20 egn de Top Wine 2950

Data

12 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En sabeda ai 13 de otober sun Sas Pordoi vegn endò endrezà la degustazion de vins più auta del mond che vegn metuda a jir dal 1999

L’é passà oramai 20 egn da canche, te na ciacolèda informala anter Armin Detone, mai desmentià imprenditor de Cianacei e enlouta vizepresident de la SITC, e l Sommelier Giuliano Cadrobbi, nascea l’idea de endrezèr na degustazion de vins en aut, adertura a beleche 3000 metres, tel Refuge Maria sun Sas Pordoi.

Na pissèda segur originala, che i doi ideatores à de fata concretisà, col sostegn fort de la SITC e de sie president Fiorenzo Perathoner, con la colaborazion de firmes del post travers l didament de Stefen Bernard de Manele, e l coinvolgiment di Sommelier de Fascia e de la Sociazion di Vignaioli del Trentin. L’era i 19 de otober del 1999 canche vegnìa endrezà la pruma edizion del Top Wine 2950, stimèda desche la degustazion de vins più auta del mond.

Da enlouta l Top Wine ogne an ge à sport a ghesć e jent del post l’ocajion per cercèr i vins de la mior cèvenes del Trentin e ence de foravìa, compagné da cerces refinèdes de prodoc del post.

Al Top Wine 2950 i manco esperc de vin pel fèr si confronc, didé ence dai consees di Sommelier de Fascia e Fiem, per descorir coluna sorts e coluna cèvenes che ge sà miores, e i più esperc i pel ence proèr a descorir l’efet che à sun chisc vins l’auteza de beleche 3000 metres sul mèr.

Duc, aboncont, dò esser rué sù bel sorì con la forenadoa, i pel se passèr na giornèda da marevea, se goder con amisc o rejonèr con etres operatores scontré sul post e vardèr l panoram da encant che se pel veder dal Sas Pordoi.

Doman sabeda ai 13 de otober, a la edizion numer 20 del Top Wine 2950, da les 10 da doman a les 5 domesdì se podarà cerner anter i vins sporc da 22 cèvenes del Trentin Sudtirol e una del Piemont, e amò anter i prumes classifiché al concors internazionèl de Müller Thurgau. No menciarà de bona cerces, che chest an sun Sas Pordoi vegnarà enjignèdes con la colaborazion del chef “da steiles” de la Malga Panna de Moena Paolo Donei, del Fassa Coop e de la firma de Pasta Felicetti da Pardac. 

 ((lg))