o telefonèr al numer 0462-764297 domanan de Sonia Degiampietro (mail: sociale@comungeneraldefascia.tn.it).  (Alison Prinoth)