A Sèn Jan la Giornèda FAI da d’uton

Data

12 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L Grop de Fascia e Fiem endreza en sabeda ai 13 de otober na raida per descorir la belezes storiches, artistiches, culturèles e religiouses de nosc raion

L Grop FAI de la valèdes de Fascia e Fiem, su envit de la delegazion de Trent, chest an l’à volù endrezèr te Fascia e più avisa sul tegnir del Comun de Sèn Jan, desche zenter de straordenèr enteress sot l profil storich, artistich, cultural e religious, la Giornèda FAI da d’uton 2018, che la é belapontin en program doman, sabeda ai 13 de otober.

L percors, concordà con la delegazion regionèla, à tout sù l’inom de “A la descorida de Sèn Jan” e l perveit na raida sul teritorie per cognoscer la marevees artistiches e culturèles de chest cianton.

Da les 9.30 se se troa tedant l’ofize de l’Apt de Vich per jir fin sun gejia de Sènt’Ugèna a veder chest straordenèr monument de èrt sacra che travers sia formes se confèsc benon al paesaje. La raida e la vijita a la gejia vegnarà fates dai compagnadores del teritorie Gianluigi Chiocchetti, Gilberto Bonani, Erica Bernard e con la spiegazions de Franca Chiocchetti del Museo Ladin. Dapò se jirà sa Valongia e ju de retorn a Vich, olache domesdì da les 14.30 se podarà veder la Pieif de Sèn Jan; la vijita a chest lech rich de memories storiches vegn fata da Roberto Daprà, president del Grop FAI Fascia e Fiem. Te chesta ocajion se podarà sentir ence vèlch ciantia sacra del grop musical “Demò Ousc” con la soprana Angela Chiocchetti.

Sobito dò se jirà a veder Ciasa Soldà de la familia Rizzi olache Daniela Brovadan del Museo Ladin spiegarà i bie depenc a carater profan de na batuda de ciacia a la reversa che se troa laìte; da les 15.00 a les 19.00 la raida se serarà sù con la vijita al Museo Ladin de Fascia.

L’event l’à l patrozinie de l’Aministrazion del Comun de Sèn Jan e del Comun general de Fascia.