L partiment de nasciuda pel endò vegnir orì

Data

10 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L Comitat Nazionèl Percors de Nasciment à tout la dezijion enstadì con gran sodesfazion de duc i esponenc politics e de duta la comunanza

L partiment de nasciuda de l’ospedèl de Ciavaleis pel vegnir endò orì.

L’é la bela neva ruèda enstadì, belapontin en mèrtesc ai 9 de otober, l dì che l Comitat Nazionèl Percors de Nasciment cognea se troèr per tor na dezijion. Na dezijion che era n muie spetèda da la comunitèdes de Fascia e Fiem dò n lonch percors de batudes, de emprometudes, de scontrèdes.

L teritorie e sia jent se à semper dat jù con convinzion percheche l partiment de nasciuda posse endò vegnir orì con i standard de ezelenza da inant e n muie l’é stat i gropes, la sociazions, la istituzions che se à spenù en pruma linea per defener la strutura sanitèra de Ciavaleis.

La neva é stata data dal Comitat Nazionèl Percors de Nasciment zenza prescrizions e donca aldò del protocol prejentà da la Azienda Sanitèra provinzièla. La data canche l partiment de nasciuda podarà endò vegnir orì vegnarà deziduda da la Jonta provinzièla de Trent che l’à sun chest la competenza.

Chest l’é l frut de n lonch lurier de mediazion tout dant te desvaliva scontrèdes tecniches tant te la sentes ministerièles de Roma che te la sentes istituzionèles de la valèdes de Fascia e Fiem. A chesta scontrèdes à tout pèrt i responsaboi de l’Azienda sanitèra de la Provinzia de Trent, i raprejentanc de la Jonta, de la Aministrazions de la doi valèdes, i raprejentanc del Comitat Nazionèl Percors de Nasciment ensema al Sotsecretèr a la Sanità. Acà presciapech diesc dis la Azienda sanitèra aea domanà na deroga per orir endodanef l partiment de nasciuda, che revèrda aspec struturèi de la sales operatories che fin ades no era stat conscidré.

Chesta deroga é stata valutèda positivamenter dal Comitat Nazionèl Percors de Nasciment che l’é na strutura tecnica, olache l’é ite demò dotores che bonamenter à valutà che chisc aspec struturèi posse dèr la garanzìa de segureza per i pìcioi e sia mères.

L Sotsecretèr a la sanità à palesà sun sia piata Facebook gran sodesfazion per chesta dezijion e l’Assessor provinzièl a la sanità à recordà l lonch lurier de confront anter l Comitat e l’Azienda sanitèra trentina, portà inant a livel tecnich per ruèr a chest ejit.

Ence la senatora e procuradora del Comun general de Fascia Elena Testor à manà fora n comunicat. “Son dalbon contenta che zacan se vae envers la orida del partiment de nasciuda de l’ospedèl de Ciavaleis – l’à dit. Apenamai che son stata litèda al Senat, de mèrz de chest an, ge aee manà na longia interogazion a la Ministra a la sanità Lorenzin en cont de l’ospedèl. Dò che l’é stat metù sù l nef goern, d’acort con la comunitèdes de val de Fiem e Cembra e l’autoritèdes de l’Azienda sanitèra, ge aee metù dant endodanef la costion. Con la orida del partiment de nasciuda vegn troà zacan na soluzion a na mencianza de servije per n gran teritorie che à portà gran dificoltèdes te chisc lonc meisc a duta la comunanza.”

 ((mci))