Onor al sacrifizie per n davegnir de pèsc

Data

15 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Desche ogne an l’é stat endrezà sun Ciaslir de Vich la comemorazion di sudé morc te la Gran Vera. Per l’ocajion l’é stat renovà l cuert del teac de la cortina

En sabeda ai 3 de november tel prum domarena te la cortina de vera de Vich l’é stat la tradizionèla zerimonia de comemorazion di sudé morc, che à tout sù na valuta particolèra per i cent egn da la fin de la Gran Vera.

I gropes e la jent se à binà te piaz de paìsc per jir en defilèda, con la Musega da Vich, fin sun Ciaslir, olache l’é stat la comemorazion de don Andrea Malfatti.

L’era i Alpins da Moena fin ta Cianacei, i Scizeres de Fascia, i Studafech da Vich, na raprejentanza de la Crousc Checena, di Carabinieres, del Comun de Sèn Jan con l’ombolt Giulio Florian, l vize Germano Pedrotti e la conseiera Antonella Winterle e n grum de jent ruèda da Vich e da Fascia.

Dò la comemorazion la Musega da Vich à portà dant dotrei sonèdes endèna che i Alpins e i Studafech depojitèa la corones de orèr tedant l monument e a la fin i Scizeres à sbarà na salva de onor, desche segn de reverenza, sot la vida de l’Oberleutnant Manuel Adami.

L tenent colonel di Alpins Gino Fontana à rengrazià de cher duc i gropes rué e l’à let jù la orazion che l Cardinal Montini, doventà dò Papa Paolo VI, l’à scrit per recordèr duc i morc de duta la veres del mond.

La storica Maria Piccolin, nona de la bandiera di Scizeres, l’à recordà i 232 sudé fascegn morc endèna la Gran Vera, i Scizeres à metù jù n segn de recordanza (pojà ence te etres monumenc ai sudé morc de la val) e la zelebrazion se à serà sù con amò na sonèda de la Musega da Vich.

Domenia passèda, dò messa grana da les 11.30, l’é stat depojità na corona de orèr ence tedant al monument fora da la gejia de Sèn Jan.

De più su la Usc nr 44 stampèda ai 9 de november

 ((cri.m))