Elisabetta Gubert neva Secretèra del Comun general de Fascia

Data

10 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L Consei general à ofizialisà sia nomina en jebia ai 9 de aost aldò de l’ejit del concors metù a jir a la fin de messèl.


L’é Elisabetta Gubert la neva Secretèra del Comun general de Fascia. Sia nomina é stata aproèda ofizialmenter dal Consei general en jebia ai 9 de aost, te n pont jontà ite de prescia a l’orden del dì dò che ai 6 de aost l Consei de Procura à aproà i verbai del concors, olache la Comiscion de 5 esperc, con a cef la dotora Lara Battisti, à decretà apontin la dotora Gubert al prum post te la graduatoria per chesta encèria.

Clas 1978, Elisabetta Gubert la se à diplomà a “La Resa Biencia” de Ciavaleis e dapò laureà en giurisprudenza a Trent. Dò aer abù l’abilitazion desche Secretèra de Comun del 2005, l’à lurà ence tel Comun de Poza del 2007 e dapò ti Comuns de la Val del Mocheni de Frassilongo/Garait, Fierozzo/Vlarötz e Palù del Fersina/Palai. Te sia esperienza profescionèla l’é ence chela de funzionèra de l’APAC, l’Agenzia per i Apalc e Contrac de Trent.

L’à vent l concors con na valutazion finala de 247,2827 (109 per la 2 proes scrites, 20 per i titoi e 117 per la proa a ousc) dedant da Chiara Luchini con na valutazion finala de 246,8936 (116 per la 2 proes scrites, 24 per i titoi e 106 per la proa a ousc).

A chest concors se aea scrit ite 7 persones, ma demò 3 a la fin les à tout pèrt, apede a Elisabetta Gubert e Chiara Luchini l’era ence Emanuela Bez, che l’aea jà tout pèrt al concors passà del Comun general de Fascia, ruan dò da Lara Brunel e l’aea ence fat recors (recors crodà de firé del 2017, canche Lara Brunel à fat e vent l concors de Secretèra te Comun de Cianacei, lascian donca l’encèria te Comun general de Fascia). Emanuela Bez l’era la soula candidata con l’atestat de cognoscenza del lengaz ladin, che ge aessa dat l derit de prezedenza assoluta se l’aessa passà la proes scrites (che pervedea de arjonjer amancol la stima de 105 su 150) e la fossa stata ametuda a la proa a ousc.

La procuradora Elena Testor dò aer ofizialisà l’inom de Elisabetta Gubert l’à rengrazià Antonio Belmonte e Stefano Nardin, che i à portà inant l lurier de Secretèr te Comun general ti meisc da canche chesta istituzion no l’à più abù n Secretèr stabol, e la se à augurà che la neva Secretèra posse tachèr so lurier al più prest per poder portèr inant al miec duta la competenzes del Comun general e n domanèr de neves.  (Lucia Gross )