N troi te Sèn Jan

Data

19 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’é n percors fotografich anter Vich, Poza e Pera l prum projet de “Sèn Joegn Cultural Lab”.

- Chi che va stroz a pe per Pera, Poza o Vich arà abadà che enlongia le strade o troes de chisc trei paìjes da pech l’é stat metù fora na fila de fotografìe: retrac da mont, paesajes de nosc raion o de lesc più dalonc, ma ence sogec desferenc. Duc ampò n muie bie, e apede a ogneun se pel lejer l’inom de l’autor e soa età, apede a scrite te più lengac de la parola “troi” e al logo “Sèn Joegn Cultural Lab”. Ma de che se tratel?

Per capir miec é domanà fora i 2 promotores de chesta scomenzadiva, l’assessor a la cultura e l conseier del Comun de Sèn Jan: Simone Zulian e Francesco Detomas.

Chisc retrac fasc part de n projet che à inom “N troi te Sèn Jan” e l’é na scomenzadiva metuda a jir sot chest logo “Sèn Joegn Cultural Lab”.

Col sostegn del Comun de Sèn Jan e l didament fort e concret de l’assessor Simone Zulian, che à semper sostegnù l besegn de tor ite i joegn, l conseier Francesco Detomas (22 egn) se à pissà de pear via con chest prum projet, che se met dant de valorisar l talent di joegn fotografes de noscia val, ma ence de lear ite le trei frazion de Sèn Jan te n percors, vardan de tor ite soraldut le strade olache la jent va a pe. Da Vich, per strada de Val e passan per strada Rezia, l percors va ju per Antersief, via e ju per Troi de Vich e dapò via per strada de la Veisc. A Poza l se spartesc en doi: un va su per Meida dò la Promenada enlongia ruf e strada Sas da le Doudesc e l’auter rua via Pera, via per strada de Jumela e su per strada Tita Piaz.

I autores de duc chisc retrac i é 9, dut joegn fascegn anter i 17 e i 24 egn, cernui diretamenter da Francesco Detomas anter chi che l cognoscea e l’é stat bon de tor ite. 4 i é da Sèn Jan, 3 da Cianacei e 2 da Moena. Chisc i inomes: Gianmaria Croce, Robin Micheluzzi, Francesco Detomas, Antonio Rizzi, Nicola Varesco, Arianna Ghetta, Marco Zanoner, Ismaele Soraperra, Federico Pace.

De più su chesta bela scomenzadiva su La Usc stampèda en vender ai 17 de aost. 

 (Lucia Gross)