Descordanza sui piazai per i auti e l comedament de L Vial

Data

16 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L Comun de Moena vel fèr endodanef l salejà, arbassèr l marciapé e tor via i èlbres. La mendranza domana più comunicazion

L Consei de Comun de Moena é stat chiamà ite en vender ai 10 de aost da les 8 da doman. Del grop de mendranza se à prejentà demò la conseiera Cristina Donei che à criticà l’orarie stramp de convocazion; duc i etres conseieres no à podù tor pèrt per empegnes de lurier. “Aessa bastà na telefonada per domanar se jiva ben l’orarie – ge à dit la conseiera Donei a l’ombolt – ma enveze se vesc che no ve enteressa che la mendranza sie tota ite te nesciuna dezijion. Desche grop sion semper stac desponiboi.”

L’ombolt Edoardo Felicetti à responet che l’é stat respetà l regolament che perveit che la convocazion vegne fata 5 dis inant. “Se fossa stat la volontà – l’à dit – i conseieres aessa fat dut l possibol per esser prejenc ence da chela ora, descheche à fat l grop de maoranza. Al ruol de conseier se cognesse ge dar più emportanza.”


I piazai per auti jun Navalge

L Consei à tout dant l’interogazion del grop “N Projet per Moena” che revèrda i piazai per i auti. L grop, per ousc de Cristina Donei, à domanà se l’Aministrazion de Comun la perveit de no i fèr paèr tel temp de fora de sajon (descheche l’é ti etres paìjes), se no la peissa che sie giust ge resservèr vèlch post ai sentadins, coluna che l’é la politiches per ressolver l problem di posć per i auti e l cost del sistem de control e paament jun Navalge.

La mendranza: ge vel maor condivijion con la jent

L Consei dapò se à palesà de contra a la mozion del grop “N projet de Moena” che domana de condivider con duta la comunanza de paìsc l projet de sistemazion del percors pedonal enlongia la Veisc. Su per L Vial defat l’aministrazion vel fèr comedèr l salejà, arbassèr l marciapé e tor via i èlbres per aer na maor vijion sun dut l paisc, l ruf e i monc. La mendranza à dit che fossa ben fat che chisc intervenc vegne condividui con la jent. “Tor demez duc i albres podessa portar n dan a l’aspet carateristich de chest emportant percors; ence l’inom de Vial fasc entener che l’é n vial con albres” à sotlineà Donei.


De più su La Usc stampèda en vender ai 17 de aost. 



 (Monica Cigolla)